 "Operation Chakra V: ଅପରେସନ୍ ଚକ୍ର: ମାଇକ୍ରୋସଫ୍ଟ ନାଁ କହି ଜାପାନୀଙ୍କୁ ଲୁଟୁଥିଲେ,୬ ଗିରଫ")
)
Operation Chakra V: ମାଇକ୍ରୋସଫ୍ଟ ଏବଂ ଅନ୍ୟ ବହୁରାଷ୍ଟ୍ରୀୟ କମ୍ପାନୀର କଲ୍ ସେଣ୍ଟର ନାଁ କହି ବିଦେଶୀ ନାଗରିକଙ୍କୁ ସର୍ବସ୍ୱାନ୍ତ କରୁଥିବା ଅଭିଯୋଗରେ ୬ ଜଣଙ୍କୁ ଗିରଫ କରିଛି କେନ୍ଦ୍ରୀୟ ତଦନ୍ତ ବ୍ୟୁରୋ ସିବିଆଇ। ଦିଲ୍ଲୀ, ହରିୟାଣା ଏବଂ ଉତ୍ତର ପ୍ରଦେଶର ୧୯ଟି ସ୍ଥାନରେ ଚଢ଼ଉ କରି ଏହି ଅଭିଯୁକ୍ତଙ୍କୁ ତଥ୍ୟ ଓ ପ୍ରମାଣ ସହକାରେ ଗିରଫ କରାଯାଇଥିବା ସିବିଆଇ ପ୍ରକାଶ କରିଛି।
ଦେଶର ମାଟିକୁ ବ୍ୟବହାର କରି ସାମା ବାହାରେ ବିଦେଶୀ ନାଗରିକଙ୍କୁ ସାଇବର ଆକ୍ରମଣ କରୁଥିଲେ ଏହି ୬ ବ୍ୟକ୍ତି। ଏଣୁ ସିବିଆଇ ନିଜ ପକ୍ଷରୁ ଏକ ମାମଲା ରୁଜୁ କରି ମାଇକ୍ରୋସଫ୍ଟ ଏବଂ ଜାପାନର ତଦନ୍ତକାରୀ ସଂସ୍ଥା (ଏନ୍ପିଏ)ର ମିଳିତ ସହଯୋଗରେ ଏହି ସାଇବର ଅପରାଧର କେନ୍ଦ୍ରଗୁଡ଼ିକୁ ଚିହ୍ନଟ କରିବା ଅପରେସନ୍ ଆରମ୍ଭ ହୋଇଥିଲା। ଏହି ସ୍ୱତନ୍ତ୍ର ଅପରେସନ୍ର ନାଁ ରହିଛି ‘ ଅପରେସନ୍ ଚକ୍ର ଭି’। ଏଥିରେ ଗିରଫ ହୋଇଥିବା ୬ ଅଭିଯୁକ୍ତ ହେଉଛନ୍ତି ଦିଲ୍ଲୀର ଆଶୁ ସିଂହ, ପାନିପତର କପିଲ ଗାଖର, ଅଯୋଧ୍ୟାର ରୋହିତ ମୌର୍ଯ୍ୟ, ବାରଣାସୀର ଶୁଭମ ଜୈଶ୍ୱାଲ, ବିବେକ ରାଜ ଏବଂ ଆଦର୍ଶ କୁମାର।
ସିବିଆଇ ସୂଚନା ଅନୁସାରେ, ଗିରଫ ହୋଇଥିବା ଅଭିଯୁକ୍ତମାନେ କଲ୍ ସେଣ୍ଟର ମାଧ୍ୟମରେ ଜାପାନୀ ନାଗରିକଙ୍କୁ ଟାର୍ଗେଟ କରୁଥିଲେ। ସେମାନେ ବେଶ୍ ପ୍ରଫେସନାଲ୍ ଭାବେ ମାଇକ୍ରୋସଫ୍ଟର ସେବା ଦାତା ବୋଲି ନିଜକୁ ପରିଚୟ ଦେଉଥିଲେ ଏବଂ ସେମାନଙ୍କ ଭିତରେ ବିଶ୍ୱାସ ଜନ୍ମାଉଥିଲେ। ଏହା ପରେ ତାଙ୍କ କମ୍ପ୍ୟୁଟରକୁ ହ୍ୟାକ୍ କରି ଗୁରୁତ୍ୱପୂର୍ଣ୍ଣ ସୂଚନା ଅକ୍ତିଆର କରୁଥିଲେ। ତା’ ସହ ବ୍ୟାଙ୍କ ଆକାଉଣ୍ଟରୁ ଅର୍ଥ ଲୁଟୁଥିଲେ। ଏହି ଅଭିଯୋଗ ସାଂଘାତିକ ହୋଇଥିବାରୁ ସିବିଆଇ ଏହାକୁ ଗୁରୁତ୍ୱ ପ୍ରଦାନ କରିଥିଲା। ନିଜ ପକ୍ଷରୁ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ଏକ ପ୍ରେସ ବିଜ୍ଞପ୍ତିରେ ଜଣାଇଛି।
