ଭଲ ଖବର: କୋରୋନା ମୁକ୍ତ ହେଲେ ଦେଶର ଏହି ରାଜ୍ୟଗୁଡ଼ିକ ସମେତ ୮ଟି କେନ୍ଦ୍ର ଶାସିତ ପ୍ରଦେଶ

ନୂଆଦିଲ୍ଲୀ: ଭାରତରେ କ୍ରମାଗତ କୋରୋନା ଆକ୍ରାନ୍ତଙ୍କ ସଂଖ୍ୟା ବଢ଼ି ବଢ଼ି ଚାଲିଛି । ଅନ୍ୟପକ୍ଷେ ଏହି ସଙ୍କଟ ମଧ୍ୟରେ ଏକ ଭଲ ଖବର ମଧ୍ୟ ମିଳିଛି । ବର୍ତ୍ତମାନ ଦେଶର ୮ଟି ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳ କୋରୋନା ମୁକ୍ତ ହୋଇଛି । ଏହି ୮ଟି ରାଜ୍ୟ ଏବଂ କେନ୍ଦ୍ର ଶାସିତ ପ୍ରଦେଶରେ ବର୍ତ୍ତମାନ କୋରୋନାର କୌଣସି ମାମଲା ନାହିଁ । ଏହି ତାଲିକାରେ ତ୍ରିପୁରା ମଧ୍ୟ ଯୋଡ଼ି ଯାଇଛି । ତ୍ରିପୁରା ବ୍ୟତୀତ ଗୋଆ, ଅରୁଣାଚଳ ପ୍ରଦେଶ, ମଣିପୁର, ନାଗାଲାଣ୍ଡ, ସିକିମ୍, ଦାଦର ଏବଂ ନାଗର ହାଭେଲି ଏବଂ ଲାକ୍ଷାଦୀପ ବର୍ତ୍ତମାନ କୋରୋନା ମୁକ୍ତ ।

ଦେଶରେ କୋରୋନା ସଂକ୍ରମଣ କ୍ରମାଗତ ଭାବେ ବୃଦ୍ଧି ପାଉଥିଲେ ମଧ୍ୟ ଏହି ଭୂତାଣୁ ସଂକ୍ରମିତ ରୋଗୀଙ୍କ ସୁସ୍ଥ ହାର ଏହି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରେ ଭଲ ରହିଛି । ବର୍ତ୍ତମାନ ଯାଏ ଦେଶର ୫ ହଜାର ୯୧୪ କୋରୋନା ଆକ୍ରାନ୍ତ ଆରୋଗ୍ୟ ଲାଭ କରିଛନ୍ତି । ସ୍ୱାସ୍ଥ୍ୟ ମନ୍ତ୍ରଣାଳୟର ତଥ୍ୟ ଅନୁଯାୟୀ ଭାରତରେ ଏହି ଭୂତାଣୁ ସଂକ୍ରମଣରୁ ସୁସ୍ଥ ହେବା ହାର ପ୍ରାୟ ୨୧.୯୦ ପ୍ରତିଶତ ରହିଛି । କୋରୋନା ବିପଦ ମଧ୍ୟରେ ଏହା ଟିକେ ଆଶ୍ୱସ୍ତିକର ଖବର ।

କୋଭିଡ-19 (COVID-19)ର ପ୍ରସାରକୁ ରୋକିବା ପାଇଁ ଦେଶବ୍ୟାପୀ ମେ ୩ ପର୍ଯ୍ୟନ୍ତ ଲକଡାଉନ ଜାରି ରହିଛି । କୋରୋନା ସଙ୍କଟ ମଧ୍ୟରେ ଦ୍ୱିତୀୟ ପର୍ଯ୍ୟାୟରେ ଏପ୍ରିଲ ୧୪ରୁ ଲକଡାଉନ ଆରମ୍ଭ ହୋଇଥିଲା । ଅନ୍ୟପକ୍ଷେ ଆସନ୍ତାକାଲି(ସୋମବାର) ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚତୁର୍ଥ ଥର ପାଇଁ ଭିଡିଓ କନଫରେନ୍ସିଂ ମାଧ୍ୟମରେ ରାଜ୍ୟଗୁଡ଼ିକର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ । ଅନ୍ତତଃ ପକ୍ଷେ ୯ଟି ରାଜ୍ୟର ମୁଖ୍ୟମନ୍ତ୍ରୀ ପ୍ରଧାନମନ୍ତ୍ରୀ ମୋଦୀଙ୍କ ସହ ଭିଡିଓ କନଫରେନ୍ସିଂରେ ଅଂଶଗ୍ରହଣ କରିପାରିବେ ବୋଲି ଆଶା କରାଯାଉଛି । ସକାଳ ୧୦ଟାରୁ ଆରମ୍ଭ ହେଉଥିବା ଭିଡିଓ ସମ୍ମିଳନୀରେ ଲକଡାଉନର ସମୀକ୍ଷା କରାଯିବ ବୋଲି ଅନୁମାନ କରାଯାଉଛି । ଏହା ସହିତ ଲକଡାଉନକୁ କିପରି ସମାପ୍ତ କରାଯିବ ଏବଂ ଏହାର ପ୍ରସ୍ଥାନ ଯୋଜନାକୁ ପର୍ଯ୍ୟାୟକ୍ରମେ କିପରି କାର୍ଯ୍ୟକାରୀ କରାଯିବ ସେ ବିଷୟରେ ମଧ୍ୟ ଆଲୋଚନା କରାଯାଇପାରେ ।