 "ଭାରତକୁ ମିଳିଲା ତୃତୀୟ ବ୍ରହ୍ମାଣ୍ଡ ସୁନ୍ଦରୀ; ବିଶ୍ୱରେ ଚମକିଲେ Harnaaz Kaur Sandhu, ଟାଇଟଲ୍ ପୂର୍ବରୁ ଫିଲ୍ମ ଅଫର")
ନୂଆଦିଲ୍ଲୀ: ଦେଶ ପାଇଁ ପୁଣି ଥରେ ଗର୍ବର ମୁହୂର୍ତ୍ତ ଆସିଛି। ଭାରତର ହର୍ନାଜ୍ କୌର ସାନ୍ଧୁ (Harnaaz Kaur Sandhu) ମିସ୍ ୟୁନିଭର୍ସ ହୋଇଛନ୍ତି। ଦୀର୍ଘ ୨୧ ବର୍ଷ ପରେ ଭାରତ ମିସ୍ ୟୁନିଭର୍ସ ଟାଇଟଲ୍ ଜିତିଛି। ଶେଷ ଥର ପାଇଁ ୨୦୦୦ ମସିହାରେ ଲାରା ଦତ୍ତା ମିସ୍ ୟୁନିଭର୍ସ ହୋଇଥିଲେ।
୨୧ ବର୍ଷ ବୟସ୍କା ହର୍ନାଜ୍ କୌର ସାନ୍ଧୁ, ଫିଟନେସ୍ ଏବଂ ଯୋଗକୁ ଭଲ ପାଆନ୍ତି। ସେ ଛୋଟବେଳୁ ସୌନ୍ଦର୍ଯ୍ୟ ପ୍ରତିଯୋଗିତାରେ ଭାଗ ନେବା ଆରମ୍ଭ କରିଥିଲେ। ହର୍ନାଜ୍ ୨୦୧୭ ମସିହାରେ ମିସ୍ ଚଣ୍ଡିଗଡ଼ର ଆଖ୍ୟା ପାଇଥିଲେ। ଗୋଟିଏ ବର୍ଷ ପରେ ହର୍ନାଜ୍ ମିସ୍ ମ୍ୟାକ୍ସ ଏମର୍ଜିଂ ଷ୍ଟାର ଇଣ୍ଡିଆ ୨୦୧୮ର ମୁକୁଟ ମଧ୍ୟ ପାଇଛନ୍ତି। ଏହି ଦୁଇଟି ସମ୍ମାନଜନକ ଟାଇଟଲ୍ ଜିତିବା ପରେ ହର୍ନାଜ୍ ମିସ୍ ଇଣ୍ଡିଆ ୨୦୧୯ରେ ଅଂଶଗ୍ରହଣ କରିଥିଲେ, ଯେଉଁଥିରେ ସେ ଏହାକୁ ଶ୍ରେଷ୍ଠ ୧୨ରେ ପହଞ୍ଚାଇବାରେ ସଫଳ ହୋଇଥିଲେ।
୨୦୧୮ ମସିହାରେ, ହର୍ନାଜ୍, ମିସ୍ ଇଣ୍ଡିଆ ପଞ୍ଜାବର ଟାଇଟଲ୍ ଜିତିବା ପରେ ଦି ଲ୍ୟାଣ୍ଡର୍ସ ମ୍ୟୁଜିକ୍ ଭିଡିଓ ଟେରାଟାଲିରେ ମଧ୍ୟ କାର୍ଯ୍ୟ କରିଥିଲେ। ଏହା ପରେ, ଚଳିତ ବର୍ଷ ସେପ୍ଟେମ୍ବରରେ ସେ ମିସ୍ ଡିଭା ୟୁନିଭର୍ସ ଇଣ୍ଡିଆ ୨୦୨୧ ଟାଇଟଲ୍ ଜିତିଥିଲେ। ଏହି ମୁକୁଟଟି ଅଭିନେତ୍ରୀ କ୍ରିତି ସାନନ୍ ନିଜେ ପିନ୍ଧାଇଥିଲେ।
ବ୍ରହ୍ମଣ୍ଡ ସୁନ୍ଦରୀ ୨୦୨୧ ପ୍ରତିଯୋଗିତାର ପ୍ରାଥମିକ ପର୍ଯ୍ୟାୟରେ ୭୫ରୁ ଅଧିକ ପ୍ରତିଯୋଗୀ ଅଂଶଗ୍ରହଣ କରିଥିଲେ। ହର୍ନାଜ୍ କୌର ସାନ୍ଧୁ- ମିସ୍ ସ୍ୱିଡେନ, ମିସ୍ ଥାଇଲ୍ୟାଣ୍ଡ, ମିସ୍ ୟୁକ୍ରେନ, ମିସ୍ ୟୁଏସ୍, ମିସ୍ ଭେନେଜୁଏଲା, ମିସ୍ କାମେରୁନ୍, ମିସ୍ ବ୍ରାଜିଲ୍, ମିସ୍ ବ୍ରିଟିଶ୍ ଭର୍ଜିନ ଦ୍ୱୀପ ସମେତ ଅନେକ ସୁନ୍ଦରୀଙ୍କୁ ପରାସ୍ତ କରି ବ୍ରହ୍ମଣ୍ଡ ସୁନ୍ଦରୀ ଟାଇଟଲ ଜିତିଛନ୍ତି। ମିସ୍ ୟୁନିଭର୍ସ ୨୦୨୧ର ଜାତୀୟ ପୋଷାକ ଅଧିବେଶନରୁ ସ୍ୱିମ୍ସୁଟ ପର୍ଯ୍ୟନ୍ତ ହର୍ନାଜ୍ ନିଜର ସୌନ୍ଦର୍ଯ୍ୟରେ ଜର୍ଜ୍ସଙ୍କୁ ପ୍ରଭାବିତ କରିଥିଲେ। ସେ ଜାତୀୟ ପୋଷାକ ଅଧିବେଶନରେ ଗୋଲାପୀ ରଙ୍ଗର ଲେହେଙ୍ଗା ପିନ୍ଧିଥିଲେ। ଏହା ସହିତ, ତାଙ୍କ ହାତରେ ଏକ ସମାନ ରଙ୍ଗର ଛତା ମଧ୍ୟ ଦେଖିବାକୁ ମିଳିଥିଲା। ତାଙ୍କର ପାରମ୍ପାରିକ ପୋଷାକରେ ଭାରତୀୟ ରାଣୀଙ୍କ ରାଜକୀୟ ଚେହେରା ଦେଖାଯାଉଥିଲା।
ମିସ୍ ୟୁନିଭର୍ସ ୨୦୨୧ର ଅଂଶ ହେବା ପୂର୍ବରୁ ମଧ୍ୟ ହର୍ନାଜ କୌର ସାନ୍ଧୁ ଚଳଚ୍ଚିତ୍ରରେ ତାଙ୍କର ସ୍ଥାନ ନିଶ୍ଚିତ କରିଛନ୍ତି। ଆସନ୍ତା ବର୍ଷ ରିଲିଜ୍ ହେବାକୁ ଥିବା ଦୁଇଟି ପଞ୍ଜାବୀ ଚଳଚ୍ଚିତ୍ର 'Bai Ji Kuttange' ଏବଂ 'Yaara Diyan Poo Baran'ରେ ତାଙ୍କୁ ଦେଖିବାକୁ ମିଳିବ। ଭାରତ ତିନିଥର ମିସ୍ ୟୁନିଭର୍ସ ଟାଇଟଲ ଜିତିଛି। ହର୍ନାଜଙ୍କ ପୂର୍ବରୁ ୧୯୯୪ରେ ସୁସ୍ମିତା ସେନ୍ ଏବଂ ୨୦୦୦ରେ ଲାରା ଦତ୍ତା ଏହି ମୁକୁଟ ଜିତିଥିଲେ। ଏଭଳି ପରିସ୍ଥିତିରେ ଏବେ ହର୍ନାଜଙ୍କୁ ତୃତୀୟ ଥର ପାଇଁ ଭାରତକୁ ଏହି ବିଜୟ ଦେଇଛନ୍ତି।
)