ଆସନ୍ତା କାଲିଠାରୁ ବଦଳିଯିବ ଗ୍ୟାସ ବୁକିଂର ନିୟମ, ଜାଣନ୍ତୁ ନୂଆ ନିୟମ ସମ୍ପର୍କରେ

ଜିନୁ ଜେନା, ନୂଆଦିଲ୍ଲୀ: ନଭେମ୍ବର ୧ରୁ ଲାଗୁ ହେବ ନୂଆ ନିୟମ । ନଭେମ୍ବର ୧ରୁ ଏଲପିଜି ଗ୍ୟାସ ସିଲିଣ୍ଡରର ହୋମ ଡେଲିଭରି ପାଇଁ ବଦଳିବ ନିୟମ । ଗ୍ୟାସ ସିଲିଣ୍ଡର ବୁକ୍ କଲାବେଳେ ଆପଣଙ୍କ ପଞ୍ଜିକୃତ ମୋବାଇଲ ନମ୍ବରରେ ଏକ ଓଟିପି ଆସିବ । ଆଉ ଏହି କୋଡକୁ ଡେଲିଭରି ବଏଙ୍କୁ ଦେଖାଇବା ପରେ ଯାଇ ଆପଣଙ୍କୁ ଗ୍ୟାସ ମିଳିବ । 

ନୂଆ ସିଲିଣ୍ଡର ପଲିସି ଅନୁସାରେ, ସମସ୍ତ ଗ୍ରାହକଙ୍କୁ ସେମାନଙ୍କର ନାଁ, ଠିକଣା ଏବଂ ମୋବାଇଲ ନମ୍ବର ଅପଡେଟ୍ କରିବାକୁ ହେବ । ଅନ୍ୟପକ୍ଷରେ  ଗ୍ରାହକ SMS ମାଧ୍ୟମରେ ଗ୍ୟାସ ବୁକ୍ କରିବାର ନୂଆ ସୁଯୋଗ ଦେଇଛି ଇଣ୍ଡେନ ଗ୍ୟାସ୍ କମ୍ପାନୀ । ଯଦି ଆପଣ ଜଣେ ଇଣ୍ଡେନ୍ ଗ୍ରାହକ, ତେବେ ଆପଣଙ୍କୁ ନୂତନ ନମ୍ବର 7718955555 କୁ କଲ କରି ଗ୍ୟାସ୍ ସିଲିଣ୍ଡର ବୁକ୍ କରିବାକୁ ପଡିବ । ଯଦି ଆପଣ କରିପାରିବେ ନାହିଁ ତେବେ ଆପଣ ନିଜ ପଞ୍ଜିକୃତ ମୋବାଇଲ ନମ୍ବରରୁ  7588888824 ହ୍ବାଟ୍ସଆପରେ ମେସେଜ ଦେଇ ଗ୍ୟାସ୍ ସିଲିଣ୍ଡର ବୁକିଂ କରିପାରିବେ । 

ମାସର ପହିଲାରେ ଗ୍ୟାସ ସିଲିଣ୍ଡର ଦରରେ ହୋଇଥାଏ ପରିବର୍ତ୍ତନ । ଏହାରି ମଧ୍ୟରେ ନଭେମ୍ବର ୧ରୁ ମଧ୍ୟ ଗ୍ୟାସ ଦରରେ ପରିବର୍ତ୍ତନ ହୋଇପାରେ । ଅକ୍ଟୋବର ମାସରେ ଗ୍ୟାସ ସିଲିଣ୍ଡର ଦରବୃଦ୍ଧି କରାଯାଇଥିଲା । ନଭେମ୍ବର ପହିଲାରୁ ଦେଶରେ ଯାତାୟାତ କରୁଥିବା ଟ୍ରେନର ସମୟ ବଦଳିବ। ପୂର୍ବରୁ ପ୍ରତିବର୍ଷ ଅକ୍ଟୋବର ପହିଲାରେ ଟ୍ରେନର ସମୟ ବଦଳୁଥିଲା। ହେଲେ ଚଳିତ ବର୍ଷ ଏହା ନଭେମ୍ବର ୧ରୁ ବଦଳିବ ବୋଲି କୁହାଯାଇଛି। 

Add Zee News as a Preferred Source

ଏସିବିଆଇ ସଞ୍ଚୟ ଖାତାରେ ମିଳିବ କମ୍ ସୁଧ। ଯେଉଁ ଖାତାଗୁଡ଼ିକରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ଜମାରାଶି ରହିଛି ନଭେମ୍ବର ୧ରୁ ଏହା ଉପରେ ସୁଧ ହାର ୦.୨୫ ପ୍ରତିଶତ ହ୍ରାସ ଘଟି ୩.୨୫ ପ୍ରତିଶତ ହୋଇଯିବ। ୧ ଲକ୍ଷରୁ ଅଧିକ ଜମା ଥିଲେ ରେପୋ ରେଟ୍ ହିସାବରେ ସୁଧ ମିଳିବ। ବ୍ୟାଙ୍କ ଅଫ ବରୋଦାରେ ଧାର୍ଯ୍ୟ ସୀମା ଠାରୁ ଅଧିକ ବ୍ୟାଙ୍କିଂ କଲେ ଅତିରିକ୍ତ ଶୁଳ୍କ ଦେବାକୁ ପଡ଼ିବ।