ଆଇଏସଏସକୁ ଦୁଇ ମହାକାଶଯାତ୍ରୀଙ୍କ ସହ ସ୍ପେସକ୍ରାପ୍ଟ ପଠାଇଲା ଆମେରିକା

ପ୍ରଥମ ଥର ପାଇଁ ମହାକାଶ ଅଭିମୁଖେ ଘରୋଇ କମ୍ପାନୀର ମହାକାଶଯାନ

ୱାସିଂଟନ: ଇତିହାସ ରଚିଲା ଆମେରିକା । ମହାକାଶ ଇତିହାସର ସ୍ୱର୍ଣ୍ଣାକ୍ଷରରେ ସ୍ଥାନ ପାଇଲା ୩୦ ମଇ । ଜନ୍ ଏଫ୍ କେନେଡି ସେଣ୍ଟରରୁ ଅନ୍ତର୍ଜାତୀୟ ସ୍ପେସ ଷ୍ଟେସନ(ଆଇଏସଏସ)କୁ ମହାକାଶଯାନ ପଠାଇଛି ଆମେରିକା । ନାସାର ଦୁଇ ମହାକାଶଚାରୀଙ୍କ ସହ ଆଇଏସଏସ ଅଭିମୁଖେ ସ୍ପେସକ୍ରାପ୍ଟ । ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ମହାକାଶଯାନକୁ ଘରୋଇ କମ୍ପାନୀ ସ୍ପେସଏକ୍ସ(SpaceX) ପ୍ରସ୍ତୁତ କରିଛି । ଘରୋଇ କମ୍ପାନୀର ମହାକାଶଯାନରେ ଯାତ୍ରୀ ପଠାଇବା ମହାକାଶ ଇତିହାସର ପ୍ରଥମ ଘଟଣା । 

ଆମେରିକାର ସମୟ ଅନୁସାରେ, ଶନିବାର ଦିନ ୩.୨୨ରେ ସ୍ପେସକ୍ରାପ୍ଟକୁ ଉତକ୍ଷେପଣ କରାଯାଇଥିଲା । ଅର୍ଥାତ ଭାରତୀୟ ସମୟ ରାତି ୧୨ଟା ୫୨ ମିନିଟରେ ଏହା ଉତକ୍ଷେପଣ ହୋଇଛି । ଏହି ସ୍ପେସକ୍ରାପ୍ଟରେ ଦୁଇ ମହାକାଶଚାରୀ ଅଛନ୍ତି । ଆଇଏସଏସକୁ ପହଞ୍ଚିବା ପାଇଁ ଏମାନଙ୍କୁ ୧୯ ଘଣ୍ଟାର ସମୟ ଲାଗିବ । ବାଣିଜ୍ୟିକ ମହାକାଶ ଉଡ଼ାଣରେ ଏହି ମିଶନ ଏକ ନୂଆ ଯୁଗର ଆରମ୍ଭ କରିଛି । 

After a successful launch at 3:22 p.m. ET, @SpaceX's Crew Dragon spacecraft with @AstroBehnken and @Astro_Doug onboard is on its way to the @Space_Station.

Docking will occur May 31 at 10:29 a.m. ET: https://t.co/A9sbAYbCl3 pic.twitter.com/IyWkZN1HSH

— NASA's Kennedy Space Center (@NASAKennedy) May 30, 2020

ତିନ ଦିନ ପୂର୍ବରୁ ଏହି ମହାକାଶଯାନ ଉଦକ୍ଷେପଣ ହେବାର ଥିଲା । ହେଲେ ଖରାପ ପାଗ ଯୋଗୁଁ ଏହାକୁ ବାତିଲ କରାଯାଇଥିଲା । ମିଶିନ ଲଞ୍ଚ ହେବାର ମାତ୍ର ୧୭ ମିନିଟ ପୂର୍ବରୁ ଏପରି ନିଷ୍ପତ୍ତି ନିଆଯାଇଥିଲା । ସେହି ସମୟରେ ପାଗ ଏତେ ଖରାପ ଥିଲା ଯେ, ଦୁଇ ମହାକାଶଚାରୀଙ୍କ ଜୀବନ ପ୍ରତି ବିପଦ ରହିଥିଲା । କ୍ରୁ ମେମ୍ବରଙ୍କ ସୁରକ୍ଷା ଆମର ପ୍ରାଥମିକତା ବୋଲି ନାସା ପକ୍ଷରୁ କୁହାଯାଇଥିଲା । 

କେଉଁଠୁ ଉତକ୍ଷେପଣ ହେଲା ମହାକାଶଯାନ ? 

ଫ୍ଲୋରିଡାର କୋପ୍ କନଭାରାଲରେ ଥିବା ଜନ୍ ଏଫ୍ କେନେଡି ସେଣ୍ଟରରୁ ଏହାକୁ ଉତକ୍ଷେପଣ କରାଯାଇଛି । ୫୦ ବର୍ଷ ପୂର୍ବରୁ ଏହି ସେଣ୍ଟରରୁ ଆପୋଲୋ ମୁନ ମିଶନ ଲଞ୍ଚ ହୋଇଥିଲା । 

ଆମେରିକାର ରାଷ୍ଟ୍ରପତି ମଧ୍ୟ ଥିଲେ ଉପସ୍ଥିତ

ଶନିବାର ଉତକ୍ଷେପଣ ବେଳେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଉପସ୍ଥିତ ଥିଲେ । ସେହିପରି ଆମେରିକାର ପ୍ରଥମ ମହିଳା ମେଲାନିଆ ଟ୍ରମ୍ପ ମଧ୍ୟ ଥିଲେ । ନାସା, ଏଲନ ମସ୍କ ଏବଂ ଦୁଇ ମହାକାଶଚାରୀଙ୍କୁ ଅଭିନନ୍ଦନ ଜଣାଇଥିଲେ । ଆମେରିକା ପାଇଁ ଆଜିର ଦିନ ଐତିହାସିକ ବୋଲି କହିଥିଲେ ଟ୍ରମ୍ପ ।