କୋରୋନାକୁ ମାତ୍ ଦେବାରେ ପ୍ରଥମ ରାଜ୍ୟ ହେଲା ଗୋଆ, ସମସ୍ତ ଆକ୍ରାନ୍ତ ସୁସ୍ଥ

ପାନଜୀ: ଗୋଆରେ ଥିବା ସମସ୍ତ ୭ ଜଣ କୋରୋନା ରୋଗୀ ଚିକିତ୍ସା ପରେ ସୁସ୍ଥ ହୋଇଯାଇଛନ୍ତି । ସମସ୍ତଙ୍କୁ ଡାକ୍ତରଖାନାରୁ ଡିସଚାର୍ଜ କରାଯାଇଛି । ଏହିପରି ଭାବେ ଗୋଆ ଦେଶର ପ୍ରଥମ ରାଜ୍ୟ ଭାବରେ କୋରୋନା ଭାଇରସକୁ ମାତ୍ ଦେଇଛି । ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ବିଶ୍ୱଜିତ ରାଣେ ରବିବାର ଏହି ସୂଚନା ଦେଇଛନ୍ତି । ସଂକ୍ରମଣର ୭ ଟି ମାମଲା ମଧ୍ୟରୁ ଶେଷ ମାମଲା ଏପ୍ରିଲ ୩ରେ ରିପୋର୍ଟ କରାଯାଇଥିଲା । ଚିକିତ୍ସା ପରେ ସମସ୍ତ ବ୍ୟକ୍ତିଙ୍କ ନମୁନା ପରୀକ୍ଷା କରାଯାଇ ନେଗେଟିଭ ଆସିବା ପରେ ଡାକ୍ତରଖାନାରୁ ଡିସଚାର୍ଜ କରାଯାଇଛି ।

Zero indeed has great value! Immensely happy to announce that all the COVID-19 positive cases in the state are now NEGATIVE. Very grateful to our Doctors & frontline workers who worked tirelessly & risked their lives to save others. #GoaFightsCovid19 #COVIDfree pic.twitter.com/ZiUlAmDh25

— VishwajitRane (@visrane) April 19, 2020

ରାଣେ ଟ୍ୱିଟ୍ କରି କହିଛନ୍ତି, ଗୋଆରେ କୋଭିଡ -19ରେ ପୀଡିତ ସମସ୍ତ ରୋଗୀ ଆରୋଗ୍ୟ ହୋଇଥିବାରୁ ଆମେ ଗର୍ବିତ । ବର୍ତ୍ତମାନ ଗୋଆର କୌଣସି ବ୍ୟକ୍ତି କୋରୋନା ଭାଇରସରେ ସଂକ୍ରମିତ ନୁହଁନ୍ତି । ବର୍ତ୍ତମାନ ସମୟରେ ଯେତେବେଳେ ରାଜ୍ୟରେ କୌଣସି ବ୍ୟକ୍ତି ସଂକ୍ରମିତ ନାହାଁନ୍ତି, ସେତେବେଳେ ଆମକୁ ଲକଡାଉନର ମହତ୍ତ୍ୱକୁ ବୁଝିବାକୁ ପଡ଼ିବ । ସାମାଜିକ ଦୂରତା ବଜାୟ ରଖିବା, ଅଧିକ ଅନୁସନ୍ଧାନ କରିବା ଏବଂ କେନ୍ଦ୍ର ଓ ରାଜ୍ୟ ସରକାରଙ୍କ ନିୟମ ପାଳନ କରିବାକୁ ପଡ଼ିବ । ରାଣେ ଡାକ୍ତରଙ୍କ ସମେତ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ, ମୁଖ୍ୟ ଶାସନ ସଚିବ ପରିମଲ ରାୟ ଏବଂ ସ୍ୱାସ୍ଥ୍ୟ ସଚିବ ନୀଲା ମୋହନନଙ୍କୁ ଧନ୍ୟବାଦ ଜଣାଇଛନ୍ତି ।