ଆତଙ୍କୀ ହମଲା ବେଳେ ୩ ବର୍ଷର ଶିଶୁକୁ ବଞ୍ଚାଇଲେ ସୁରକ୍ଷାକର୍ମୀ

ବାରମୂଲା: ଦେଶର ଭବିଷ୍ୟତକୁ ବଞ୍ଚାଇଲେ ଭାରତୀୟ ଯବାନ । ଆତଙ୍କୀ ହମଲାରେ ଜୀବନକୁ ବାଜି ଲଗାଇ ଛୋଟ ଛୁଆର ଜୀବନ ବଞ୍ଚାଇଛନ୍ତି ସୁରକ୍ଷାକର୍ମୀ । ଆଜି ଜମ୍ମୁ କାଶ୍ମୀର ସୋପୋରରେ ହୋଇଥିବା ଆତଙ୍କୀ ହମଲାରୁ ଏମିତି କିଛି ଚିତ୍ର ସାମ୍ନାକୁ ଆସିଛି । ଏହି ଆତଙ୍କୀ ହମଲାରେ ଶିଶୁଟିର ଦାଦାଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । 

ପୁରା ଘଟଣା ଥିଲା କିଛି ଏପରି । ଆଜି ଜମ୍ମୁ କାଶ୍ମୀର ସୋପୋରରେ ସିଆରପିଏଫ କାଫିଲା ଉପରେ ହମଲା କରିଥିଲେ ଆତଙ୍କବାଦୀ । ଏହି ଆକ୍ରମଣର ଜଣେ ଯବାନ ଶହୀଦ ହୋଇଥିବା ବେଳେ ଅନ୍ୟ ୩ ଗୁରୁତର ଆହତ ହୋଇଛନ୍ତି । ଜଣେ ସାଧାରଣ ନାଗରିକଙ୍କ ମଧ୍ୟ ମୃତ୍ୟୁ ହୋଇଛି । ଯାହା ଜଣାପଡ଼ିଛି, ମୃତକ ଜଣକ ଉଦ୍ଧାର ହୋଇଥିବା ଶିଶୁର ଦାଦା । 

ବୀରତାର ସହ ଭାରତୀୟ ଯବାନ ଏହି ଶିଶୁକୁ ଉଦ୍ଧାର କରିଛନ୍ତି । ଶିଶୁଟିର ସାମାନ୍ୟ ଦୂରରେ ତା ଦାଦାଙ୍କ ମୃତଦେହ ପଡ଼ିରହିଥିଲା । ସେହି ସ୍ଥାନରୁ ଶିଶୁକୁ ଉଦ୍ଧାର କରିବା ଅର୍ଥାତ ଜୀବନ ଉପରେ ବଡ଼ ବିପଦ ମନେହେଉଥିଲା । ତେବେ ଦେଶର ଭବ୍ୟଷ୍ୟତର ଜୀବନ ବଞ୍ଚାଇବାରେ କୌଣସି କୁଣ୍ଠାବୋଧ କରିନଥିଲେ ଆମ ସୁରକ୍ଷାକର୍ମୀ । ନିଜ ଜୀବନକୁ ବାଜି ଲଗାଇ ଶିଶୁକୁ ଉଦ୍ଧାର କରିଥିଲେ ।