ଦିଲ୍ଲୀ ହିଂସା: ଜେଏନୟୁର ପୂର୍ବତନ ଛାତ୍ର ନେତା ଉମର ଖାଲିଦ ଗିରଫ

ନୂଆଦିଲ୍ଲୀ: ଦିଲ୍ଲୀ ହିଂସା ମାମଲାରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଗୋଟିଏ ପଟେ ଦିଲ୍ଲୀ ପୋଲିସ ଚାର୍ଜସିଟ୍ ଦାଖଲ କରୁଥିବା ବେଳେ ଅନ୍ୟପଟେ ଅଭିଯୁକ୍ତ ତଥା ସନ୍ଦିଗ୍ଧଙ୍କୁ ପଚରାଉଚରା କରୁଛି। ଏହି ସମୟରେ ଗିରଫଦାରୀ ମଧ୍ୟ ଜୋରଦାର ଚାଲିଛି। ଦିଲ୍ଲୀରେ ଦଙ୍ଗା ଷଡଯନ୍ତ୍ର ଅଭିୟୋଗରେ ଜେଏନୟୁର ପୂର୍ବତନ ଛାତ୍ର ଉମର ଖାଲିଦଙ୍କୁ ଦିଲ୍ଲୀ ପୋଲିସ ଗିରଫ କରିଛି। ଖାଲିଦଙ୍କୁ ମାରାଥନ ଜେରା ପରେ ତାଙ୍କୁ ଗିରଫ କରାଯାଇଛି।

ସୂଚନାନୁସାରେ, ରବିବାର ବିଳମ୍ବିତ ରାତିରେ ଖାଲିଦଙ୍କୁ ଗିରଫ କରାଯାଇଥିଲା। ଏହି ଗିରଫଦାରୀକୁ ଦିଲ୍ଲୀ ପୋଲିସର ଉଚ୍ଚ ପଦାଧିକାରୀମାନେ ମଧ୍ୟ ସ୍ପଷ୍ଟ କରିଛନ୍ତି। କିନ୍ତୁ ତଦନ୍ତ ପ୍ରକ୍ରିୟା ଜାରି ରହିଥିବାରୁ ବର୍ତ୍ତମାନ ଅଧିକ କୌଣସି ତଥ୍ୟ ପୋଲିସ ଅଧିକାରୀମାନେ ଦେଇନାହାନ୍ତି। 

ଏହି ଦଙ୍ଗା ସହ ଜଡିତ ଅନ୍ୟ ଏକ ମାମଲାରେ ପୋଲିସ ଉମର ଖାଲିଦଙ୍କ ବିରୋଧରେ ବେଆଇନ କାର୍ଯ୍ୟକଳାପ (ନିଷେଧ) ଅଧିନିୟମ (UAPA) ଅନୁଯାୟୀ ଏକ ମାମଲା ରୁଜୁ କରିଥିଲା। ପଚରାଉଚରା ପରେ ପୋଲିସ ମଧ୍ୟ ତାଙ୍କ ମୋବାଇଲ୍ ଫୋନ୍ ଜବତ କରିଛି।

ଦିଲ୍ଲୀ ହିଂସା ମାମଲାରେ ଖାଲିଦଙ୍କ ସମେତ ଆଠ ଜଣଙ୍କ ବିରୋଧରେ ବେଆଇନ କାର୍ଯ୍ୟକଳାପ ନିବାରଣ ଆଇନ (UAPA) ଅନୁଯାୟୀ ସ୍ୱତନ୍ତ୍ର ସେଲ୍ ଏକ ମାମଲା ରୁଜୁ କରିଛି। ଏହା ଅଧୀନରେ ଦେଶଦ୍ରୋହ, ହତ୍ୟା, ହତ୍ୟା ଉଦ୍ୟମ ଏବଂ ଦଙ୍ଗା ଭଳି ବିଭିନ୍ନ ଅଭିଯୋଗ ରହିଛି ଯେଉଁମାନେ ଖାଲିଦଙ୍କ ସହିତ ସମ୍ପର୍କରେ ଆସିଥିଲେ।