ଉତ୍ପତ୍ତି ସ୍ଥଳ ଏବେ ୧୩ ନମ୍ବରରେ...

ନୂଆଦିଲ୍ଲୀ: ବିଶ୍ୱବ୍ୟାପୀ କୋରୋନା ଆକ୍ରାନ୍ତଙ୍କ ସଂଖ୍ୟା ଅଧା କୋଟି ଆଡ଼କୁ ମୁହାଁଇଲାଣି । ଏପର୍ଯ୍ୟନ୍ତ ୪୮ଲକ୍ଷ ୧ ହଜାର ୫୩୨ ଜଣ କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହିପରି ୩ ଲକ୍ଷ ୧୬ ହଜାର ୬୬୦ ଜଣଙ୍କ ମୃତ୍ୟୁ ମଧ୍ୟ ହେଲାଣି । ହେଲେ ଗୁରୁତ୍ୱପୂର୍ଣ୍ଣ କଥା ହେଉଛି, ଯେଉଁଠି ଠାବ ହୋଇଥିଲା ଏହି ଭାଇରସ୍, ସେ ଏବେ ୧୩ ନମ୍ବରରେ । ଅର୍ଥାତ ୧୨ ଦେଶ ଏବେ କୋରୋନା ଆକ୍ରାନ୍ତଙ୍କ ସଂଖ୍ୟା ଦୃଷ୍ଟିରୁ ଚୀନର ଉପରେ । 

କୋରୋନା ଚୀନଠୁ ଠାବ ହୋଇଥିଲା, ଚୀନରେ ଭାଇରାଲ ହୋଇଥିଲା ସତ । ହେଲେ ଏହାକୁ ନିୟନ୍ତ୍ରଣ କରବାରେ ଏହି ଦେଶ ପୁରା ସଫଳ ହୋଇଗଲାଣି । ଏବେ ଚୀନରେ ମାତ୍ର ୮୨ଟି ଆକ୍ଟିଭ ମାମଲା ରହିଛି । ସମୁଦାୟ ୮୨୯୫୪ ମାମଲା ଚିହ୍ନଟ ହୋଇଥିଲେ । ସେମାନଙ୍କ ମଧ୍ୟରୁ ୭୮୨୩୮ ଜଣ ସୁସ୍ଥ ହେଲେଣି । ମୃତ୍ୟୁ ସଂଖ୍ୟା ୪୬୩୪ ରହିଛି । ମାତ୍ର ଏବେ ଚୀନ ସ୍ଥିତି ଗୋଟିଏ ପ୍ରକାର ସ୍ୱାଭାବିକ ହୋଇସାରିଛି । ଯେଉଁ ଉହାନ ସହରରେ ଏହି ଭାଇରସ୍ ତାଣ୍ଡବ ରଚିଥିଲେ, ସେଠି ମଧ୍ୟ ଜୀବନ ଯାତ୍ରା ସ୍ୱାଭାବିକ ହୋଇଗଲାଣି । 

ଅନ୍ୟପଟେ ୧୨ ଦେଶ ଆକ୍ରାନ୍ତଙ୍କ ସଂଖ୍ୟାରେ ଚୀନକୁ ଅତିକ୍ରମ କରିସାରିଲେଣି । ପ୍ରଥମେ ରହିଛି ଆମେରିକା । ଆକ୍ରାନ୍ତଙ୍କ ସଂଖ୍ୟା ୧୫ଲକ୍ଷ ଉପରେ । ଦ୍ୱିତୀୟରେ ଋଷ । ସେଠି ଆକ୍ରାନ୍ତଙ୍କ ସଂଖ୍ୟା ୩ ଲକ୍ଷ ଆଡ଼କୁ ମୁହାଁଇଲାଣି । ତଳକୁ ତଳ ସ୍ପେନ, ୟୁକେ, ବ୍ରାଜିଲ, ଇଟାଲୀ, ଫ୍ରାନ୍ସ, ଜର୍ମାନୀ, ତୁର୍କୀ, ଇରାନ୍, ଭାରତ ଓ ପେରୁ ରହିଛନ୍ତି । ଅର୍ଥାତ କୋରୋନା ଆକ୍ରାନ୍ତଙ୍କ ସଂଖ୍ୟାରେ ଭାରତର ସ୍ଥାନ ଏବେ ୧୧ ନମ୍ବର ସ୍ଥାନରେ ରହିଛି ।