Harvard University: ବିଦେଶୀ ଛାତ୍ରଛାତ୍ରୀଙ୍କ ପ୍ରବେଶ ନିଷେଧ ନିଷ୍ପତ୍ତିକୁ ଚ୍ୟାଲେଞ୍ଜ କଲା ହାର୍ଭାର୍ଡ, ଟ୍ରମ୍ପ ପ୍ରଶାସନ ବିରୁଦ୍ଧରେ ରୁଜୁ କଲା ମାମଲା

Harvard University: ହାର୍ଭାର୍ଡ ବିଶ୍ୱବିଦ୍ୟାଳୟ ଡୋନାଲ୍ଡ ଟ୍ରମ୍ପ ପ୍ରଶାସନ ବିରୁଦ୍ଧରେ ଏକ ମାମଲା ଦାୟର କରିଛି। ଟ୍ରମ୍ପ ପ୍ରଶାସନ ଏହାର ଏକ ନିଷ୍ପତ୍ତିରେ ହାର୍ଭାର୍ଡକୁ ବିଦେଶୀ ଛାତ୍ରଛାତ୍ରୀଙ୍କୁ ନାମଲେଖା ଉପରେ ପ୍ରତିବନ୍ଧକ ଲଗାଇଛି। ହାର୍ଭାର୍ଡ ଟ୍ରମ୍ପ ପ୍ରଶାସନକୁ କୋର୍ଟକୁ ଟାଣିଛି, ଏହି ନିଷ୍ପତ୍ତିକୁ ଅସାମ୍ବିଧାନିକ ବୋଲି କହିଛି। ଟ୍ରମ୍ପ ପ୍ରଶାସନର ନିଷ୍ପତ୍ତିକୁ ଚ୍ୟାଲେଞ୍ଜ କରି ହାର୍ଭାର୍ଡ ବୋଷ୍ଟନର ଫେଡେରାଲ୍ କୋର୍ଟରେ ଏକ ମାମଲା ଦାୟର କରିଛି। ବିଶ୍ୱବିଦ୍ୟାଳୟ କହିଛି ଯେ ଟ୍ରମ୍ପ ପ୍ରଶାସନ ରାଜନୈତିକ ଚାପ ପ୍ରୟୋଗ କରୁଛି। ଏପରି ପରିସ୍ଥିତିରେ ସରକାରଙ୍କୁ ଏହି ନିଷ୍ପତ୍ତି ନେବାରୁ ରୋକିବା ଉଚିତ।

ହାର୍ଭାର୍ଡ ବିଶ୍ୱବିଦ୍ୟାଳୟ କହିଛି ଯେ ଟ୍ରମ୍ପ ସରକାରଙ୍କ ଏହି କାର୍ଯ୍ୟ ପ୍ରଥମ ସଂଶୋଧନର ଉଲ୍ଲଂଘନ। ଏହା ହାର୍ଭାର୍ଡ ବିଶ୍ୱବିଦ୍ୟାଳୟ ଏବଂ ୭,୦୦୦ ଭିସା ଧାରକଙ୍କ ଉପରେ ପ୍ରତିକୂଳ ପ୍ରଭାବ ପକାଇବ। ବିଶ୍ୱବିଦ୍ୟାଳୟ କହିଛି ଯେ ସରକାର ଏକ ଚତୁର୍ଥାଂଶ ଛାତ୍ରଛାତ୍ରୀଙ୍କ ନାମଲାଖାକୁ ମନା କରିଛନ୍ତି। ଏହି ବିଦେଶୀ ଛାତ୍ରମାନେ ବିଶ୍ୱବିଦ୍ୟାଳୟ ଏବଂ ଏହାର ମିଶନରେ ଗୁରୁତ୍ୱପୂର୍ଣ୍ଣ ଅବଦାନ ରଖନ୍ତି। ଆମେରିକାର ଗୃହ ସୁରକ୍ଷା ବିଭାଗ (DHS)ର ଏହି ପଦକ୍ଷେପକୁ କାର୍ଯ୍ୟକାରୀ ନକରିବା ପାଇଁ ହାର୍ଭାର୍ଡ ବିଶ୍ୱବିଦ୍ୟାଳୟ କୋର୍ଟରୁ ସ୍ଥଗିତାଦେଶ (ଅସ୍ଥାୟୀ ନିଷେଧ) ଆବେଦନ କରିଛି।

ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତିରେ ଟ୍ରମ୍ପ ପ୍ରଶାସନ ହାର୍ଭାର୍ଡ ବିଶ୍ୱବିଦ୍ୟାଳୟର ବିଦେଶୀ ଛାତ୍ରଛାତ୍ରୀଙ୍କ ନାମଲେଖା ଉପରେ ପ୍ରତିବନ୍ଧକ ଲଗାଇଦେଇଛି। ପୂର୍ବରୁ ଥିବା ବିଦେଶୀ ଛାତ୍ରମାନଙ୍କୁ ସ୍ଥାନାନ୍ତର କରିବାକୁ କୁହାଯାଇଛି। ଏପରି ନ କଲେ ଛାତ୍ରଛାତ୍ରୀ ମାନେ ସେମାନଙ୍କର ଆଇନଗତ ସ୍ଥିତି ହରାଇପାରନ୍ତି। ଆମେରିକାର ଗୃହ ସୁରକ୍ଷା ସଚିବ କ୍ରିଷ୍ଟି ନୋଏମ ସୋସିଆଲ ମିଡିଆ ପ୍ଲାଟଫର୍ମ X ରେ ଲେଖିଛନ୍ତି ଯେ ଆଇନ ପାଳନ କରିବାରେ ବିଫଳତା ଯୋଗୁଁ ପ୍ରଶାସନ ହାର୍ଭାର୍ଡର ଅନ୍ତର୍ଜାତୀୟ ଛାତ୍ରଛାତ୍ରୀ ପ୍ରବେଶ କାର୍ଯ୍ୟକ୍ରମକୁ ବାତିଲ କରିଛି।

ଡିଏଚଏସ ନିଜ ବୟାନରେ କହିଛି ଯେ ହାର୍ଭାର୍ଡ ବିଦେଶୀ ଛାତ୍ରଛାତ୍ରୀ ମାନଙ୍କୁ ନାମ ଲେଖାଇ ପାରିବ ନାହିଁ। ପୂର୍ବରୁ ଥିବା ବିଦେଶୀ ଛାତ୍ରଛାତ୍ରୀମାନଙ୍କୁ ସ୍ଥାନାନ୍ତର କରିବାକୁ ପଡିବ। ନଚେତ୍ ସେମାନଙ୍କର ଆଇନଗତ ସ୍ଥିତି ହରାଇବାକୁ ପଡିବ। ହାର୍ଭାର୍ଡ ବିଶ୍ୱବିଦ୍ୟାଳୟର ତଥ୍ୟ ଅନୁଯାୟୀ ଗତ ଶିକ୍ଷାବର୍ଷରେ ପ୍ରାୟ ୭,୦୦୦ ଆନ୍ତର୍ଜାତୀୟ ଛାତ୍ର ପ୍ରବେଶ କରିଥିଲେ। ଏହା ମୋଟ ଛାତ୍ରଛାତ୍ରୀ ସଂଖ୍ୟାର ୨୭ ପ୍ରତିଶତ। ଏପରି ପରିସ୍ଥିତିରେ ଟ୍ରମ୍ପ ପ୍ରଶାସନର ନିଷ୍ପତ୍ତି ଯୋଗୁଁ ଭାରତ ସମେତ ବିଶ୍ୱର ଛାତ୍ରଛାତ୍ରୀମାନଙ୍କୁ ସମସ୍ୟାର ସମ୍ମୁଖୀନ ହେବାକୁ ପଡିବ ବୋଲି ସ୍ପଷ୍ଟ।