ସୁପ୍ରିମକୋର୍ଟ ପହଞ୍ଚିଲେ ତବଲିଗି ଜମାତ ସହ ଜଡ଼ିତ ବିଦେଶୀ ନାଗରିକ

ନୂଆଦିଲ୍ଲୀ: ତବଲିଗି ଜମାତ ସହିତ ଜଡିତ ବିଦେଶୀ ନାଗରିକମାନେ ସୁପ୍ରିମକୋର୍ଟରେ ପହଞ୍ଚିଛନ୍ତି । ବିଭିନ୍ନ ଦେଶର ବିଦେଶୀଙ୍କୁ ବ୍ଲାକଲିଷ୍ଟ କରିବା ପାଇଁ ଗୃହ ମନ୍ତ୍ରଣାଳୟର ନିଷ୍ପତ୍ତିକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯାଇଛି । ୭ ଜଣ ବିଦେଶୀ ନାଗରିକ ଗୃହ ମନ୍ତ୍ରଣାଳୟର ଏହି ପଦକ୍ଷେପକୁ ଅସାମ୍ବିଧାନିକ ବୋଲି ଚ୍ୟାଲେଞ୍ଜ କରିଛନ୍ତି । ଏହି ଆବେଦନରେ କୁହାଯାଇଛି ଯେ, କେନ୍ଦ୍ର ସରକାରଙ୍କ ଏହି ନିଷ୍ପତ୍ତି ଅସାମ୍ବିଧାନିକ । କାରଣ କଳା ତାଲିକାଭୁକ୍ତ କରିବା ପୂର୍ବରୁ ସେମାନଙ୍କୁ ନୋଟିସ ଦିଆଯାଇ ନାହିଁ କିମ୍ବା ସେମାନଙ୍କ ପକ୍ଷ ଶୁଣାଯାଇ ନାହିଁ ।

ବାସ୍ତବରେ ଏପ୍ରିଲ ୨ରେ ପ୍ରେସ ସୂଚନା ବ୍ୟୁରୋ(ପିଆଇବି) ତରଫରୁ କୁହାଯାଇଥିଲା ଯେ, ଭାରତରେ ଉପସ୍ଥିତ ଥିବା ୩୫ଟି ଦେଶର ୯୬୦ଜଣ ବିଦେଶୀଙ୍କୁ କଳା ତାଲିକାଭୁକ୍ତ କରିବାକୁ ସରକାର ନିଷ୍ପତ୍ତି ନେଇଛନ୍ତି । ଏଥିସହ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ଡିଜିପି ତଥା ଦିଲ୍ଲୀ ପୋଲିସ କମିଶନରଙ୍କୁ ଏହିପରି ବିଦେଶୀ ନାଗରିକଙ୍କ ବିରୋଧରେ ଏଫଆଇଆର ରୁଜୁ କରିବାକୁ ନିର୍ଦ୍ଦେଶ ଦିଆଯାଇଛି ।

ଆବେଦନକାରୀ ଏହା ମଧ୍ୟ କହିଛନ୍ତି ଯେ, ଏହି ନିଷ୍ପତ୍ତି ପରେ ଏପ୍ରିଲ ୪ରେ ସରକାର ଭାରତରେ ଉପସ୍ଥିତ ୨୫୦୦ ବିଦେଶୀଙ୍କୁ ୧୦ ବର୍ଷ ପର୍ଯ୍ୟନ୍ତ ଭାରତ ଯାତ୍ରା କରିବା ପାଇଁ କଳା ତାଲିକାଭୁକ୍ତ କରିଥିଲେ । କିନ୍ତୁ ଏ ସମ୍ପର୍କରେ କୌଣସି ବିଜ୍ଞପ୍ତି ଜାରି କରାଯାଇ ନାହିଁ । ଏହି ନିଷ୍ପତ୍ତିକୁ ବାତିଲ କରିବାକୁ ଆବେଦନ କରିଛନ୍ତି ।

Add Zee News as a Preferred Source

ଆବେଦନକାରୀଙ୍କ ମଧ୍ୟରେ ଥାଇଲ୍ୟାଣ୍ଡର ୨ ଜଣ ନାଗରିକ ଅଛନ୍ତି । କେନିଆ, ମାଲେ, ମୋରକ୍କୋ, ଟ୍ୟୁନିସିଆ ଏବଂ ମାଲେସିଆର ଜଣେ-ଜଣେ ନାଗରିକ ସାମିଲ ଅଛନ୍ତି । ସେମାନଙ୍କ ମଧ୍ୟରୁ ଜଣେ ସାତ ମାସର ଗର୍ଭବତୀ ଅଛନ୍ତି ।