ନୌସେନାର କମାଲ, କୋରୋନା ମୁକାବିଲା ପାଇଁ ହଜାର ଟଙ୍କାରେ ତିଆରି କଲା ଏହି ମେସିନ

ନୂଆଦିଲ୍ଲୀ: କୋରୋନା ମୁକାବିଲା ମୈଦାନରେ ଓହ୍ଲାଇଛି ଭାରତୀୟ ସେନା । ବର୍ତ୍ତମାନ ଭାରତୀୟ ନୌସେନା କୋରୋନା ଭୂତାଣୁ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ ଜ୍ୱର ପରୀକ୍ଷା ପାଇଁ ଏକ ନୂତନ ତାପମାତ୍ରା ସେନ୍ସର ମେସିନ୍ ପ୍ରସ୍ତୁତ କରିଛି, ଯାହା ଅତ୍ୟନ୍ତ ଶସ୍ତା । ମୁମ୍ବାଇ ଡକୟାର୍ଡ ଏହି ଉପଲବ୍ଧ ହାସଲ କରିଛି । ଡକୟାର୍ଡ ନିଜର କିଛି ଉପକରଣ ସାହାଯ୍ୟରେ ଏହି ଗନକୁ ତିଆରି କରିଛି ।  ଏହି ଯନ୍ତ୍ର କୌଣସି ବ୍ୟକ୍ତିଙ୍କୁ ସ୍ପର୍ଶ ନକରି ଶରୀରର ତାପମାତ୍ରା ମାପି ଥାଏ । ଏହାର ମୂଲ୍ୟ ମାତ୍ର 1000 ଟଙ୍କା ହେବ । 

ଏହାର କମ୍ ମୂଲ୍ୟ ହେତୁ ବର୍ତ୍ତମାନ ସାଧାରଣ ଲୋକମାନେ ଏହାକୁ ସହଜରେ କିଣି ପାରିବେ । କାରଣ ବଜାରରେ ଉପସ୍ଥିତ ଥର୍ମାଲ ଗନର ମୂଲ୍ୟ ବହୁତ ଅଧିକ ରହିଛି । ଏଭଳି ପରିସ୍ଥିତିରେ ବର୍ତ୍ତମାନ ଲୋକମାନେ ପ୍ରାରମ୍ଭିକ ଅନୁସନ୍ଧାନରେ ବହୁତ ସାହାଯ୍ୟ ପାଇବେ । ଭାରତୀୟ ନୈସେନା ଦ୍ୱାରା ନିର୍ମିତ ଏହି ଥର୍ମଲ ଗନ ଶରୀରର ତାପମାତ୍ରାକୁ 0.02 ଡିଗ୍ରୀ ସେଲସିୟସ ପର୍ଯ୍ୟନ୍ତ ସଠିକ୍ ଭାବରେ ମାପିବାରେ ସକ୍ଷମ । ଏଥିରେ ଏକ ଇନଫ୍ରାଡ୍ ସେନ୍ସର ଏବଂ ଏକ ଏଲଇଡି ଡିସପ୍ଲେ ଅଛି ଯାହା ଏକ ମାଇକ୍ରୋ କଣ୍ଟ୍ରୋଲର୍ ସହିତ ସଂଯୁକ୍ତ । ଏହା 9 ଭୋଲ୍ଟେଜ୍ କ୍ଷମତା ବିଶିଷ୍ଟ ବ୍ୟାଟେରୀରେ ଚାଲିଥାଏ ।

ବାସ୍ତବରେ, ନାଭାଲ୍ ମୁମ୍ବାଇ ସ୍ଥିତ ଡାକୟାର୍ଡ ନିଜର ଏଣ୍ଟି ପ୍ବାଇଣ୍ଟରେ ବଡ଼ ସଂଖ୍ୟାରେ କର୍ମିଙ୍କ ସ୍କ୍ରିନିଂ ପାଇଁ ଏହି ଥର୍ମଲ ଗନ୍ ଡିଜାଇନ କରିଛି । ଯାହାଫଳରେ ସୁରକ୍ଷା ଯାଞ୍ଚ କାର୍ଯ୍ୟକଳାପ ଉପରେ ଚାପ କମ ହେବ । ଭାରତୀୟ ନୌସେନା କହିଛି ଯେ ଆବଶ୍ୟକ ହେଲେ ଏହି ଥର୍ମାଲ ଗନ ବହୁ ସଂଖ୍ୟାରେ ଡାକୟାର୍ଡରେ ତିଆରି କରାଯାଇପାରିବ । ଏଥିପାଇଁ ଆବଶ୍ୟକ ସମ୍ବଳ ସଂଗ୍ରହ କରିବାର କାର୍ଯ୍ୟ ଚାଲିଛି ।