ଭଲ ଖବର: ଦେଶର ୪୦୦ ଜିଲ୍ଲାରେ ଏଯାଏ ଛୁଇଁ ପାରିନି କୋରୋନା ଭାଇରସ

ନୂଆଦିଲ୍ଲୀ: ଦେଶରେ କୋରୋନା ଭୂତାଣୁ ସଂକ୍ରମଣ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଛି । ସ୍ୱାସ୍ଥ୍ୟ ମନ୍ତ୍ରଣାଳୟର ତଥ୍ୟ ଅନୁଯାୟୀ ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା ୫୮୬୫କୁ ବୃଦ୍ଧି ପାଇଛି । ଏହି ବିପଜ୍ଜନକ ଭୂତାଣୁ ଯୋଗୁଁ ଏପର୍ଯ୍ୟନ୍ତ ୧୬୯ ଜଣଙ୍କ ମୃତ୍ୟୁ ଘଟିଛି । କିନ୍ତୁ ଇତି ମଧ୍ୟରେ ଏକ ଖୁସି ଖବର ଆସିଛି ଯେ ଦେଶରେ ୪୦୦ଟି ଜିଲ୍ଲା ରହିଛି, ଯେଉଁଠାରେ ଗୋଟିଏ ବି କୋରୋନା ସଂକ୍ରମିତ ମାମଲା ସାମ୍ନାକୁ ଆସି ନାହିଁ । ଯଦି ଏପରି ଜାରି ରହିଥାଏ ତେବେ ଏହା ମଧ୍ୟ ଏକ ବଡ଼ ସଫଳତା ହେବ ।

ନୀତି ଆୟୋଗ ଉପାଧ୍ୟକ୍ଷ ରାଜୀବ କୁମାର ଏକ ଘରୋଇ ଚ୍ୟାନେଲ ସହ ବାର୍ତ୍ତାଳାପରେ କହିଛନ୍ତି ଯେ, ଆମେ ଲକ୍ ଡାଉନ୍ ଶେଷ କରିବାକୁ ସରକାରଙ୍କ ସହ ଆଲୋଚନା କରୁଛୁ । କେତେକ ରାଜ୍ୟ ଲକ୍ ଡାଉନ୍ ବୃଦ୍ଧି କରିବାକୁ ପରାମର୍ଶ ଦେଇଛନ୍ତି ।

ସେ ଆହୁରି କହିଛନ୍ତି ଯେ, ଭାରତରେ ଏପରି ୪୦୦ଟି ଜିଲ୍ଲା ଅଛି, ଯେଉଁଠାରେ କୋରୋନାର ଗୋଟିଏ ମଧ୍ୟ ମାମଲା ଆସି ନାହିଁ । ଅଧିକାଂଶ ମାମଲା କ୍ଲଷ୍ଟର ଆକାରରେ ସାମ୍ନାକୁ ଆସିଛି । ଦେଶରେ ଏପର୍ଯ୍ୟନ୍ତ ରିପୋର୍ଟ ହୋଇଥିବା ମୋଟ ମାମଲାର ୮୦ ପ୍ରତିଶଚ କେବଳ ୬୨ଟି ଜିଲ୍ଲାରୁ ଆସିଛି । ଏହି ଜିଲ୍ଲାଗୁଡ଼ିକରେ ଲକ୍ ଡାଉନ୍ କରି ଭାଇରସର ବିସ୍ତାରକୁ ରୋକାଯାଉଛି । ବହୁ ସମୟ ଧରି ଏହି ଜିଲ୍ଲାଗୁଡ଼ିକରେ ଲକ୍ ଡାଉନ୍ ରଖାଯିବାର ସମ୍ଭାବନା ରହିଛି ।

ତେଣୁ, ଏହା କୁହାଯାଇପାରେ ଯେ ଯଦି ଲୋକମାନେ ଲକ୍ ଡାଉନ୍ ସଠିକ୍ ଭାବରେ ଅନୁସରଣ କରିବେ, ତେବେ ଭବିଷ୍ୟତରେ ଏହି ୪୦୦ଟି ଜିଲ୍ଲାରେ କୌଣସି ମାମଲା ଆସିବ ନାହିଁ । ଭୂତାଣୁ ବିସ୍ତାରକୁ ରୋକିବା ପାଇଁ ହଟସ୍ପଟ୍ ଭାବରେ ଚିହ୍ନଟ ହୋଇଥିବା ସ୍ଥାନଗୁଡିକରେ ବଡ଼ ଆକାରର ସ୍କ୍ରିନିଂ ଏବଂ ଦ୍ୱାରରୁ ଦ୍ୱାର ସ୍କ୍ରିନିଂ କରାଯାଉଛି ।