ଟପ୍-୩ ଆଉ ବେଶି ଦୂର ନୁହେଁ, ଋଷର ନିକଟତର ହେଲା ଭାରତ

ନୂଆଦିଲ୍ଲୀ: କୋରୋନା ଆକ୍ରାନ୍ତଙ୍କ ସଂଖ୍ୟାରେ ଖୁବଶୀଘ୍ର ଋଷକୁ ଅତିକ୍ରମ କରିପାରେ ଭାରତ । ଏବେ ଭାରତ ଟପ-୪ରେ ରହିଥିବା ବେଳେ ଋଷ ଟପ-୩ରେ ରହିଛି । ଏବେ ଆମେ ଋଷର ପୁରା ନିକଟତର ହେଲେଣି । ବର୍ତ୍ତମାନର ଗ୍ରାଫ ଦେଖିଲେ ଏହା ସ୍ପଷ୍ଟ ଯେ, ଆସନ୍ତାକାଲି ଆକ୍ରାନ୍ତଙ୍କ ସଂଖ୍ୟାରେ ଋଷକୁ ଆମ ଦେଶ ଅତିକ୍ରମ କରିବାକୁ ଯାଉଛି । ୬ ଲକ୍ଷ ୭୪ ହଜାରରୁ ଉର୍ଦ୍ଧ୍ୱ ଆକ୍ରାନ୍ତ ଋଷରେ ଚିହ୍ନଟ ହୋଇଥିବା ବେଳେ ଭାରତରେ ଏହି ସଂଖ୍ୟା ୬ ଲକ୍ଷ ୭୩ ହଜାରରୁ ଉର୍ଦ୍ଧ୍ୱ ରହିଛି । 

ଗତ ୨୪ ଘଣ୍ଟା ମଧ୍ୟରେ ଭାରତରେ ରେକର୍ଡ ସଂଖ୍ୟାକ ଆକ୍ରାନ୍ତ ଚିହ୍ନଟ ହୋଇଛନ୍ତି । ପ୍ରଥମଥର ପାଇଁ ଦିନକରେ ୨୪ ହଜାର ୮୫୦ ମାମଲା ସାମ୍ନାକୁ ଆସିଛି । ସେହିପରି ୬୧୩ ଜଣଙ୍କ ମୃତ୍ୟୁ ହୋଇଛି । ଆଉ ଏହାକୁ ମିଶାଇ ଦେଶରେ ଏପର୍ଯ୍ୟନ୍ତ ୬ଲକ୍ଷ ୭୩ ହଜାର ୧୬୫ ମାମଲା ସାମ୍ନାକୁ ଆସିଲାଣି । ସେହିପରି ୧୯ ହଜାର ୨୬୮ ଜଣଙ୍କ ମୃତ୍ୟୁ ମଧ୍ୟ ହେଲାଣି । କେନ୍ଦ୍ର ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏନେଇ ସୂଚନା ମିଳିଛି । 

India reports the highest single-day spike of 24,850 new COVID19 cases and 613 deaths in the last 24 hours. Positive cases stand at 6,73,165 including 2,44,814 active cases, 4,09,083 cured/discharged/migrated & 19,268 deaths: Ministry of Health & Family Welfare pic.twitter.com/I2UAKS1zlv

— ANI (@ANI) July 5, 2020

ତେବେ ଆଶ୍ୱସ୍ତିକର ଖବର ଏହା ଯେ, ଆକ୍ରାନ୍ତଙ୍କ ମଧ୍ୟରୁ ୪ ଲକ୍ଷ ୯ ହଜାର ୮୩ ଜଣ ସୁସ୍ଥ ହେଲେଣି । ଏବେ ୨ ଲକ୍ଷ ୪୪ ହଜାର ୮୧୪ ଆକ୍ଟିଭ କେସ ରହିଛି । କିନ୍ତୁ ବର୍ତ୍ତମାନ ଯେଉଁ ଗତିରେ କୋରୋନା ଆକ୍ରାନ୍ତଙ୍କ ସଂଖ୍ୟା ବଢ଼ୁଛି, ଆଗକୁ ସ୍ଥିତି ଗମ୍ଭୀର ହୋଇପାରେ ।