 "Delhi Rain: ଦିଲ୍ଲୀରେ ପ୍ରବଳ ଝଡ଼ ଏବଂ ବର୍ଷା, ଭାଙ୍ଗିଲା ଗଛ, ଗୋଟିଏ ପରିବାରର ୪ ସଦସ୍ୟ ମୃତ")
)
Delhi Rain: ଶୁକ୍ରବାର ସକାଳ ସମୟରେ ଦିଲ୍ଲୀ-ଏନସିଆରରେ ପ୍ରବଳ ଝଡ ବର୍ଷା ହୋଇଛି। ବର୍ଷା ସହିତ ପ୍ରବଳ ପବନ କାରଣରୁ ଜନଜୀବନ ବାଧାପ୍ରାପ୍ତ ହୋଇଛି । ବର୍ଷା କାରଣରୁ ତାପମାତ୍ରାରେ ହ୍ରାସ ଘଟିଛି । ଅନେକ ରାସ୍ତାରେ ପାଣି ଜମି ରହିବା କାରଣରୁ ସମସ୍ୟା ବଢିଛି । ବର୍ଷା ଏବଂ ଝଡ କାରଣରୁ ଗୋଟିଏ ପରିବାରର ୪ ସଦସ୍ୟଙ୍କ ମୃତ୍ୟୁ ହୋଇଛି ।
ପ୍ରବଳ ବର୍ଷା ସହ ପବନ କାରଣରୁ ନଜଫଗଡ଼ ଅଞ୍ଚଳର ଥିବା ଏକ ଘରେ ଉପରେ ଏକ ଗଛ ଭାଙ୍ଗି ପଡ଼ିଯାଇଥିଲା । ଫଳରେ ଚାରି ଜଣଙ୍କର ମୃତ୍ୟୁ ହୋଇଛି। ଏହି ଦୁର୍ଘଟଣାରେ ଜଣେ ମହିଳାଙ୍କ ସମେତ ତିନି ଜଣ ପିଲା ଚାପି ହୋଇ ମୃତ୍ୟୁବରଣ କରିଛନ୍ତି। ମୃତ ମହିଳାଙ୍କ ବୟସ ୨୬ ବର୍ଷ ଏବଂ ତାଙ୍କ ନାମ ଜ୍ୟୋତି ବୋଲି ସୂଚନା ମିଳିଛି । ମହିଳାଜଣକ ତାଙ୍କର ତିନି ପିଲାଙ୍କ ସମେତ ଉକ୍ତ ଘରେ ଥିଲେ । ମହିଳାଙ୍କ ସ୍ୱାମୀ ଅଜୟ ସାମାନ୍ୟ ଆଘାତ ପାଇଥିବା ଜଣାପଡିଛି । ଦିଲ୍ଲୀ-ଏନସିଆରରେ ବର୍ଷା କାରଣରୁ ଅନେକ ଖାଲୁଆ ସ୍ଥାନରେ ପାଣି ଜମି ରହିଛି । ଅନେକ ଅଞ୍ଚଳରେ ପାଣି ଜମି ରହିବା ଯୋଗୁଁ ଯାନବାହାନର ଗତି ହ୍ରାସ ପାଇଛି। ବର୍ଷା କାରଣରୁ ରେଳ ଷ୍ଟେଶନ ଏବଂ ଏୟାରପୋର୍ଟକୁ ଯାଉଥିବା ଯାତ୍ରୀମାନେ ମଧ୍ୟ ଅଧିକ ପ୍ରଭାବିତ ହୋଇଛନ୍ତି ।
ଅନ୍ୟପଟେ ପାଣିପାଗ ବିଭାଗ ପକ୍ଷରୁ ଦିଲ୍ଲୀ ପାଇଁ ତିନି ଦିନ ପର୍ଯ୍ୟନ୍ତ ବର୍ଷା ଜନିତ ସତର୍କତା ଜାରି କରାଯାଇଛି । ଏହା ସହିତ ୭୦ କିଲୋମିଟର ବେଗରେ ପବନ ବହିବାର ସମ୍ଭାବନା ମଧ୍ୟ ରହିଛି । ଏହି କାରଣରୁ ଜନସାଧାରଣଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି। ଦିଲ୍ଲୀ ସହିତ, ଉତ୍ତର ପ୍ରଦେଶ, ହରିୟାଣା ଏବଂ ପଞ୍ଜାବର ଅନେକ ଅଞ୍ଚଳରେ ମଧ୍ୟ ପ୍ରବଳ ବର୍ଷା ହୋଇଥିବା ରିପୋର୍ଟ ଆସିଛି ।
