'ସିନେମା ଚିତ୍ରନାଟ୍ୟରେ ତ ବାସ୍ତବିକତା ବଞ୍ଚିନାହିଁ କିନ୍ତୁ ବାସ୍ତବିକତାରେ ବହୁତ ସିନେମା ଚିତ୍ରନାଟ୍ୟ ଜୀବିତ ଅଛି'

ନୂଆଦିଲ୍ଲୀ: ଶୁକ୍ରବାର ଉତ୍ତର ପ୍ରଦେଶର କୁଖ୍ୟାତ ଅପରାଧୀ ବିକାଶ ଦୁବେର ନାଟକୀୟ ଅନ୍ତ ଦେଖିବାକୁ ମିଳିଛି । ଗତ ଶୁକ୍ରବାର ହୋଇଥିବା କାନପୁର ଏନକାଉଣ୍ଟରର ମୁଖ୍ୟ ଅଭିଯୁକ୍ତ ବିକାଶ ଦୁବେକୁ ଆଜି(ଶୁକ୍ରବାର) ଏନକାଉଣ୍ଟର କରିଛି ୟୁପି ପୋଲିସ । ତେବେ ବିକାଶ ଦୁବେ ମାମଲାର କ୍ଲାଇମେକ୍ସକୁ ନେଇ ଅନେକ ପ୍ରଶ୍ନ ଉଠାଉଛନ୍ତି । ସତରେ ବିକାଶ ଖସି ଯିବାକୁ ଉଦ୍ୟମ କରୁଥିଲା ନା ତାକୁ ଜାଣି ଜାଣି ଏନକାଉଣ୍ଟର କରାଯାଇଛି, ସେନେଇ ଅନେକ ପ୍ରଶ୍ନ ଉଠୁଛି । କେହି କେହି ଏହାକୁ ଫିଲ୍ମ କାହାଣୀ ବୋଲି କହୁଛନ୍ତି । ଆଉ ଏସବୁ ଭିତରେ କୁମାର ବିଶ୍ୱାସ ମଧ୍ୟ ଏକ ଟ୍ୱିଟ କରିଛନ୍ତି ।

ନିଜ ଟ୍ୱିଟରେ କୁମାର ବିଶ୍ୱାସ ଲେଖିଛନ୍ତି, ''ସିନେମା ଚିତ୍ରନାଟ୍ୟରେ ତ ବାସ୍ତବିକତା ବଞ୍ଚିନାହିଁ । କିନ୍ତୁ ବାସ୍ତବିକତାରେ ବହୁତ ସିନେମା ଚିତ୍ରନାଟ୍ୟ ଜୀବିତ ଅଛି ।'' ଏହାକୁ ସାଧାରଣ ଅର୍ଥରେ ବୁଝିବାକୁ ହେଲେ, ବିକାଶ ଦୁବେ ଏନକାଉଣ୍ଟରକୁ ନେଇ ଯେଉଁ କାରଣ ଦର୍ଶାଯାଉଛି, ତାହା ଯେ ଏକ ଫିଲ୍ମ ସ୍କ୍ରିପ୍ଟ, ତାହା କହିବାକୁ ଚାହିଁଛନ୍ତି କୁମାର ବିଶ୍ୱାସ ! 

ଗତକାଲି ମଧ୍ୟପ୍ରଦେଶ ଉଜ୍ଜୈନରୁ ଧରା ପଡ଼ିଥିଲା କାନପୁର ଏନକାଉଣ୍ଟରର ମାଷ୍ଟରମାଇଣ୍ଡ ବିକାଶ ଦୁବେ । ପରେ ତାକୁ କାନପୁର ନିଆଯାଉଥିଲା । ତେବେ ନିଜ ଅଞ୍ଚଳରେ ପହଞ୍ଚିଯାଇଥିବା ଜାଣି ବିକାଶର ବଳ ବଢ଼ିଯାଇଥିଲା । ପୋଲିସ ପାଖରୁ ବନ୍ଧୁକ ଛଡ଼ାଇ ଖସି ଯିବାକୁ ଉଦ୍ୟମ କରିଥିଲା ଏହି କୁଖ୍ୟାତ ଅପରାଧି । ଭାରସାମ୍ୟ ହରାଇ ଗାଡ଼ିଟି ଓଲଟି ପଡ଼ିବାରୁ ବିକାଶକୁ ସୁବିଧା ହୋଇଥିଲା । ଆହତ ସୁରକ୍ଷାକର୍ମୀଙ୍କ ବନ୍ଧୁକ ଛଡ଼ାଇ ଗୁଳିଚାଳନା କରିଥିଲା ବିକାଶ ଦୁବେ । ଆଉ ପୋଲିସ ନିଜକୁ ବଞ୍ଚାଇବାକୁ ଯାଇ ବିକାଶ ଦୁବେ ଉପରେ ପାଲଟା ଗୁଳି ଚାଳନା କରିବାକୁ ବାଧ୍ୟ ହୋଇଥିବା କୁହାଯାଉଛି । 

ଯାହା ଜଣାପଡ଼ିଛି, ଆଜି ସକାଳ ୭ଟା ୧୫ରୁ ୭ଟା ୩୫ ମଧ୍ୟରେ ଏହି ଏନକାଉଣ୍ଟର ହୋଇଛି । କୁହାଯାଉଛି, ଗାଡ଼ି ଓଲଟି ପଡ଼ିବା ପରେ ବିକାଶ ଦୁବେ ଆହତ ପୋଲିସ କର୍ମଚାରୀଙ୍କ ପାଖରୁ ବନ୍ଧୁକ ଛଡ଼ାଇ ଖସି ଯାଉଥିଲା । ତେବେ ସୁରକ୍ଷାକର୍ମୀ ବିକାଶର ପିଛା କରିଥିଲେ । ପିଛା କରୁଥିବା ପୋଲିସ ଉପରେ ମଧ୍ୟ ବିକାଶ ଦୁବେ ଗୁଳି ଚଳାଇଥିଲା । ତେଣୁ ପୋଲିସ ପାଲଟା ଗୁଳି ଚଲାଇଥିଲା । 

ପୋଲିସ ଗୁଳିରେ ଗୁରୁତର ଆହତ ହୋଇଥିବା ବିକାଶ ଦୁବେକୁ ତୁରନ୍ତ ମେଡିକାଲ ନିଆଯାଇଥିଲା । ତେବେ ସେଠାରେ ଡାକ୍ତର ତାକୁ ମୃତ ଘୋଷଣା କରିଥିବା କୁହାଯାଉଛି । ସକାଳ ୭ଟା ୫୫ ମିନିଟ ବେଳକୁ ବିକାଶ ଦୁବେକୁ ମୃତ ଘୋଷଣା କରିଥିଲେ ଡାକ୍ତର ।