ଏହି ମାମଲାରେ ରାଜସ୍ଥାନ ମୁଖ୍ୟ ଶାସନ ସଚିବଙ୍କୁ ରିପୋର୍ଟ ମାଗିଲା କେନ୍ଦ୍ର ଗୃହ ମନ୍ତ୍ରାଳୟ

ନୂଆଦିଲ୍ଲୀ: ରାଜସ୍ଥାନ କଂଗ୍ରେସ ଭିତରେ ଚାଲିଥିବା ଅନ୍ତଃକନ୍ଦଳ ଏବେ ସମଗ୍ର ଦେଶର ଫୋକସରେ ରହିଛି । ଗେହଲଟ ସରକାରଙ୍କୁ ଭାଙ୍ଗିବାକୁ ଉଦ୍ୟମ ନେଇ କଥିତଭାବେ ଦୁଇ ଅଡିଓ ଟେପ୍ ଭାଇରାଲ ହୋଇଥିଲା । ତେବେ ଏନେଇ Phone tapping ଅଭିଯୋଗ ସମ୍ପର୍କରେ ରିପୋର୍ଟ ମାଗିଛନ୍ତି କେନ୍ଦ୍ର ସରକାର । ଜଣେ ଅଧିକାରୀଙ୍କ ସୂଚନା ଅନୁସାରେ, ରାଜସ୍ଥାନ ମୁଖ୍ୟ ଶାସନ ସଚିବଙ୍କୁ ଏହି ରିପୋର୍ଟ ମଗାଯାଇଛି । Phone tapping ଅଭିଯୋଗ ନେଇ ସବିଶେଷ ରିପୋର୍ଟ ଦେବାକୁ କହିଛି କେନ୍ଦ୍ର ଗୃହ ମନ୍ତ୍ରାଳୟ । 

ରାଜସ୍ଥାନ ପୋଲିସର ଭ୍ରଷ୍ଟାଚାରୀ ନିରୋଧୀ ବ୍ୟୁରୋ(ଏସିବି) ଉଭୟ ଅଡିଓ କ୍ଲିପ ମାମଲାରେ ଭ୍ରଷ୍ଟାଚାର ନିରୋଧୀ ଆଇନ ଅନୁଯାୟୀ ମାମଲା ରୁଜୁ କରିଛି । ଉଭୟ କ୍ଲିପରେ ଗେହଲଟ ସରକାରଙ୍କୁ ଭାଙ୍ଗିବାକୁ ଷଡ଼ଯନ୍ତ୍ର ନେଇ କଥାବାର୍ତ୍ତା ହୋଇଥିବା ଦେଖିବାକୁ ମିଳିଛି । ତେବେ ଭାରତୀୟ ଜନତା ପାର୍ଟି ଏହି କ୍ଲିପର ତଦନ୍ତ ସିବିଆଇକୁ ଦେବାକୁ ଦାବି କରିଛି । ଦଳର ଅଭିଯୋଗ ଏହା ଯେ, ରାଜସ୍ଥାନ ସରକାର ଲୋକଙ୍କ ଫୋନକୁ tapping କରୁଛନ୍ତି । 

ରାଜସ୍ଥାନ ଏସିବିର ମହାନିର୍ଦ୍ଦେଶକ ଆଲୋକ ତ୍ରିପାଠୀ କହିଛନ୍ତି, ତଦନ୍ତକାରୀ ସଂସ୍ଥା କଂଗ୍ରେସର ମୁଖ୍ୟ ସଚେତକ ମହେଶ ଜୋଶୀଙ୍କ ଅଭିଯୋଗ ଆଧାରରେ ପ୍ରାଥମିକ ତଦନ୍ତ କରିଛି । ବିଦ୍ରୋହୀ ବିଧାୟକ ଭମ୍ବରଲାଲ ଶର୍ମା ଓ ଗଜେନ୍ଦ୍ର ସିଂହ ଏବଂ ଅନ୍ୟ ଜଣେ ବ୍ୟକ୍ତି ସଞ୍ଜୟ ଜୈନଙ୍କ ମଧ୍ୟରେ ବାର୍ତ୍ତାଳାପ ଥିବା ଅଡିଓ କ୍ଲିପରେ ଶୁଣାଯାଉଛି । ସେପଟେ କଂଗ୍ରେସର ଦାବି ଏହା ଯେ, ଅଡିଓ କ୍ଲିପରେ ଯେଉଁ ଗଜେନ୍ଦ୍ର ସିଂହଙ୍କ ନାମ ରହିଛି, ତାହା କେନ୍ଦ୍ରମନ୍ତ୍ରୀ ଗଜେନ୍ଦ୍ର ସିଂହ ଶେଖାୱତ ।