ଗାଭାସ୍କରଙ୍କ ଏହି ରେକର୍ଡ ୫ ଦଶନ୍ଧି ପରେ ବି ଭାଙ୍ଗି ପାରିଲେନି କେହି

ନୂଆଦିଲ୍ଲୀ: ଏମିତିରେ କ୍ରିକେଟ୍ ଖେଳରେ ଅନେକ ରେକର୍ଡ ସୃଷ୍ଟି ହୋଇଛି । ଗୋଟିଏ ପରେ ଗୋଟିଏ ରେକର୍ଡ ମଧ୍ୟ ଭଙ୍ଗା ଯାଇଛି । କୁହାଯାଏ ଯେ ରେକର୍ଡଗୁଡିକ ଭାଙ୍ଗିବା ପାଇଁ ସୃଷ୍ଟି ହୋଇଥାଏ । କିନ୍ତୁ ସୁନୀଲ ଗାଭାସ୍କରଙ୍କ ମଧ୍ୟ ଏପରି ଏକ ରେକର୍ଡ ରହିଛି,  ଯାହା ୫ ଦଶନ୍ଧି ପରେ ମଧ୍ୟ କୌଣସି ବ୍ୟାଟ୍ସମ୍ୟାନ୍ ସ୍ପର୍ଶ କରିପାରିବେ ନାହିଁ । ଗାଭାସ୍କର ୧୯୭୧ ଏପ୍ରିଲ ୧୯ ରେ ୱେଷ୍ଟଇଣ୍ଡିଜରେ କରିଥିବା ଏହି ରେକର୍ଡକୁ ବ୍ରାୟାନ୍ ଲାରା ନା ସଚିନ୍ ତେନ୍ଦୁଲକର ନା ଅନ୍ୟ କୌଣସି ବ୍ୟାଟ୍ସମ୍ୟାନ ସ୍ପର୍ଶ କରିପାରି ନାହିଁ ।  

ଗାଭାସ୍କର ୫ ଟେଷ୍ଟ ମ୍ୟାଚର ସେହି ସିରିଜର ୪ଟି ମ୍ୟାଚରେ ୭୭୪ ରନ କରିଥିଲେ । ସେ ସେତେବେଳେ ୱେଷ୍ଟଇଣ୍ଡିଜର ଜର୍ଜ ହ୍ୟାଡଲିଙ୍କ ୫୧ ବର୍ଷ ପୁରୁଣା ରେକର୍ଡ ଭାଙ୍ଗିଥିଲେ । ଯିଏ ୧୯୩୦ ମସିହାରେ ଇଂଲଣ୍ଡ ବିପକ୍ଷ ୪ଟି ଟେଷ୍ଟରେ ୭୦୩ ରନ କରିଥିଲେ । ଘରୋଇ ମ୍ୟାଚରେ ଭଲ ପ୍ରଦର୍ଶନ ଯୋଗୁଁ ୱେଷ୍ଟଇଣ୍ଡିଜ୍ ଗସ୍ତରେ ଯାଇଥିବା ଗାଭାସ୍କର କିଙ୍ଗଷ୍ଟନ୍ ଠାରେ ପ୍ରଥମ ଟେଷ୍ଟ ମ୍ୟାଚ୍ ଖେଳି ନଥିଲେ । ସେ ପୋର୍ଟ ଅଫ୍ ସ୍ପେନରେ ଦ୍ୱିତୀୟ ଟେଷ୍ଟ୍ ଡେବ୍ୟୁ କରିଥିଲେ ଏବଂ ତଥା ୬୫ ଓ ୬୭ ରନର ଅର୍ଦ୍ଧଶତକୀୟ ଇନିଂସ ଖେଳିଥିଲେ ।

ଏହି ସମଗ୍ର ସିରିଜରେ ଗୋଟିଏ ଇନିଂସ ବ୍ୟତୀତ ଗାଭାସ୍କର ପ୍ରତ୍ୟେକ ଇନିଂସରେ ୫୦ରୁ ଅଧିକ ରନ୍ ସଂଗ୍ରହ କରିଥିଲେ । ଏଥିରେ ୪ଟି ଶତକ ସାମିଲ ଥିଲା । ପୋର୍ଟ ଅଫ୍ ସ୍ପେନରେ ଖେଳାଯାଇଥିବା ସିରିଜର ପଞ୍ଚମ ତଥା ଅନ୍ତିମ ଟେଷ୍ଟ ମ୍ୟାଚରେ ସେ ଅନେକ ରେକର୍ଡ ସୃଷ୍ଟି କରିଥିଲେ । ଏହି କାରଣରୁ ଏହି ସିରିଜରେ ଗାଭାସ୍କରଙ୍କ ପ୍ରଦର୍ଶନ ଦ୍ୱାରା ଅନୁପ୍ରାଣିତ ହୋଇ ତ୍ରିନିଦାଦର ଲର୍ଡ ରିଲେଟର ଅର୍ଥାତ୍ ୱିଲାର୍ଡ ହାରିସ୍ କାଲିପ୍ସୋ ଲେଖିଥିଲେ ଯେ ୱେଷ୍ଟଇଣ୍ଡିଜ୍ ଗାଭାସ୍କରଙ୍କୁ ଆଉଟ ହିଁ କରିପାରିବେ ନାହିଁ ।