ଜୁଲାଇ ୧ରୁ ଚାରି ଧାମର ଦର୍ଶନ କରିପାରିବେ ଉତ୍ତରାଖଣ୍ଡର ଶ୍ରଦ୍ଧାଳୁମାନେ

ନୂଆଦିଲ୍ଲୀ: ଉତ୍ତରାଖଣ୍ଡ ସରକାରଙ୍କ ଦ୍ୱାରା ନିୟନ୍ତ୍ରିତ ଚାରିଧାମ ଦେବସ୍ଥାନ ପରିଚାଳନା ବୋର୍ଡ ଜୁଲାଇ ୧ରୁ ବଦ୍ରିନାଥ, କେଦାରନାଥ ସମେତ ଚାରିଟି ଧାମ ପରିଦର୍ଶନ କରିବାକୁ ରାଜ୍ୟବାସୀଙ୍କୁ ସର୍ତ୍ତମୂଳକ ଅନୁମତି ଦେଇଛି । ବୋର୍ଡର ମୁଖ୍ୟ କାର୍ଯ୍ୟକାରୀ ଅଧିକାରୀ ରବିନାଥ ରମନ ଏ ବାବଦରେ ନିର୍ଦ୍ଦେଶ ଜାରି କରି କହିଛନ୍ତି ଯେ, ନିଷିଦ୍ଧ ଅଞ୍ଚଳରେ ଓ 'ବଫର ଜୋନ୍'ରେ ରହୁଥିବା ଲୋକଙ୍କୁ କୌଣସି ଧାମ ଅଞ୍ଚଳରେ ପ୍ରବେଶ କରିବାକୁ ଅନୁମତି ଦିଆଯିବ ନାହିଁ ।

ପୂର୍ବରୁ ଦିଆଯାଇଥିବା ନିର୍ଦ୍ଦେଶ ଅନୁଯାୟୀ, ଜୁନ୍ ୩୦ ପର୍ଯ୍ୟନ୍ତ କେବଳ ସେହି ଜିଲ୍ଲାରେ ରହୁଥିବା ଶ୍ରଦ୍ଧାଳୁମାନଙ୍କୁ ଜିଲ୍ଲାଧିକାରୀଙ୍କ ଅନୁମତି କ୍ରମେ ଚାରି ଧାମର ଦର୍ଶନର ଅନୁମତି ମିଳିଥିଲା । କୋଭିଡ-19କୁ ଦୃଷ୍ଟିରେ ରଖି ଚାରି ଧାମ ପରିଦର୍ଶନ କରିବାକୁ କିଛି ପ୍ରତିବନ୍ଧକ ସହ ଅନୁମତି ଦିଆଯାଇଛି । ଏହି ନିର୍ଦ୍ଦେଶ ଅନୁଯାୟୀ, ଯଦି ରାଜ୍ୟରେ ରହୁଥିବା ଜଣେ ବ୍ୟକ୍ତି ରାଜ୍ୟ ବାହାରେ ଆସିଛନ୍ତି । ତେବେ ପୃଥକତାବାସ ଅବଧି ସମାପ୍ତ ହେବା ପରେ ହିଁ ସେ ଚାରି ଧାମ୍ ପରିଦର୍ଶନ କରିବାକୁ ଯୋଗ୍ୟ ହେବେ ।

ଯାତ୍ରା ଆରମ୍ଭ କରିବା ପୂର୍ବରୁ ଭକ୍ତଙ୍କୁ ବୋର୍ଡର ୱେବସାଇଟରେ ପଞ୍ଜିକରଣ କରିବାକୁ ପଡିବ । ଯାହା ପରେ ତାଙ୍କୁ ଏକ ଇ-ପାସ୍ ପ୍ରଦାନ କରାଯିବ । ଧାମ ଅଞ୍ଚଳର ପ୍ରତ୍ୟେକ ତୀର୍ଥସ୍ଥାନ ବିଶ୍ରାମ ସ୍ଥାନରେ ଭକ୍ତମାନେ କେବଳ ଗୋଟିଏ ରାତି ରହିପାରିବେ । କୋଭିଡ-19 କିମ୍ବା ଫ୍ଲୁ ଲକ୍ଷଣ ଥିବା ବ୍ୟକ୍ତିଙ୍କୁ ଯାତ୍ରା କରିବାକୁ ଅନୁମତି ଦିଆଯିବ ନାହିଁ । ଭାରତ ସରକାରଙ୍କ ନିର୍ଦ୍ଦେଶାବଳୀ ଅନୁଯାୟୀ ୬୫ ବର୍ଷରୁ ଅଧିକ ବୟସ୍କ ଓ ୧୦ ବର୍ଷରୁ କମ୍ ବୟସର ପିଲାମାନେ ଏବଂ ସ୍ୱାସ୍ଥ୍ୟ ସମ୍ବନ୍ଧୀୟ ସମସ୍ୟାରେ ପୀଡିତ ଲୋକମାନେ ଯାତ୍ରା କରିପାରିବେ ନାହିଁ ।

ଧାମ ଅଞ୍ଚଳରେ ଯାତ୍ରା ସମୟରେ ହ୍ୟାଣ୍ଡ ସାନିଟାଇଜର ଓ ମାସ୍କ ବ୍ୟବହାର କରିବା ଏବଂ ସାମାଜିକ ଦୂରତା ଅନୁସରଣ କରିବା ବାଧ୍ୟତାମୂଳକ ହେବ । ରାୱଲ, ଧର୍ମାଧିକାରୀ, ପୁରୋହିତ ଏବଂ ଭକ୍ତଙ୍କ ସୁରକ୍ଷାକୁ ଦୃଷ୍ଟିରେ ରଖି କୌଣସି ଧାମର ଗର୍ଭଗୃହରେ ଓ ଗର୍ଭଗୃହକୁ ଲାଗିଥିବା ସଭା ମଣ୍ଡପ ଆଗ ଭାଗରେ ଭକ୍ତଙ୍କ ପ୍ରବେଶ ନିଷେଧ ହେବ । ମନ୍ଦିରରେ ପ୍ରବେଶ କରିବା ପୂର୍ବରୁ ଭକ୍ତମାନଙ୍କୁ ହାତ ଓ ପାଦ ଧୋଇବାକୁ ପଡିବ ।