ଅଗଷ୍ଟ ଶେଷ କିମ୍ବା ସେପ୍ଟେମ୍ବର ଆରମ୍ଭରେ ମୌସୁମୀ ଅଧିବେଶନ ! 'ଡିଜିଟାଲ ସଂସଦ'ର ସମ୍ଭାବନା

ନୂଆଦିଲ୍ଲୀ: କେବେଠୁ ଆରମ୍ଭ ହେବ ସଂସଦର ମୌସୁମୀ ଅଧିବେଶନ ? କୋରୋନା ସଙ୍କଟ ମଧ୍ୟରେ ମୌସୁମୀ ଅଧିବେଶନ ନେଇ ସରକାର ପ୍ରସ୍ତୁତି କରୁଛନ୍ତି । ସୂତ୍ର ଅନୁସାରେ, ଅଗଷ୍ଟ ଶେଷ କିମ୍ବା ସେପ୍ଟେମ୍ବର ଆରମ୍ଭରେ ଏହା କରିବା ନେଇ ବିଚାର କରାଯାଉଛି । ତେବେ ଅଧିବେଶନ ସମୟରେ ସଂସଦରେ ସାମାଜିକ ଦୂରତ୍ୱ କିପରି ବଜାୟ ରହିବ, ତାହା ବଡ଼ ଚ୍ୟାଲେଞ୍ଜ । ତେଣୁ 'ଡିଜିଟାଲ ସଂସଦ'ର ସମ୍ଭାବନାଟିଏ ମଧ୍ୟ ସୃଷ୍ଟି ହେଉଛି । 

ସୂତ୍ର ଅନୁସାରେ, କୋରୋନା ଭାଇରସ ତୀବ୍ର ଗତିରେ ବଢ଼ୁଥିବା ଯୋଗୁ ସଂସଦର ମୌସୁମୀ ଅଧିବେଶନ ଡକାଯିବାର ନିଷ୍ପତ୍ତି ହୋଇପାରୁନାହିଁ । କାହିଁକିନା ସଂସଦର ଅଧିବେଶନ ବେଳେ ସାମାଜିକ ଦୂରତ୍ୱ ବଜାୟ ରଖିବା ଏକ ବଡ଼ ଚ୍ୟାଲେଞ୍ଜ ହେବ । ତେବେ ମୌସୁମୀ ଅଧିବେଶନ କେତେ ଦିନ ଚାଲିବ ଏବଂ କେମିତି ଚାଲିବ, ଏହା ଅଧିବେଶନ ଆରମ୍ଭ ହେବା ବେଳର ସ୍ଥିତି ଉପରେ ନିର୍ଭର କରିବ । 

ତେବେ ସରକାରଙ୍କ ଏକ ବରିଷ୍ଠ ଅଧିକାରୀ କହିଛନ୍ତି, ସେପ୍ଟେମ୍ବର ୨୨ ପୂର୍ବରୁ ମୌସୁମୀ ଅଧିବେଶନ ଆରମ୍ଭ ହେବା କଥା । କାହିଁକିନା ଦୁଇ ଅଧିବେଶନ ମଧ୍ୟରେ ୬ ମାସରୁ ଅଧିକ ବ୍ୟବଧାନ ରଖାଯାଇପାରିବ ନାହିଁ । ଏହା ପୂର୍ବରୁ ସଂସଦରେ ବଜେଟ ଅଧିବେଶନ ହୋଇଥିଲା । ଏହା ୩ ଏପ୍ରିଲ ପର୍ଯ୍ୟନ୍ତ ଚାଲିବାକୁ ଥିଲା । ମାତ୍ର ୨୩ ଏପ୍ରିଲରେ ଏହାକୁ ଅନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ସ୍ଥଗିତ ରଖାଯାଇଥିଲା । 

ତେବେ ସାମାଜିକ ଦୂରତ୍ୱ ବଜାୟ ରଖିବା ସହ ସଂସଦ ଚଳାଇବା ଉପରେ ବିଚାର କରୁଛନ୍ତି ଲୋକସଭା ବାଚସ୍ପତି ଓମ ବିର୍ଲା ଏବଂ ଉପରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ଭେଙ୍କୟା ନାଇଡୁ । ହୋଇପାରେ, ଆଗକୁ 'ଡିଜିଟାଲ ସଂସଦ'ର ସମ୍ଭାବନାକୁ ବିକଳ୍ପ ଭାବେ ନିଆଯିବ । କାହିଁକିନା ସାମାଜିକ ଦୂରତ୍ୱ ସହ ଅଧିବେଶନ ବସିବାକୁ ହେଲେ ସଂସଦ ଭିତରେ ସମ୍ଭବ ହୋଇନପାରେ ।