ଭାରତର ବରିଷ୍ଠ କ୍ରିକେଟର ବସନ୍ତ ରାୟଜୀଙ୍କ ପରଲୋକ, ବିସିସିଆଇ ଦେଲା ଶ୍ରଦ୍ଧାଞ୍ଜଳି

ନୂଆଦିଲ୍ଲୀ: ଭାରତର ସର୍ବପୁରାତନ ପ୍ରଥମ ଶ୍ରେଣୀ କ୍ରିକେଟର ବସନ୍ତ ରାଇଜୀଙ୍କର ଶନିବାର ସକାଳେ ଦେହାନ୍ତ ହୋଇଛି। ମୃତ୍ୟୁ ବେଳକୁ ତାଙ୍କୁ ୧୦୦ ବର୍ଷ ବୟସ ହୋଇଥିଲା। ରାଇଜି ଡାହାଣହାତୀ ବ୍ୟାଟ୍ସମ୍ୟାନ୍ ଥିଲେ। ୧୯୪୦ ଦଶକରେ ରାଇଜି ମୋଟ ୯ଟି ପ୍ରଥମ ଶ୍ରେଣୀ ମ୍ୟାଚ୍ ଖେଳି ମୋଟ ୨୭୭ ରନ୍ ସ୍କୋର କରିଥିଲେ। ବରୋଦା ବିପକ୍ଷରେ ରଣଜୀ ଟ୍ରଫିରେ ମୁମ୍ବାଇ ପାଇଁ ଇନିଂସ ଆରମ୍ଭ କରିଥିଲେ। ସେ ୧୯୪୧ ବମ୍ବେ ପେଣ୍ଟାଗୋନାଲ ହିନ୍ଦୁ ଦଳରେ ରିଜର୍ଭ ଖେଳାଳି ଥିଲେ।

କ୍ରିକେଟରୁ ଅବସର ନେବା ପରେ ରାଇଜି ଲେଖିଛନ୍ତି। ଅବଶ୍ୟ, ସେ ବୃତ୍ତି ଅନୁଯାୟୀ ଜଣେ ଚାଟାର୍ଡ ​​ଆକାଉଣ୍ଟାଣ୍ଟ ଥିଲେ । ୨୦୧୬ ମସିହାରେ ବି.କେ ଗୁରୁଦାଚାରାଙ୍କ ଦେହାନ୍ତ ପରେ ରାଇଜି ଦେଶର ସର୍ବପୁରାତନ ପ୍ରଥମ ଶ୍ରେଣୀ କ୍ରିକେଟର ହୋଇଥିଲେ। ଚଳିତ ବର୍ଷ ଜାନୁଆରୀ ୨୬ରେ, ରାଇଜି ତାଙ୍କର ୧୦୦ତମ ଜନ୍ମଦିନ ପାଳନ କରିଥିଲେ ଏବଂ ସଚିନ ତେନ୍ଦୁଲକର ଏବଂ ଷ୍ଟିଭ ଓ୍ୱ ଏହି ଉତ୍ସବରେ ଯୋଗ ଦେଇଥିଲେ ।

ମାର୍ଚ୍ଚ ୭ରେ ଜନ୍ ମ୍ୟାନର୍ସଙ୍କ ଦେହାନ୍ତ ପରେ ରାଇଜି ବିଶ୍ୱର ସବୁଠାରୁ ଭେଟେରାନ୍ ପ୍ରଥମ ଶ୍ରେଣୀ କ୍ରିକେଟର ହୋଇଥିଲେ । ତାଙ୍କ ମୃତ୍ୟୁ ପରେ ସମଗ୍ର କ୍ରିକେଟ୍ ଦୁନିଆରେ ଶୋକର ଲହରୀ ଖେଳିଯାଇଛି, ସଚିନ ତେନ୍ଦୁଲକର (sachin tendulkar) ମଧ୍ୟ ଟ୍ୱିଟ୍ ଜରିଆରେ ବସନ୍ତ ରାଇଜିଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି।

Add Zee News as a Preferred Source