ଦିଲ୍ଲୀରେ ଫସିଥିବା ଲୋକଙ୍କ ପାଇଁ ଅନଲାଇନ୍ ପଞ୍ଜୀକରଣ ଆରମ୍ଭ କଲେ ସରକାର

ନୂଆଦିଲ୍ଲୀ: ସାରା ଦେଶରେ ଲକଡାଉନ୍ ଲାଗୁ ହେବା ପରେ ରେଳ-ବସ୍ ସୁବିଧା ବନ୍ଦ ରହିଛି । କେବଳ ଶ୍ରମିକଙ୍କ ପାଇଁ ସ୍ପେଶାଲ ଟ୍ରେନ ଚଲାଉଛନ୍ତି ସରକାର । ଅନେକ ପ୍ରବାସୀ ଶ୍ରମିକ ଓ ଲୋକ ବିଭିନ୍ନ ରାଜ୍ୟରେ ଫସି ରହିଛନ୍ତି । ଏଭଳି ପରିସ୍ଥିତିରେ ଅନେକ ପ୍ରବାସୀ ଶ୍ରମିକ ପାଦରେ ଚାଲି ଚାଲି ନିଜ ଘରକୁ ଯାଇଛନ୍ତି । ତେବେ ଲକଡାଉନକୁ କୋହଲ କରିବା ପରେ ବିଭିନ୍ନ ରାଜ୍ୟ ସରକାର ପ୍ରବାସୀ ଶ୍ରମିକମାନଙ୍କୁ ନିଜ ଘରକୁ ପଠାଇବା ପାଇଁ ବ୍ୟବସ୍ଥା କରୁଛନ୍ତି ।

ଏହି ସମୟ ମଧ୍ୟରେ ପ୍ରବାସୀ ଶ୍ରମିକ ଓ ଲୋକଙ୍କୁ ନିଜ ଘରକୁ ଫେରାଇ ଆଣିବା ପାଇଁ ରବିବାର ଦିଲ୍ଲୀ ସରକାରଙ୍କ ଦ୍ୱାରା ଅନଲାଇନ୍  ପଞ୍ଜୀକରଣ ସେବା ଆରମ୍ଭ ହୋଇଛି।Https://epass.jantasamvad.org/train/passenger/ ଲିଙ୍କରେ କ୍ଲିକ୍ କରି ଦିଲ୍ଲୀରେ ଫସି ରହିଥିବା ପ୍ରବାସୀ ଶ୍ରମିକ ଓ ଲୋକମାନେ ପଞ୍ଜୀକୃତ କରାଇ ଟ୍ରେନ୍ ଯୋଗେ  ନିଜ ରାଜ୍ୟକୁ ଯାଇପାରିବେ ।

ଦିଲ୍ଲୀର ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ କହିଛନ୍ତି ଯେ, ଦିଲ୍ଲୀ ସରକାର ବର୍ତ୍ତମାନ ପର୍ଯ୍ୟନ୍ତ ଶ୍ରମିକ ସ୍ପେଶାଲ ଟ୍ରେନ ମାଧ୍ୟମରେ ଦିଲ୍ଲୀରେ ଫସି ରହିଥିବା ୩୫,୦୦୦ ପ୍ରବାସୀଙ୍କୁ ସେମାନଙ୍କ ରାଜ୍ୟକୁ ପଠାଇଛନ୍ତି । ଏହା ବ୍ୟତୀତ ଆଜି ୮ଟି ଭିନ୍ନ ଭିନ୍ନ ଟ୍ରେନ୍ ମାଧ୍ୟମରେ ୧୨,୦୦୦ ଲୋକଙ୍କୁ ବିଭିନ୍ନ ରାଜ୍ୟକୁ ପଠାଯିବ ।

ଦିଲ୍ଲୀ ସରକାର ଏପର୍ଯ୍ୟନ୍ତ ବିହାର, ମଧ୍ୟପ୍ରଦେଶ, ଉତ୍ତରପ୍ରଦେଶ ଏବଂ ତାମିଲନାଡୁକୁ ଟ୍ରେନ୍ ପଠାଇଛନ୍ତି । ଅଦ୍ୟାବଧି ଦିଲ୍ଲୀ ସରକାର ପ୍ରବାସୀ ଶ୍ରମିକ କିମ୍ବା ଆଶ୍ରୟ ଗୃହ, ରେନ ବେସେରା କିମ୍ବା ଅନ୍ୟାନ୍ୟ ସରକାରୀ ବ୍ୟବସ୍ଥାରେ ରହୁଥିବା ଲୋକଙ୍କୁ ଶ୍ରମିକ ସ୍ୱତନ୍ତ୍ର ଟ୍ରେନ୍ ମାଧ୍ୟମରେ ସେମାନଙ୍କ ରାଜ୍ୟକୁ ପଠାଉଥିଲେ ।