Ceasefire Voilation: ପାକିସ୍ତାନ ଅସ୍ତ୍ରବିରତି ଉଲ୍ଲଂଘନ କରିଛି: ବିକ୍ରମ ମିଶ୍ରୀ

ବୈଦେଶିକ ସଚିବ ବିକ୍ରମ ମିଶ୍ରୀ ପ୍ରେସମିଟରେ କହିଛନ୍ତି ଯେ, ପାକିସ୍ତାନ ଦ୍ୱାରା ଅସ୍ତ୍ରବିରତି ଉଲ୍ଲଂଘନ ହୋଇଛି, ସେନା ବର୍ତ୍ତମାନ ପରିସ୍ଥିତି ଉପରେ କଡ଼ା ନଜର ରଖିଛି। ସେନାକୁ ଠୋସ୍ ପଦକ୍ଷେପ ନେବାକୁ ନିର୍ଦ୍ଦେଶ ଦିଆଯାଇଛି।

Ceasefire Voilation: ଭାରତ ଏବଂ ପାକିସ୍ତାନ ମଧ୍ୟରେ ଅସ୍ତ୍ରବିରତି ଘୋଷଣା ପରେ ମଧ୍ୟ ପାକିସ୍ତାନ ପଟୁ ଏହାର ଉଲ୍ଲଂଘନ ଦେଖିବାକୁ ମିଳିଛି । ଏହା ଉପରେ କଠୋର ଆଭିମୁଖ୍ୟ ଗ୍ରହଣ କରି ଭାରତ ପକ୍ଷରୁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି । ବୈଦେଶିକ ସଚିବ ବିକ୍ରମ ମିଶ୍ରୀ ପାକିସ୍ତାନକୁ ସ୍ପଷ୍ଟ ବାର୍ତ୍ତା ଦେଇ କହିଛନ୍ତି ଯେ, ଭାରତୀୟ ସେନା ସମ୍ପୂର୍ଣ୍ଣ ପରିସ୍ଥିତି ଉପରେ ନଜର ରଖିଛି । ଯେକୌଣସି ଆକ୍ରମଣର ଉଚିତ ଜବାବ ଦେବାକୁ ଭାରତ ପ୍ରସ୍ତୁତ ରହିଛି ।

ମିଶ୍ରି ଏକଥା ମଧ୍ୟ କହିଛନ୍ତି ଯେ, "ପାକିସ୍ତାନ ନିରନ୍ତର ଅସ୍ତ୍ରବିରତି ଉଲ୍ଲଂଘନ କରୁଛି ଏବଂ ଆମର ସେନା ପରିସ୍ଥିତିର ମୁକାବିଲା କରିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ । ଆବଶ୍ୟକ ସ୍ଥଳେ ଠୋସ୍ ପଦକ୍ଷେପ ନେବାକୁ ସେନାକୁ ନିର୍ଦ୍ଦେଶ ଦିଆଯାଇଛି। ପାକିସ୍ତାନ ଏହି ପରିସ୍ଥିତିକୁ ଠିକ୍ ଭାବରେ ବୁଝି ଏହାକୁ ବନ୍ଦ କରିବା ପାଇଁ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ।"

ସୂଚନାଯୋଗ୍ୟ, ଭାରତ ଏବଂ ପାକିସ୍ତାନ ମଧ୍ୟରେ ୮୬ ଘଣ୍ଟା ଧରି ଚାଲିଥିବା ଯୁଦ୍ଧ ଆଜି ସନ୍ଧ୍ୟା ୫ଟାରେ ଶେଷ ହୋଇଥିଲା। ଦୁଇ ଦେଶ ମଧ୍ୟରେ ଯୁଦ୍ଧବିରତି ପାଇଁ ରାଜିନାମା କରାଯାଇଥିଲା । କିନ୍ତୁ ଏହାର ମାତ୍ର ୩ ଘଣ୍ଟା ପରେ ପାକିସ୍ତାନ ଅସ୍ତ୍ରବିରତି ଉଲ୍ଲଂଘନ କରିଥିବା ଖବର ଆସିଛି । ଜମ୍ମୁ-କାଶ୍ମୀରରେ ପାକିସ୍ତାନ ପକ୍ଷରୁ ଉତ୍ତେଜନାମୂଳକ କାର୍ଯ୍ୟକଳାପ ପୁଣି ଥରେ ଆରମ୍ଭ ହୋଇଛି। ଶନିବାର ରାତିରେ, ପାକିସ୍ତାନ ଅନେକ ଅଞ୍ଚଳରେ ଅସ୍ତ୍ରବିରତି ଉଲ୍ଲଂଘନ କରି ଗୁଳିବର୍ଷା କରିଛି । କାଶ୍ମୀରର ବାରାମୁଲ୍ଲା ଜିଲ୍ଲାରେ ଡ୍ରୋନ ବିସ୍ଫୋରଣ ଘଟିଛି।

Add Zee News as a Preferred Source

ସୂଚନା ଅନୁଯାୟୀ, ପାକିସ୍ତାନ ଅଖନୁର, ରାଜୌରୀ ଏବଂ ଆରଏସ ସୀମାରେ ଆକ୍ରମଣ କରିଛି। ଜମ୍ମୁର ପଲାନୱାଲା ସେକ୍ଟରରେ ମଧ୍ୟ ପାକିସ୍ତାନ ଅସ୍ତ୍ରବିରତି ଉଲ୍ଲଂଘନ କରିଛି। ତେଣୁ, ଭାରତୀୟ ସେନାକୁ ଉପଯୁକ୍ତ ଜବାବ ଦେବାକୁ ନିର୍ଦ୍ଦେଶ ଦିଆଯାଇଛି। ପାକିସ୍ତାନର ଅସ୍ତ୍ରବିରତି ଉଲ୍ଲଂଘନର ଉଚିତ ଜବାବ ଦେବା ପାଇଁ ସରକାର ବିଏସଏଫକୁ କହିଛନ୍ତି। ଏହି ଘଟଣାଗୁଡ଼ିକ ପରେ, ଜମ୍ମୁର ବିଭିନ୍ନ ଅଞ୍ଚଳରେ ବ୍ଲାକଆଉଟ୍ ଜାରି କରାଯାଇଛି। ବାରାମୂଳାରେ ମଧ୍ୟ ବିଦ୍ୟୁତ୍ କାଟ ହୋଇଛି। ଶ୍ରୀନଗର ସମେତ ବିଭିନ୍ନ ଅଞ୍ଚଳରେ ବିଦ୍ୟୁତ୍ ସେବା ବିଚ୍ଛିନ୍ନ ହୋଇଛି।

ରାଜସ୍ଥାନର ପୋଖରାନକୁ ବହୁ ସଂଖ୍ୟକ ଡ୍ରୋନ ଆସିଥିବା ଖବର ମିଳିଛି । ଭାରତର ପ୍ରତିରକ୍ଷା ପ୍ରଣାଳୀ ସେଗୁଡିକୁ ଧ୍ୱଂସ କରୁଛି। ରାଜୌରୀରେ ମଧ୍ୟ ଗୁଳିଚାଳନା ହୋଇଥିବା ରିପୋର୍ଟ ରହିଛି। ପଞ୍ଜାବର ଅମୃତସର ଏବଂ ଫିରୋଜପୁରରେ ମଧ୍ୟ ବ୍ଲାକଆଉଟ୍ କରାଯାଇଛି।