ମୁମ୍ୱାଇରେ ୨୦ ହଜାର ଟପିଲା କୋରୋନା ଆକ୍ରାନ୍ତଙ୍କ ସଂଖ୍ୟା

ମୁମ୍ବାଇ: କୋରୋନା ଭାଇରସ ଦେଶରେ ଆତଙ୍କ ସୃଷ୍ଟି କରୁଛି । ଭାରତରେ କୋରୋନାରେ ୯୦ ହଜାରରୁ ଅଧିକ ଲୋକ ସଂକ୍ରମିତ ହୋଇଥିବାବେଳେ ଏପର୍ଯ୍ୟନ୍ତ ୨,୮୦୦ରୁ ଅଧିକ ଲୋକ ପ୍ରାଣ ହରାଇଛନ୍ତି । ଏହି ସମୟରେ ସବୁଠାରୁ ଅଧିକ ପ୍ରଭାବିତ ରାଜ୍ୟ ମହାରାଷ୍ଟ୍ରରେ କୋରୋନା ସଂକ୍ରମିତଙ୍କ ସଂଖ୍ୟା ୩୩ ହଜାରରେ ପହଞ୍ଚିଛି । ରବିବାର ମହାରାଷ୍ଟ୍ରରେ କୋରୋନା ପଜିଟିଭ ମାମଲାରେ ରେକର୍ଡ ବୃଦ୍ଧି ଦେଖାଦେଇଛି । ଆଜି ମହାରାଷ୍ଟ୍ରରେ ୨୩୪୭ଟି ନୂଆ କୋରୋନା ପଜିଟିଭ ମାମଲା ଚିହ୍ନଟ ହୋଇଛି । ଫଳରେ ରାଜ୍ୟରେ ସଂକ୍ରମିତଙ୍କ ସଂଖ୍ୟା ୩୩,୦୫୩ରେ ପହଞ୍ଚିଛି । ମହାରାଷ୍ଟ୍ରରେ ଗୋଟିଏ ଦିନରେ ଏହା କୋରୋନା ରୋଗର ସର୍ବୋଚ୍ଚ ମାମଲା ଥିଲା । ଆଜି ରାଜ୍ୟରେ ୬୩ ଜଣଙ୍କ ମୃତ୍ୟୁ ଘଟିଛି । ଫଳରେ ରାଜ୍ୟରେ କୋରୋନା ଆକ୍ରାନ୍ତଙ୍କ ମୃତ୍ୟୁ ସଂଖ୍ୟା ୧୧୯୮ରେ ପହଞ୍ଚିଛି ।

ଏଥି ସହିତ ମୁମ୍ବାଇରେ କୋରୋନା ସଂକ୍ରମିତଙ୍କ ସଂଖ୍ୟା ୨୦ ହଜାରରୁ ଅଧିକ ରହିଛି । ବର୍ତ୍ତମାନ ମୁମ୍ବାଇରେ ୨୦୧୫୦ ସଂକ୍ରମିତ ରୋଗୀ ଥିବାବେଳେ ଏଠାରେ ୭୩୪ ଜଣ ପ୍ରାଣ ହରାଇଛନ୍ତି । ଆଜି ମୁମ୍ବାଇରେ ୧୫୯୫ଟି ନୂଆ ମାମଲା ଚିହ୍ନଟ ହୋଇଥିଲା । ଏହାସହ ୩୮ ଜଣ କୋରୋନା ଆକ୍ରାନ୍ତଙ୍କ ମୃତ୍ୟୁ ହୋଇଥିଲା । ଏହା ବ୍ୟତୀ ମହାରାଷ୍ଟ୍ରରେ ଏପର୍ଯ୍ୟନ୍ତ ୭୬୮୮ କୋରୋନା ଆକ୍ରାନ୍ତ ଆରୋଗ୍ୟ ଲାଭ କରିଛନ୍ତି ।

ଏଠାରେ କହି ରଖୁଛୁ ଯେ, କୋରୋନା ସଙ୍କଟକୁ ଦୃଷ୍ଟିରେ ରଖି ଦେଶରେ ମେ ୩୧ ପର୍ଯ୍ୟନ୍ତ ଲକଡାଉନ୍ ବୃଦ୍ଧି କରାଯାଇଛି । ଗୃହ ମନ୍ତ୍ରଣାଳୟ ଦ୍ୱାରା ଲକଡାଉନ୍-4 ଘୋଷଣା ପୂର୍ବରୁ ମହାରାଷ୍ଟ୍ର ଓ ତାମିଲନାଡୁ ସରକାର ଏହି ରାଜ୍ୟରେ ଲକଡାଉନ୍ ଅବଧି  ମେ ୩୧ ପର୍ଯ୍ୟନ୍ତ ବଢ଼ାଇ ଦେଇଥିଲେ । ଜଣେ ଅଧିକାରୀ କହିଛନ୍ତି ଯେ, ମହାରାଷ୍ଟ୍ରର ମୁଖ୍ୟ ଶାସନ ସଚିବ ଅଜୟ ମେହେଟ୍ଟା ଲକଡାଉନ୍ ଅବଧିକୁ ବୃଦ୍ଧି କରିବାକୁ ନିର୍ଦ୍ଦେଶ ଦେଇଛନ୍ତି । ଏହି ଆଦେଶରେ କୁହାଯାଇଛି, 'ଲକଡାଉନରେ ଥିବା ରିହାତିଗୁଡିକ ପର୍ଯ୍ୟାୟକ୍ରମେ ସୂଚିତ କରାଯିବ ।'