ଆସନ୍ତା ଅଗଷ୍ଟ ୨ରେ ହେବ ଆଇପିଏଲ ପରିଚାଳନା କମିଟି ବୈଠକ

ନୂଆଦିଲ୍ଲୀ: ଆସନ୍ତା ଅଗଷ୍ଟ ୨ ତାରିଖରେ ଅନୁଷ୍ଠିତ ହେବ ଆଇପିଏଲ (IPL)ର ପରିଚାଳନା କମିଟି ବୈଠକ । ଚଳିତ ବର୍ଷ UAEରେ ଆଇପିଏଲ ହେବାର ଅଛି । ତେବେ ଏହି ବୈଠକରେ ଏହାର ଚୁଡ଼ାନ୍ତ ରୂପରେଖ ପ୍ରସ୍ତୁତ କରାଯିବ । ସେହିପରି ଅନ୍ୟ ସମସ୍ତ ବ୍ୟବସ୍ଥା ନେଇ ମଧ୍ୟ ଆଲୋଚନା ହେବ । କୋରୋନା ଭାଇରସ କାରଣରୁ ଚଳିତ ବର୍ଷ ଏହି ଟୁର୍ଣ୍ଣାମେଣ୍ଟକୁ ବିଦେଶରେ ଆୟୋଜନ କରାଯାଉଛି । ଆସନ୍ତା ୧୯ ସେପ୍ଟେମ୍ବରରୁ ୮ ନଭେମ୍ବର ପର୍ଯ୍ୟନ୍ତ UAEରେ ଆଇପିଏଲ-୨୦୨୦ କରିବାକୁ ନିଷ୍ପତ୍ତି ନିଆଯାଇଛି ।  

ଆଇପିଏଲର ଚେୟାରମ୍ୟାନ ବୃଜେଶ ପଟେଲ ଖବର ସରବରାହ ସଂସ୍ଥା ପିଟିଆଇ(PTI)କୁ କହିଛନ୍ତି, ଆଇପିଏଲ ପରିଚାଳନା ବୈଠକ ଆସନ୍ତା ଅଗଷ୍ଟ ୨ ତାରିଖରେ ହେବ । ସେହିପରି ବିସିସିଆଇର ଅନ୍ୟ ଜଣେ ବରିଷ୍ଠ ଅଧିକାରୀଙ୍କ କହିବା ମୁତାବକ, ବୈଠକ ସମୟରେ ସମସ୍ତ ୮ ଫ୍ରାଞ୍ଚାଇଜ ଟୁର୍ଣ୍ଣାମେଣ୍ଟର ମୋଡାଲିଟି ସମ୍ପର୍କରେ ସ୍ପଷ୍ଟ ଚିତ୍ର ପାଇପାରିବେ । 

ତେବେ ଏହି ବୈଠକରେ ବିସିସିଆଇର ଉଚ୍ଚ ପଦାଧିକାରୀ ମଧ୍ୟ ସାମିଲ ହେବାର ସମ୍ଭାବନା ରହିଛି । ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲି ଏବଂ ସଚିବ ଜୟ ଶାହ ମଧ୍ୟ ସାମିଲ ହୋଇପାରନ୍ତି । ବୈଠକରେ ଆଇପିଏଲ ସମ୍ପର୍କରେ ଅନେକ ଗୁରୁତ୍ୱପୂର୍ଣ୍ଣ ଦିଗ ଉପରେ ଆଲୋଚନା ହେବ । 

ଚଳିତ ବର୍ଷ ଆଇପିଏଲରେ ଦିନକୁ ୨ଟି ମ୍ୟାଚ ହେବ । ଏହା ପ୍ରସାରଣକାରୀ ସଂସ୍ଥାଙ୍କୁ ଫାଇଦା ଦେବ । ତେବେ ମ୍ୟାଚ ବେଳେ ଷ୍ଟାଡିୟମରେ ଦର୍ଶକ ରହିବେ ନାହିଁ । ପ୍ରତ୍ୟେକ ମ୍ୟାଚ ଏକ  bio safe environment ମଧ୍ୟରେ ଅନୁଷ୍ଟିତ ହେବ । ସେପଟେ ଏହାରି ଯୋଗୁ ଫ୍ରାଞ୍ଚାଇଜଗୁଡ଼ିକ ଯେଉଁ 'Get Money' ହରାଇବେ, ସେନେଇ ମଧ୍ୟ ଆଲୋଚନା କରାଯିବ ।