ସୀମାରେ ଯୁଦ୍ଧ ପରିସ୍ଥିତି, ରାଜନାଥ ଡାକିଲେ ଗୁରୁତ୍ତ୍ୱପୂର୍ଣ୍ଣ ବୈଠକ

ନୂଆଦିଲ୍ଲୀ: ସୀମାରେ ପରିସ୍ଥିତି ଅତ୍ୟନ୍ତ ଜଟିଳ। ଯୁଦ୍ଧ ଭଳି ପରିସ୍ଥିତି ସୃଷ୍ଟି ହୋଇଛି। ସେପଟେ ଭାରତ ଓ ଚୀନ ମଧ୍ୟରେ ସମ୍ପର୍କରେ ତିକ୍ତତା ଦିନକୁ ଦିନ ଗାଢ ହେବାରେ ଲାଗିଛି। ପରିସ୍ଥିତି ଏଭଳି ସୃଷ୍ଟି ହୋଇଛି ଯେ, କୌଣସି ପରିସ୍ଥିତିରେ ସୀମାରେ ଯୁଦ୍ଧର ରୂପ ନେଇ ପାରେ ବର୍ତ୍ତମାନର ସ୍ଥିତି। ଏଭଳି ପରିସ୍ଥିତିକୁ ଦୃଷ୍ଟିରେ ରଖି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଆଜି ଏକ ଗୁରୁତ୍ୱପୂର୍ଣ୍ଣ ବୈଠକ ଡକାଇଛନ୍ତି। ଏହି ବୈଠକ ଆଜି ଦିନ ପ୍ରାୟ ୧୧ଟା ବେଳେ ଅନୁଷ୍ଠିତ ହେବ। 

ତେବେ ଏହି ବୈଠକରେ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାର, ଦେଶର ପ୍ରଥମ ସିଡ଼ିଏସ ଜେନେରାଲ ବିପିନ ରାଓ୍ୱତ ଓ ତିନି ସେନାର ମୁଖ୍ୟ ରହିବେ ବୋଲି ସୂଚନା ରହିଛି। ଏହି ବୈଠକରେ ଚୀନ ସହିତ ଦେଖାଦେଇଥିବା ସୀମା ବିବାଦ ଓ ସୀମାରେ ସେନାଙ୍କ ପଦକ୍ଷେପ ଉପରେ ଆଲୋଚନା ହେବ। ତେବେ ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ମୁତାବକ ସୀମା ସୁରକ୍ଷା ପାଇଁ ସ୍ୱତନ୍ତ୍ର ରଣକୌଶଳ କରାଯିବ। ଏହା ସହିତ ଲଦାଖରେ ପ୍ରତି ମୁହୁର୍ତ୍ତରେ ବଦଳୁଥିବା ପରିସ୍ଥିତି ଉପରେ ତିନି ସେନାଙ୍କ ମତାମତ ମଧ୍ୟ ଲୋଡ଼ାଯିବ। ବୈଠକରେ ଚୀନ ପକ୍ଷରୁ ନିଆଯାଉଥିବା ପଦକ୍ଷେପ ଉପରେ କିପରି ପ୍ରତିବନ୍ଧକ ଲଗାଯାଇପାରିବ ସେ ନେଇ ମଧ୍ୟ ଆଲୋଚନା କରାଯିବାର ସମ୍ଭାବନା ରହିଛି। 

ସୂଚନାଯୋଗ୍ୟ ଚୀନର ପ୍ରତି ଚାଲ ଉପରେ ଭାରତୀୟ ସେନା ନଜର ରଖିଛି। ଚୀନ ଚଲାଉଥିବା ପ୍ରତିଟି ଚାଲର ଜବାବ ଦେବା ପାଇଁ ଭାରତୀୟ ସେନା ପ୍ରସ୍ତୁତ ରହିଥିବା ନେଇ ସେନାମୁଖ୍ୟ କହିଛନ୍ତି। ଲଦାଖର ବ୍ଲାକ ଟପ, ହେଲମେଟ ଟପ ସହିତ ୩୦ଟି ଛୋଟବଡ଼ ପାହାଡ଼ ଉପରେ ଭାରତୀୟ ସେନା ଅନବରତ ପାଟ୍ରୋଲିଂ ଦାୟିତ୍ୱରେ ରହିଛନ୍ତି। ଏହା ସହିତ ଫିଙ୍ଗର ୪ ନିକଟରେ ସମସ୍ତ ପାହାଡ଼କୁ ଭାରତୀୟ ସେନା ନିଜ ଅକ୍ତିଆରକୁ ନେଇଛନ୍ତି। ଏହି ପ୍ରସ୍ତୁତି ସମୟରେ ଚୀନର ଅଧିକାଂଶ ପୋଷ୍ଟ ବର୍ତ୍ତମାନ ଭାରତୀୟ ଯବାନଙ୍କ ଅକ୍ତିଆରରେ ରହିଛି। ଏଭଳି ପରିସ୍ଥିତିରେ ଯଦି ଚୀନ ଯୁଦ୍ଧ ଘୋଷଣା କରୁଛି, ତେବେ ଚୀନକୁ ଏବ ଭାରୀମାତ୍ରାରେ କ୍ଷତି ସହିବ। କିନ୍ତୁ ଚୀନ କୌଣସି ମୁହୁର୍ତ୍ତରେ ଏକ ବଡ଼ଧରଣର ଆକ୍ରମଣ କରିବାର ସମ୍ଭାବନା ରହିଛି। ଯାହାର ମୁକାବିଲା କରିବା ପାଇଁ ଭାରତ ମଧ୍ୟ ପ୍ରସ୍ତୁତ ହୋଇ ରହିଛି।