ଆରମ୍ଭ ହେଲା କେଦାରନାଥ ଧାମ୍ ଯାତ୍ରା, କିନ୍ତୁ ଏହି କାରଣରୁ ଅସନ୍ତୁଷ୍ଟ ଅଛନ୍ତି ତୀର୍ଥଯାତ୍ରୀ

ନୂଆଦିଲ୍ଲୀ: ଉତ୍ତରାଖଣ୍ଡ ସରକାର ତୀର୍ଥଯାତ୍ରୀଙ୍କୁ କେଦାରନାଥ ଧାମ ପରିଦର୍ଶନ କରିବାକୁ ଅନୁମତି ଦେଇଛନ୍ତି । କିନ୍ତୁ ଭକ୍ତମାନଙ୍କୁ ମନ୍ଦିର ଭିତରକୁ ଯିବାକୁ ଅନୁମତି ଦିଆଯାଉ ନାହିଁ । ଏହି କାରଣରୁ ସମସ୍ତ ଭକ୍ତ ନିରାଶ ଓ ଅସନ୍ତୁଷ୍ଟ ଅଛନ୍ତି । କେଦାରନାଥ ପରିଦର୍ଶନ କରିବା ପାଇଁ ଉତ୍ତରାଖଣ୍ଡର ତୀର୍ଥଯାତ୍ରୀ, ସରକାର ଦ୍ୱାରା ଜାରି ଇ-ପାସ୍ ଅନୁମତି କ୍ରମେ ୧୮ କିଲୋମିଟର ଯାତ୍ରା ଓ ପାଣିପାଗର ବିଭିନ୍ନ ସମସ୍ୟାର ସମ୍ମୁଖୀନ ହେବା ପରେ କେଦାରନାଥ ପହଞ୍ଚୁଛନ୍ତି । ସେତେବେଳେ ସେମାନେ ଜାଣିବାକୁ ପାଉଛନ୍ତି ଯେ ସେମାନେ ମନ୍ଦିର ଭିତରକୁ ପ୍ରବେଶ କରିପାରିବେ ନାହିଁ । ଏହି କାରଣରୁ ସମସ୍ତ ଭକ୍ତ ଅତ୍ୟଧିକ ଅସନ୍ତୁଷ୍ଟ ହୋଇ ପ୍ରଶ୍ନ ଉଠାଉଛନ୍ତି ।

ବାସ୍ତବରେ ଉତ୍ତରାଖଣ୍ଡ ସରକାରଙ୍କ ଦ୍ୱାରା କେବଳ ରାଜ୍ୟବାସୀଙ୍କୁ ଚଳିତ ବର୍ଷ କେଦାରନାଥ ପରିଦର୍ଶନ କରିବାକୁ ଅନୁମତି ଦିଆଯାଇଛି । ଉତ୍ତରାଖଣ୍ଡରୁ ବାହାର ଓ କୋରୋନା ଭାଇରସ ହଟସ୍ପଟର ଲୋକମାନେ ମହାମାରୀ କାରଣରୁ ଚଳିତ ବର୍ଷ କେଦାରନାଥ ପରିଦର୍ଶନ କରିପାରିବେ ନାହିଁ । ହିନ୍ଦୁ ଭକ୍ତମାନଙ୍କ ପାଇଁ କେଦାରନାଥ ହେଉଛି ଏକ ପ୍ରମୁଖ ତୀର୍ଥସ୍ଥାନ । ପ୍ରତିବର୍ଷ ଦେଶର ବିଭିନ୍ନ ସ୍ଥାନରୁ ଲକ୍ଷ ଲକ୍ଷ ଶ୍ରଦ୍ଧାଳୁ ଦର୍ଶନ ପାଇଁ କେଦାରନାଥ ଧାମକୁ ଆସନ୍ତି । ତେବେ ଚଳିତ ବର୍ଷ କୋରୋନା ଭାଇରସ୍ ମହାମାରୀ ହେତୁ ଅନେକ ଭକ୍ତ କେଦାରନାଥଙ୍କୁ ଦର୍ଶନ କରିପାରିବେ ନାହିଁ ।

ତେବେ ଉତ୍ତରାଖଣ୍ଡର ଲୋକଙ୍କୁ କେଦାରନାଥ ପରିଦର୍ଶନ କରିବାକୁ ଅନୁମତି ମିଳିବା ପରେ ମଧ୍ୟ ମନ୍ଦିର ଭିତରେ ଦର୍ଶନ ପାଇଁ ପ୍ରବେଶ ନକରି ପାରିବାରୁ ଭକ୍ତମାନେ ନିରାଶ ହୋଇଛନ୍ତି । ଏଭଳି ପରିସ୍ଥିତିରେ ସମସ୍ତ ଭକ୍ତଙ୍କ ମନରେ କେବଳ ଗୋଟିଏ ପ୍ରଶ୍ନ ଅଛି ଯେ, ଯଦି ମନ୍ଦିରକୁ ଦର୍ଶନ କରିବାକୁ ଅନୁମତି ଦିଆଯାଉ ନାହିଁ । ତେବେ ଯାତ୍ରା କାହିଁକି ଆରମ୍ଭ କରାଯାଇଛି ?