ପ୍ରଥମ ଭାରତୀୟ ଅଭିନେତ୍ରୀ, ଯିଏ କରିଥିଲେ ସାବୁନର ବିଜ୍ଞାପନ

ନୂଆଦିଲ୍ଲୀ: କିଏ ସେହି ପ୍ରଥମ ଭାରତୀୟ ଅଭିନେତ୍ରୀ, ଯିଏ ସାବୁନର ବିଜ୍ଞାପନ କରିଥିଲେ ? ଜାଣିଛନ୍ତି ତାଙ୍କ ବିଷୟରେ ? ସେ ଥିଲେ ହିନ୍ଦୀ ଚଳଚିତ୍ର ଜଗତର ପ୍ରଥମ ବ୍ଲକବଷ୍ଟର ଫିଲ୍ମ 'କଙ୍ଗନ'ର ଅଭିନେତ୍ରୀ ଲୀଲା ଚିଟିନ୍ସ(Leela Chitins) । ସେ ଏମିତି ଏକ କଳାକାର ଥିଲେ, ଆମେ ଯାହାଙ୍କୁ କେବେ ମଧ୍ୟ ଭୁଲି ପାରିବା ନାହିଁ । ବର୍ଷ ବର୍ଷ ଧରି ସେ ଆମର ମନୋରଞ୍ଜନ କରିଥିଲେ । କେବଳ ଏତିକି ନୁହେଁ, ସେ ପ୍ରଥମ ଭାରତୀୟ ଅଭିନେତ୍ରୀ ଯିଏକି ୧୯୪୧ରେ ଲକ୍ସ ସାବୁନର ବିଜ୍ଞାପନରେ କାମ କରିଥିଲେ । ଲୀଲାଙ୍କୁ ମହାରାଷ୍ଟ୍ରର ପ୍ରଥମ ଗ୍ରାଜୁଏଟ ସୋସାଇଟି ଲେଡି ବୋଲି ମଧ୍ୟ କୁହାଯାଏ । 

ସ୍ୱାମୀଙ୍କ ଠାରୁ ଅଲଗା ହେବା ପରେ ପିଲା ଛୁଆଙ୍କ ପ୍ରତିପୋଷଣ ପାଇଁ ଲୀଲା ଏକ ସ୍କୁଲରେ ଶିକ୍ଷୟତ୍ରୀ ଭାବେ କାମ କରିଥିଲେ । ସେଠି ଛୁଆଙ୍କୁ ପାଠ ପଢ଼ାଇବା ସହ ନାଟକରେ ମଧ୍ୟ କାମ କରିଥିଲେ ଲୀଲା । ନାଟକରେ ଅଭିନୟ ଦେଖି ଏକ ଫିଲ୍ମରେ ମଧ୍ୟ ତାଙ୍କୁ କାମ କରିବାର ସୁଯୋଗ ମିଳିଥିଲା । ପରବର୍ତ୍ତୀ ସମୟରେ ସେ 'ଜ୍ୟାଣ୍ଟଲମ୍ୟାନ ଡାକୁ'ରେ ନିଜର ପ୍ରତିଭାକୁ ଦେଖାଇବାରେ ସେ ସଫଳ ହୋଇଥିଲେ । ସେହିପରି ୧୯୩୬ ମସିହାରେ 'ଛାୟା' ଚଳଚିତ୍ରରେ ଅଭିନୟ କରି ନଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଥିଲେ । 

ଲୀଲାଙ୍କ ଅଭିନୟ ଦେଖି ତାଙ୍କୁ ସୁପରଷ୍ଟାର ଅଶୋକ କୁମାରଙ୍କ ସହ କାମ କରିବାର ସୁଯୋଗ ମିଳିଥିଲା । ଫିଲ୍ମ କଙ୍ଗନରେ ଉଭୟେ ଏକା ସାଙ୍ଗରେ କାମ କରିଥିଲେ । ଏହି ଫିଲ୍ମକୁ ହିନ୍ଦି ସିନେମାର ପ୍ରଥମ ବ୍ଲକବଷ୍ଟର ଫିଲ୍ମ ବୋଲି କୁହାଯାଏ । ଆଉ ଏହି ଫିଲ୍ମରେ ନିଜର ଜଲୱା ଦେଖାଇବାରେ ସଫଳ ହୋଇଥିଲେ ଲୀଲା । ପରବର୍ତ୍ତୀ ସମୟରେ ଅଶୋକ କୁମାରଙ୍କ ସହ ସେ ଅନେକ ଫିଲ୍ମରେ କାମ କରିବାକୁ ସୁଯୋଗ ପାଇଥିଲେ । 

ଲୀଲାଙ୍କୁ ଶେଷଥର ପାଇଁ ୧୯୮୭ରେ 'ଦିଲ ତୁଝକୋ ଦିଆ'ରେ ଦେଖିବାକୁ ମିଳିଥିଲା । 
ଏହା ପରେ ସେ ଫିଲ୍ମ ଜଗତରୁ ଦୂରେଇ ଯାଇ ଆମେରିକାରେ ବଡ଼ ପୁଅ ସହ ରହିଥିଲେ । ସେଠାରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ । ଆଜି ଏହି ଅଭିନେତ୍ରୀ ନାହାଁନ୍ତି ସତ, କିନ୍ତୁ ଛାଡ଼ି ଯାଇଛନ୍ତି ନିଜ ଅଭିନୟର ଜଲୱା ।