ପ୍ରତିରକ୍ଷା କ୍ଷେତ୍ରରେ FDI ବୃଦ୍ଧି କଲେ ମୋଦି ସରକାର

ନୂଆଦିଲ୍ଲୀ: କୋରୋନା ଭୂତାଣୁ ରୋକିବା ପାଇଁ  ସାରା ଦେଶରେ ଲକଡାଉନ୍ ଜାରି ରହିଛି । ଏଥିପାଇଁ ଦେଶରେ ସଙ୍କଟର ସ୍ଥିତି ଦେଖାଦେଇଛି । ଏହା ମୁକାବିଲା ପାଇଁ ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ୨୦ ଲକ୍ଷ କୋଟି ଟଙ୍କାର ଆର୍ଥିକ ପ୍ୟାକେଜ ଘୋଷଣା କରାଯାଇଥିଲା । ଯାହା ଉପରେ ଚତୁର୍ଥ ସାମ୍ବାଦିକ ସମ୍ମିଳନୀରେ ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି ଯେ, ଭାରତକୁ ଆତ୍ମନିର୍ଭରଶୀଳ କରିବା ପାଇଁ ଅର୍ଥନୈତିକ ସୁଧାର କରିବାକୁ ପଡିବ । ରୋଜଗାର ଓ ବାଣିଜ୍ୟ ବୃଦ୍ଧି ପାଇଁ ଗଠନମୂଳକ ସଂସ୍କାର ଆଣିବାର ଆବଶ୍ୟକତା ଅଛି । ଉତ୍ପାଦଗୁଡିକ ନିର୍ଭରଯୋଗ୍ୟ ହେବା ଆବଶ୍ୟକ । ଭାରତରେ ଭଲ ନିବେଶର ପରିବେଶ ରହିଛି ।

ଅର୍ଥମନ୍ତ୍ରୀ କହିଛନ୍ତି ଯେ, ଏହି କ୍ଷେତ୍ରରେ ଅର୍ଥନୈତିକ ସୁଧାର କରାଯାଇପାରିବ । ପ୍ରତିରକ୍ଷା କ୍ଷେତ୍ରରେ ଏକ ପ୍ରମୁଖ ସଂସ୍କାରର ଆବଶ୍ୟକତା ଉପରେ ଗୁରୁତ୍ୱ ଦେଇ ସେ କହିଛନ୍ତି ଯେ, ଏପରି ଅସ୍ତ୍ରଶସ୍ତ୍ର, ପ୍ଲାଟଫର୍ମର ଆମଦାନି ଉପରେ ପ୍ରତିବନ୍ଧକ ଲଗାଯିବ, ଯାହା ନିର୍ମାଣ ଭାରତରେ ଆବଶ୍ୟକ ମାନଦଣ୍ଡ ଉପରେ ନିର୍ମିତ ହୋଇପାରିବ । ପ୍ରତିବର୍ଷ ଏହି ନିଷେଧ ତାଲିକା ବୃଦ୍ଧି କରାଯିବ । ପ୍ରତିରକ୍ଷା ଉତ୍ପାଦଗୁଡ଼ିକରେ ଆତ୍ମନିର୍ଭରଶୀଳତା ବୃଦ୍ଧି ସମ୍ପର୍କରେ ଅର୍ଥମନ୍ତ୍ରୀ କହିଛନ୍ତି ଯେ, ବର୍ତ୍ତମାନ ଏହି କ୍ଷେତ୍ରରେ ବିଦେଶୀ ପୁଞ୍ଜି ନିବେଶର ସୀମା ୪୯ ପ୍ରତିଶତରୁ ବୃଦ୍ଧି କରି ୭୪ ପ୍ରତିଶତକୁ କରାଯାଇଛି । ଏହା ସହିତ ଅର୍ଡିନେନ୍ସ କାରଖାନା ବୋର୍ଡ ନିଗମୀକରଣ କରାଯିବ ।

ଏହା ସହ ସେ କହିଛନ୍ତି ଯେ, ରାଜ୍ୟଗୁଡିକର ପୁଞ୍ଜି ବିନିଯୋଗର ଏକ ରାଙ୍କିଙ୍ଗ୍ ହେବ ।  ଏହି ଯୋଜନାଗୁଡିକ କେତେ ଆକର୍ଷଣୀୟ ତାହା ଦେଖିବା ଉଚିତ । ଘରୋଇ କ୍ଷେତ୍ରରେ ଆର୍ଥିକ ସୁଧାର ଉପରେ ଫୋକସ ରହିଛି । ଯେଉଁଥିରେ କୋଇଲା ଖଣିଜ ପଦାର୍ଥ, ବିମାନବନ୍ଦର, ISRO ଓ ଶକ୍ତି ବଣ୍ଟନ ସାମିଲ ରହିଛି । କୋଇଲା କ୍ଷେତ୍ରରେ ସରକାରଙ୍କର ଏକଚାଟିଆ ଅଧିକାର ରହିଛି । ଭାରତରେ ବିଶ୍ୱର ତୃତୀୟ ବୃହତ୍ତମ କୋଇଲା ଭଣ୍ଡାର ରହିଛି । ତଥାପି ବାହାରୁ କୋଇଲାକୁ ଆମଦାନୀ କରିବାକୁ ପଡିଥାଏ । କୋଇଲା ପରିବେଶକୁ ମଧ୍ୟ କ୍ଷତି ପହଞ୍ଚାଏ । ତେଣୁ ଏଥିରୁ ଗ୍ୟାସ ତିଆରି ଉପରେ ଅଧିକ ଗୁରୁତ୍ୱ ଦିଆଯିବ । ସରକାର କୋଇଲା କ୍ଷେତ୍ରରେ କମର୍ସିଆଲ ମାଇନିଂ ଆରମ୍ଭ କରିବେ । ଏଥିରେ ନିୟମକୁ କୋହଲ କରାଯିବ । ଏଥିରେ ୫୦ଟି ନୂତନ ବ୍ଲକ କମର୍ସିଆଲ ମାଇନିଂ ପାଇଁ ଖୋଲାଯିବ । ଖଣି କ୍ଷେତ୍ରରେ ୫ ହଜାର କୋଟି ଟଙ୍କା ଖର୍ଚ୍ଚ ହେବ ।  ଖଣିଜ କ୍ଷେତ୍ର ମଧ୍ୟ ଘରୋଇ କ୍ଷେତ୍ର ପାଇଁ ଖୋଲାଯିବ ବୋଲି ଅର୍ଥମନ୍ତ୍ରୀ କହିଛନ୍ତି ।