ରେଡ ଜୋନ୍ ସତ୍ତ୍ୱେ ଦିଲ୍ଲୀର ଏହି ସ୍ଥାନଗୁଡ଼ିକରେ ଆସନ୍ତାକାଲିଠୁ ଖୋଲାଯିବ ମଦ ଦୋକାନ

ନୂଆଦିଲ୍ଲୀ: କୋରୋନା ଭାଇରସ୍ ସାରା ବିଶ୍ୱ ସମେତ ଭାରତରେ ଆତଙ୍କ ସୃଷ୍ଟି କରିଛି । ଭାରତରେ କୋରୋନା ଭାଇରସ ସଂକ୍ରମଣ ସଂଖ୍ୟା ୪୦ ହଜାର ଅତିକ୍ରମ କରିସାରିଛି । ଏହାସହ ୧୩୦୦ରୁ ଉର୍ଦ୍ଧ୍ୱ ଲୋକଙ୍କର ମୃତ୍ୟୁ ଘଟିଛି ।  ଏଥି ସହିତ କୋରୋନାକୁ ଦୃଷ୍ଟିରେ ରଖି ଲକଡାଉନ୍ ମେ ୧୭ ପର୍ଯ୍ୟନ୍ତ ବୃଦ୍ଧି କରାଯାଇଛି । ଏହି ସମୟରେ ସୋମବାର(ମେ ୪)ଠାରୁ ଦିଲ୍ଲୀରେ ୧୨୩ଟି ମଦ ଦୋକାନ ଖୋଲାଯିବ । ଦିଲ୍ଲୀ ସରକାର ୧୨୩ ମଦ ଦୋକାନ ଖୋଲିବାକୁ ନିଷ୍ପତ୍ତି ନେଇଛନ୍ତି । ଏଥିପାଇଁ ଏକ ବିଜ୍ଞପ୍ତି ମଧ୍ୟ ଜାରି କରାଯାଇଛି ।

ଆସିଷ୍ଟାଣ୍ଟ ଏକ୍ସାଇଜ୍ କମିଶନର ଅଶୋକ ଦରିଆନୀ ସରକାରୀ ନିଗମକୁ ସହରରେ ମଦ ବିକ୍ରି ଆରମ୍ଭ ପାଇଁ ପଠାଇଥିବା ଚିଠିରେ କହୁଯାଇଥିଲା ଯେ ଗୃହ ମନ୍ତ୍ରଣାଳୟ ଦ୍ୱାରା ସ୍ଥିର କରାଯାଇଥିବା ମାନଦଣ୍ଡରେ ଆସୁଥିବା L-6 ଏବଂ L-8 ଦୋକାନଗୁଡ଼ିକର ତାଲିକା ତୁରନ୍ତ ପଠାନ୍ତୁ ।

ଦିଲ୍ଲୀ ସରକାରଙ୍କ ଅଧୀନରେ L-6 ଲାଇସେନ୍ସ ଅଧୀନରେ ମଦ ବିକ୍ରି ହେଉଛି । ଏଥିପାଇଁ DTTDC, DSIDC, DSCSC ଏବଂ DCCWSକୁ ସେମାନଙ୍କ ପରିସରରେ ମଦ ବିକ୍ରୟ ପାଇଁ ଲାଇସେନ୍ସ ଦିଆଯାଇଥାଏ । ଦିଲ୍ଲୀ ସରକାରଙ୍କ ଏକ୍ସାଇଜ୍ ବିଭାଗର ୱେବସାଇଟ୍ ଅନୁଯାୟୀ, ୨୦୧୯ରେ ଅତି କମରେ ୩୮୧ଟି ମଦ ବିକ୍ରି ଲାଇସେନ୍ସ ପ୍ରଦାନ କରାଯାଇଛି । ଅନ୍ୟପକ୍ଷରେ ମହାରାଷ୍ଟ୍ର ସରକାର ମଧ୍ୟ କିଛି ସର୍ତ୍ତ ସହିତ ରେଡ୍ ଜୋନରେ ମଦ ଦୋକାନ ଖୋଲିବାକୁ ଅନୁମତି ଦେଇଛନ୍ତି ।