ଆଇପିଏଲ ଆୟୋଜନକୁ ନେଇ ଏପରି କହିଲେ ଇଞ୍ଜାମାମ

ନୂଆଦିଲ୍ଲୀ: ଆଇପିଏଲ ଆୟୋଜନକୁ ନେଇ ବିରକ୍ତି ଭାବ ପ୍ରକାଶ କରିଛନ୍ତି ପାକିସ୍ତାନର ପୂର୍ବତନ କ୍ରିକେଟ ଦଳର ଅଧିନାୟକ ଇଞ୍ଜାମାମ ଉଲ ହକ। ସେ କହିଛନ୍ତି ଯେ ଯଦି କୋଭିଡ-୧୯ ମହାମାରୀ ହେତୁ ଅଷ୍ଟ୍ରେଲିଆରେ ହେବାକୁ ଥିବା ଆଇସିସି ଟି -୨୦ ବିଶ୍ୱକପ ବାତିଲ ହୁଏ ଏବଂ ଏହା ବଦଳରେ ଇଣ୍ଡିଆନ ପ୍ରିମିୟର ଲିଗ ବଦଳାଯାଏ ତେବେ ପ୍ରଶ୍ନ ଉଠିବ। କୋରୋନା ମହାମାରୀକୁ ଦୃଷ୍ଟିରେ ରଖି ଟି-୨୦ ବିଶ୍ୱକପ ବାତିଲ ହେବାର ସମସ୍ତ ସମ୍ଭାବନା ରହିଛି।

ଅକ୍ଟୋବର ୧୮ରୁ ନଭେମ୍ବର ୧୫ ପର୍ଯ୍ୟନ୍ତ ଅଷ୍ଟ୍ରେଲିଆରେ ଅନୁଷ୍ଠିତ ହେବାକୁ ଥିବା ଟି-୨୦ ବିଶ୍ୱକପର ଭବିଷ୍ୟତ ବିଷୟରେ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ଏପର୍ଯ୍ୟନ୍ତ ନିଷ୍ପତ୍ତି ନେଇ ନାହିଁ। ରବିବାର ଇଞ୍ଜାମାମ ତାଙ୍କ ୟୁଟ୍ୟୁବ ଚ୍ୟାନେଲରେ କହିଛନ୍ତି ଯେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଏବଂ ଭାରତ-ଅଷ୍ଟ୍ରେଲିଆ ସିରିଜ୍ ସହିତ ବିଶ୍ୱକପ୍ ତାରିଖ ପ୍ରାୟ ପାଖାପାଖି ସମୟ ରହିଛି। ତେଣୁ ଟି-୨୦ ବିଶ୍ୱକପ୍ ଅନୁଷ୍ଠିତ ହେବ ନାହିଁ ବୋଲି ସେ କହିଛନ୍ତି। 

ସେ କହିଛନ୍ତି ଯେ ଭାରତୀୟ କ୍ରିକେଟ ବୋର୍ଡ ବିସିସିଆଇ(bcci) ଏବଂ ଆନ୍ତର୍ଜାତୀୟ କ୍ରିକେଟ୍ ପରିଷଦ (icc) ଉପରେ ଏହାର ନିୟନ୍ତ୍ରଣ ରହିଛି। ଯଦି ଅଷ୍ଟ୍ରେଲିଆ କହିଛି ଯେ କୋରୋନା ମହାମାରୀ ହେତୁ ଆମେ ବିଶ୍ୱକପ ଆୟୋଜନ କରିପାରିବୁ ନାହିଁ, ତା’ହେଲେ ସେମାନଙ୍କ ଷ୍ଟାଣ୍ଡକୁ ସହଜରେ ଗ୍ରହଣ କରାଯିବ କିନ୍ତୁ ଯଦି ସେହି ସମୟରେ କୌଣସି ପ୍ରତିଯୋଗିତା ହୁଏ ତେବେ ପ୍ରଶ୍ନ ଉଠିବା ସ୍ୱାଭାବିକ ବୋଲି ସେ କହିଛନ୍ତି।

ପାକିସ୍ତାନ ପାଇଁ ୧୨୦ଟି ଟେଷ୍ଟରେ ଇଞ୍ଜାମାମ ୮୮୩୦ ରନ୍ ଏବଂ ୩୭୮ଟି ଦିନିକିଆରେ ୧୧୭୩୯ ରନ୍ ସ୍କୋର କରିଥିଲେ। ୫୦ ବର୍ଷୀୟ ଏହି ପୂର୍ବତନ ବ୍ୟାଟ୍ସମ୍ୟାନ୍ କହିଛନ୍ତି ଯେ ଲୋକମାନେ ଭାବିବେ ଯେ ଯଦି ଦେଶ  12 ରୁ 14 ଟି ଦଳର ଆୟୋଜନ କରିପାରିବ ତେବେ ଆଇସିସି ବିଶ୍ୱକପକୁ କାହିଁକି କରିପାରିବ ନାହିଁ। ଅଷ୍ଟ୍ରେଲିଆ ଏହି ଟିମ ଗୁଡ଼ିକର ଯତ୍ନ ନେଇ ପାରିବ ନାହିଁ। କାହିଁକି ନା ସର୍ବଶେଷରେ ଅଷ୍ଟ୍ରେଲିଆ ହେଉଛି ଏକ ଆଧୁନିକ ଦେଶ ବୋଲି ଇଞ୍ଜାମାମ କହିଛନ୍ତି। 

ସେ ଆହୁରି ମଧ୍ୟ କହିଛନ୍ତି କି, ଆଇସିସି ଘରୋଇ ଲିଗ ଆଇପିଏଲକୁ ଅନ୍ତରାଷ୍ଟ୍ରୀୟର ମାନ୍ୟତା ଦେବା ସମ୍ପୂର୍ଣ୍ଣ ଭାବେ ଭୁଲ ହେବ। ଏପରିକ କରିବା ଦ୍ୱାରା ଅନ୍ତର୍ଜାତୀୟ ମ୍ୟାଚ ଖେଳୁଥିବା ଖେଳାଳିମାନେ ବାଧ୍ୟ ହୋଇ ଘରୋଇ ମ୍ୟାଚ ଖେଳିବେ। ଏପରି ହେବା ଦ୍ୱାରା ସେମାନଙ୍କର ପରଫର୍ମାନ୍ସରେ ବାଧକ ସୃଷ୍ଟି ହେବାର ସମ୍ଭାବନା ରହିଛି ବୋଲି ସେ କହିଛନ୍ତି।