 "Corona ର ଲେଉଟାଣି: ଏପ୍ରିଲ ୩୦ ଯାଏ ବନ୍ଦ ରହିବ ଅନ୍ତର୍ଜାତୀୟ ବିମାନ ସେବା")
ନୂଆଦିଲ୍ଲୀ: ମହାମାରୀର ପୁଣି ଲେଉଟାଣି । ଏନେଇ ସତର୍କ କରାଇଛି କେନ୍ଦ୍ର ଗୃହ ମନ୍ତ୍ରାଳୟ । ମଙ୍ଗଳବାର ରାଜ୍ୟ ମାନଙ୍କ ପାଇଁ ନୂଆ କୋଭିଡ ନିର୍ଦ୍ଦେଶାବଳୀ ଜାରି କରିଛନ୍ତି । ଆସନ୍ତା ଏପ୍ରିଲ ୧ ରୁ ଏପ୍ରିଲ ୩୦ ତାରିଖ ଯାଏଁ ଏହି ନିର୍ଦ୍ଦେଶାବଳୀ କାର୍ଯ୍ୟକାରୀ ହେବ । ତେବେ ଏହି କ୍ରମରେ ଏପ୍ରିଲ ମାସ ଶେଷ ପର୍ଯ୍ୟନ୍ତ ଅନ୍ତର୍ଜାତୀୟ ବିମାନ ଚଳାଚଳ ଉପରେ କଟକଣା ଲଗାଇଛି କେନ୍ଦ୍ର ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ । ତେବେ ଅନ୍ତର୍ଜାତୀୟ ବିମାନ ସେବା ବନ୍ଦ ରହିଥିଲେ ମଧ୍ୟ ସ୍ବତନ୍ତ୍ର ବିମାନ ଚଳାଚଳକୁ ମଞ୍ଜୁରୀ ମିଳିବ । ଏଥିସହ ପରିବହନ ବିମାନ ଚଳାଚଳରେ କୌଣସି ସମସ୍ୟା ଉପୁଜିବ ନାହିଁ ବୋଲି DGCA ପକ୍ଷରୁ କୁହାଯାଇଛି ।
ଦେଶରେ କ୍ରମାଗତ ବୃଦ୍ଧି ପାଉଥିବା ନୂଆ କୋରୋନା ଷ୍ଟ୍ରେନ ଯେପରି ଘାତକ ନ ହୁଏ ଏହାକୁ ଦୃଷ୍ଟିରେ ରଖି କେନ୍ଦ୍ର ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ ଏହି ନିଷ୍ପତ୍ତି ନେଇଛି । ଲଗାତାର କୋରୋନା ମହାମାରୀ ୪୦ ହଜାର ଉପରେ ରହୁଥିବାରୁ ପଦକ୍ଷେପ ନେଇଛନ୍ତି କେନ୍ଦ୍ର ସରକାର ।
ସେପଟେ ଆମ ରାଜ୍ୟରେ ମଧ୍ୟ କୋରୋନା (Corona) ସ୍ଥିତିକୁ ନେଇ ସରକାର ସଜାଗ ହୋଇଛନ୍ତି । କୋଭିଡ୍ ସ୍ଥିତିକୁ ନେଇ ମୁଖ୍ୟମନ୍ତ୍ରୀଙ୍କ ସମୀକ୍ଷା ବୈଠକ କରିବା ପରେ ଜିଲ୍ଲାସ୍ତରରେ କୋଭିଡ ନିୟମ ପାଳନକୁ ଅଧିକ ଗୁରୁତ୍ୱ ଦିଆଯାଇଛି । ରାଜ୍ୟରେ ଆରଟିପିସିଆର ଟେଷ୍ଟ ସଂଖ୍ୟା ବଢାଇବା ଉପରେ ଗୁରୁତ୍ୱ ଦେବା ସହ ଏନେଇ ଜିଲ୍ଲାସ୍ତରରେ ଆବଶ୍ୟକ ହେଉଥିବା କର୍ମଚାରୀଙ୍କ ସଂଖ୍ୟା ମଧ୍ୟ ବଢିବ । ସମସ୍ତ କୋରୋନା ଆକ୍ରାନ୍ତଙ୍କ କଣ୍ଟାକ୍ଟ ଟ୍ରେସିଂ(Contact Tracing) ଉପରେ ଗୁରୁତ୍ୱ ଦେବା ସହ ନିର୍ଦ୍ଦିଷ୍ଟ ଅଞ୍ଚଳରେ ସଂକ୍ରମଣ ବଢିଲେ ମିନି କଣ୍ଟେନମେଣ୍ଟ ବ୍ୟବସ୍ଥା କରାଯିବା ନେଇ ଆଲୋଚନା କରାଯାଇଛି ।
ସର୍ବାଧିକ ପ୍ରଭାବିତ ରାଜ୍ୟରୁ ଆସୁଥିବା ଲୋକଙ୍କ ଉପରେ ନଜର ରଖାଯିବ। ନିର୍ଦ୍ଧାରିତ ଗାଇଡଲାଇନ ଅନୁସାରେ ଟେଷ୍ଟ କରାଯିବା ସହ କୋଭିଡ ନିୟମ ପାଳନ ହେଉଛି କି ନାହିଁ ନଜର ରଖିବ ପୋଲିସ। ବଜାର, ଧର୍ମାନୁଷ୍ଠାନ, ବିବାହ କାର୍ଯ୍ୟରେ ରହିବ ସରକାରଙ୍କ ସ୍ୱତନ୍ତ୍ର ଦୃଷ୍ଟି ବାହାଘରରେ ୫୦୦ ବଦଳରେ ୨୦୦ ଲୋକ ସାମିଲ ପାଇଁ ପ୍ରସ୍ତାବ ରହିଛି।
)