ମହାରାଷ୍ଟ୍ରର ମନ୍ତ୍ରୀ ଅଶୋକ ଚୌହ୍ୱାନଙ୍କୁ କୋରୋନା

ମୁମ୍ୱାଇ: କୋରୋନା ମହାମାରୀ ସଙ୍କଟ ମଧ୍ୟ ଦେଇ ଗତି କରୁଥିବା ମହାରାଷ୍ଟ୍ର ପାଇଁ ଏକ ଖରାପ ଖବର ରହିଛି । ଉଦ୍ଧବ ସରକାରର ଜଣେ ମନ୍ତ୍ରୀ ତଥା ମହାରାଷ୍ଟ୍ରର ପୂର୍ବତନ ସିଏମ ଅଶୋକ ଚୌହ୍ୱାନଙ୍କ କୋରୋନା ପଜିଟିଭ ମିଳିଛି । ତାଙ୍କୁ ନାନ୍ଦେଡରୁ ମୁମ୍ବାଇକୁ ଅଣାଯାଇଛି । ତେବେ ଏପର୍ଯ୍ୟନ୍ତ ତାଙ୍କୁ କୋରୋନା ହୋଇଛି ବୋଲି ଆଧିକାରୀକ ଭାବେ ପୃଷ୍ଟି କରାଯାଇ ନାହିଁ । ଅନ୍ୟପକ୍ଷେ ମହାରାଷ୍ଟ୍ରରେ କୋରୋନା ପଜିଟିଭ ସଂଖ୍ୟା ବର୍ତ୍ତମାନ ୫୦ ହଜାର ଅତିକ୍ରମ କରିଛି ।

ଏହାପୂର୍ବରୁ ଏପ୍ରିଲରେ ମହାରାଷ୍ଟ୍ରର ଅନ୍ୟ ଏକ ମନ୍ତ୍ରୀ ତଥା ଏନସିପି ନେତା ଜିତେନ୍ଦ୍ର ଆହାଡଙ୍କ କୋରୋନା ପରୀକ୍ଷା ରିପୋର୍ଟ ପଜିଟିଭ ଆସିଥିଲା । ନିମୋନିଆ ଅଭିଯୋଗ ପରେ ମନ୍ତ୍ରୀ ମଙ୍ଗଳବାର ରାତିରେ ଥାନେ ଡାକ୍ତରଖାନାରେ ଭର୍ତ୍ତି ହୋଇଥିଲେ। ତାଙ୍କ ସ୍ପର୍ଶରେ ଆସିଥିବା ସୁରକ୍ଷା କର୍ମୀଙ୍କ ସମେତ ୧୮ ଜଣ ବ୍ୟକ୍ତି କୋରୋନା ପଜିଟିଭ୍ ଥିବା ଜଣାପଡିଛି । ମନ୍ତ୍ରୀଙ୍କୁ ପ୍ରଥମ ହୋମ୍ କ୍ୱାରେଣ୍ଟାଇନ୍ କରାଯାଇଥିଲା । ସେତେବେଳେ ତାଙ୍କର ରିପୋର୍ଟ ନେଗେଟିଭ ଥିଲା । 

ଅନ୍ୟପକ୍ଷେ ଦେଶରେ ଏହି ମହାମାରୀ ଭାଇରସ ଯୋଗୁଁ ସଂକ୍ରମିତଙ୍କ ସଂଖ୍ୟା କ୍ରମାଗତ ବୃଦ୍ଧି ପାଉଛି । ଦେଶରେ କୋରୋନା ପ୍ରଭାବିତ ରାଜ୍ୟଗୁଡ଼ିକ ମଧ୍ୟରୁ ମହାରାଷ୍ଟ୍ର ଶୀର୍ଷରେ ରହିଛି । ଏଠାରେ ଗତ ୨୪ ଘଣ୍ଟା ମଧ୍ୟରେ ସର୍ବାଧିକ କୋରୋନା ମାମଲା ସାମ୍ନାକୁ ଆସିଛି । ଗତ ୨୪ ଘଣ୍ଟା ମଧ୍ୟରେ ଏହି ରାଜ୍ୟରେ ୩,୦୪୧ଟି ନୂଆ ପଜିଟିଭ ମାମଲା ଚିହ୍ନଟ ହୋଇଛି । ଏହା ପରେ ସଂକ୍ରମିତ ଲୋକଙ୍କ ସଂଖ୍ୟା ୫୦,୦୦୦ ଅତିକ୍ରମ କରିଛି । ବର୍ତ୍ତମାନ ଏଠାରେ ସମୁଦାୟ ୫୦,୨୩୧ ଜଣ କୋରୋନା ସଂକ୍ରମିତ ଚିହ୍ନଟ ହୋଇଛନ୍ତି । ସମଗ୍ର ମହାରାଷ୍ଟ୍ରରେ କୋରୋନା ସଂକ୍ରମଣ ଯୋଗୁଁ ଏପର୍ଯ୍ୟନ୍ତ ୧,୬୩୫ ଜଣଙ୍କର ମୃତ୍ୟୁ ଘଟିଛି ।

କେବଳ ମୁମ୍ବାଇରେ ସଂକ୍ରମିତ ରୋଗୀଙ୍କ ସଂଖ୍ୟା ୩୦,୫୪୨ ରେ ପହଞ୍ଚିଛି । ଗତ ୨୪ ଘଣ୍ଟା ମଧ୍ୟରେ ୧୭୨୫ଟି ନୂଆ କୋରୋନା ମାମଲା ଚିହ୍ନଟ ହୋଇଛି । ଏହାସହ ୩୯ ଜଣ କୋରୋନା ସଂକ୍ରମିତଙ୍କର ମୃତ୍ୟୁ ହୋଇଛି । ଏହିପରି ମୃତ୍ୟୁ ସଂଖ୍ୟା ୯୮୮ରେ ପହଞ୍ଚିଛି ।

ସମଗ୍ର ବିଶ୍ୱରେ ଓ ଭାରତରେ କୋରୋନା ଭାଇରସ ଦ୍ରୁତ ଗତିରେ ବୃଦ୍ଧି ପାଉଛି । ଦେଶରେ ସଂକ୍ରମିତ କୋରୋନାର ମୋଟ ସଂଖ୍ୟା ୧.୩୧ ଲକ୍ଷ ଅତିକ୍ରମ କରିଛି । ରବିବାର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଭାରତରେ ମୋଟ କୋରୋନା ଭାଇରସ ସଂକ୍ରମିତଙ୍କ ସଂଖ୍ୟା ୧,୩୧,୮୬୮କୁ ବୃଦ୍ଧି ପାଇଛି । ଏହାସହ ଦେଶରେ ଏପର୍ଯ୍ୟନ୍ତ ୩,୮୬୭ ଜଣଙ୍କର ଏହି ଭୂତାଣୁ ଯୋଗୁଁ ମୃତ୍ୟୁ ଘଟିଛି । ଏଥି ସହିତ ଗତ ୨୪ ଘଣ୍ଟା ମଧ୍ୟରେ ୬,୭୬୭ଟି ନୂଆ କୋରୋନା ମାମଲା ଚିହ୍ନଟ ହୋଇଥିବାର ଜଣାପଡିଛି  । ଏହା ବ୍ୟତୀତ ୧୪୭ ଜଣଙ୍କର ମୃତ୍ୟୁ ଘଟିଛି ।