ଏହି ରାଜ୍ୟ ସରକାରଙ୍କ ବଡ଼ ଘୋଷଣା, ଅଟୋ ଚାଳକଙ୍କୁ ମିଳିବ ୫ ହଜାର ଟଙ୍କା

ନୂଆଦିଲ୍ଲୀ: କୋରୋନା ଭୂତାଣୁର ବୃଦ୍ଧି ପାଉଥିବା ସଂକ୍ରମଣକୁ ରୋକିବା ପାଇଁ ଦେଶରେ ଲକ୍ ଡାଉନ୍ ଜାରି ରହିଛି । ଆଜି ଅର୍ଥାତ ଗୁରୁବାର ଏହାର ଦ୍ୱାଦଶ ଦିନ । ଲକ୍ ଡାଉନ ଯୋଗୁଁ ଦିନ ମଜୁରିଆ ଶ୍ରମିକ, ଅଟୋ, ଇ-ରିକ୍ସା ଚାଳକଙ୍କୁ ସର୍ବାଧିକ କ୍ଷତି ସହିବାକୁ ପଡୁଛି । ତେବେ ସେମାନଙ୍କ ପାଇଁ ସରକାର ରିଲିଫ ଘୋଷଣା କରୁଛନ୍ତି । ଗୁରୁବାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ମଧ୍ୟ ଏକ ବଡ଼ ଘୋଷଣା କରିଛନ୍ତି । ସେ କହିଛନ୍ତି ଯେ ସମସ୍ତ ପବ୍ଲିକ ସର୍ଭିସ ଯାନବାହନ ଡ୍ରାଇଭରଙ୍କ ଆକାଉଣ୍ଟରେ 5 ହଜାର ଟଙ୍କା ଜମା କରାଯିବ ।

ଅରବିନ୍ଦ କେଜ୍ରିୱାଲ କହିଛନ୍ତି ଯେ, କିଛି ଦିନ ହେବ ଅଟୋ, ରିକ୍ସା, ଆରଟିଭିରୁ ମେସେଜ ଏବଂ ଫୋନ୍ ଆସିଛି ଯେ ସେମାନଙ୍କ ଜୀବିକା ବନ୍ଦ ହୋଇଯାଇଛି । ମୁଁ ସେମାନଙ୍କୁ କହିବାକୁ ଚାହେଁ ଯେ ଆପଣମାନେ ସମସ୍ତେ ମୋ ଭାଇ ପରି, ମୁଁ କାହାକୁ ଭୋକରେ ରହିବାକୁ ଦେଇ ପାରିବି ନାହିଁ । ପବ୍ଲିକ ସର୍ଭିସ ଗାଡିର ସମସ୍ତ ଡ୍ରାଇଭରଙ୍କ ଆକାଉଣ୍ଟରେ 5 ହଜାର ଟଙ୍କା ଜମା କରାଯିବ ।

ଦିଲ୍ଲୀରେ କୋରୋନା ରୋଗୀଙ୍କ ବିଷୟରେ ସୂଚନା ଦେବାବେଳେ ଅରବିନ୍ଦ କେଜ୍ରିୱାଲ କହିଛନ୍ତି ଯେ ଏଠାରେ 219 ଟି ମାମଲା ରହିଛି । ଏଥିମଧ୍ୟରୁ 51ଟି ମାମଲା ବିଦେଶୀରୁ ଆସିଥିବା ଲୋକଙ୍କ ରହିଛି । 108ଟି ମାମଲା ମରକଜରୁ ଆସିଛି । 29ଟି ମାମଲା ହେଉଛି ଯେଉଁମାନେ ବିଦେଶରୁ ଆସିଥିଲେ, ସେମାନଙ୍କ ପରିବାର ସଦସ୍ୟଙ୍କୁ ହୋଇଛି । ମାରକଜରେ ଯାଇଥିବା 2 ଜଣଙ୍କ ସମେତ ଦିଲ୍ଲୀରେ 4 ଜଣଙ୍କର ମୃତ୍ୟୁ ହୋଇଛି ।