ଏହି ରାଜ୍ୟର ଲୋକଙ୍କୁ ୧ ବର୍ଷ ଯାଏ ପାଳନ କରିବାକୁ ହେବ କୋଭିଡ-19ର ଗାଇଡଲାଇନ୍

ନୂଆଦିଲ୍ଲୀ: ଦେଶରେ ଜାରି ଥିବା କୋରୋନା ସଙ୍କଟ ମଧ୍ୟରେ କେରଳର ପିନାରାଇ ବିଜୟନ ସରକାର ଏକ ବର୍ଷ ପାଇଁ କୋଭିଡ-19 ପାଇଁ ଜାରି କରାଯାଇଥିବା ଗାଇଡଲାଇନ୍ ବା ନିର୍ଦ୍ଦେଶାବଳୀ ପାଳନ କରିବା ବାଧ୍ୟତାମୂଳକ କରିଛନ୍ତି । ଆସନ୍ତା ୧ ବର୍ଷ ପାଇଁ କୋରୋନା ଭାଇରସ ମହାମାରୀର ସୁରକ୍ଷା ନିୟମ ଲାଗୁ ରହିବ ବୋଲି କେରଳ ସରକାର ରବିବାର କହିଛନ୍ତି । ସାର୍ବଜନୀନ ଓ ସାମାଜିକ ଦୂରତାରେ ମାସ୍କ କିମ୍ବା ଫେସ୍ କଭର ପିନ୍ଧିବା ହେଉଛି ଅନ୍ୟତମ ନିୟମ, ଯାହା ପାଳନ କରାଯିବା ଆବଶ୍ୟକ । ଏପରି ନିୟମ କରିଥିବା କେରଳ ଦେଶର ପ୍ରଥମ ରାଜ୍ୟ ହୋଇପାରିଛି ।

ଏହାର ଅର୍ଥ କାର୍ଯ୍ୟସ୍ଥଳରେ ମାସ୍କ ପିନ୍ଧିବାକୁ ପଡିବ । ୬ ଫୁଟର ସାମାଜିକ ଦୂରତା ନିୟମ ଲାଗୁ ହେବ । ଏହା ବ୍ୟତୀତ କେବଳ ୫୦ ଜଣଙ୍କୁ ବିବାହ ଉତ୍ସବରେ ଯୋଗ ଦେବାକୁ ଅନୁମତି ଦିଆଯିବ । ଆସନ୍ତା ବର୍ଷ ପର୍ଯ୍ୟନ୍ତ କେବଳ ୨୦ ଜଣ ଲୋକ ଅନ୍ତିମ ସଂସ୍କାରରେ ଯୋଗ ଦେଇପାରିବେ ।

କର୍ତ୍ତୃପକ୍ଷଙ୍କ ଲିଖିତ ଅନୁମତି ବିନା କୌଣସି ସାମାଜିକ ସମାବେଶ, ଶୋଭାଯାତ୍ରା, ଧାରଣା ପ୍ରଦର୍ଶନ କିମ୍ବା କୌଣସି ପ୍ରକାରର ସଂଗଠନ ବା ଆୟୋଜନ ହୋଇପାରିବ ନାହିଁ । ଏହାସହ ଅନୁମତି ପରେ ମଧ୍ୟ ୧୦ରୁ ଅଧିକ ଲୋକ ଏହିପରି ସମାରୋହରେ ଅଂଶଗ୍ରହଣ କରିପାରିବେ ନାହିଁ । ସୂଚନାଯୋଗ୍ୟ, ଭାରତରେ କୋରୋନା ଭାଇରସର ପ୍ରଥମ ମାମଲା ଚଳିତ ବର୍ଷ ଜାନୁଆରୀ ମାସରେ କେରଳରୁ ଆସିଥିଲା । ବର୍ତ୍ତମାନ କେରଳରେ ୫ ହଜାର ୨୦୦ରୁ ଅଧିକ କୋରୋନା ସଂକ୍ରମଣ ମାମଲା ରହିଛି । ବର୍ତ୍ତମାନ ପର୍ଯ୍ୟନ୍ତ ରାଜ୍ୟରେ କୋରୋନା ଯୋଗୁଁ ୨୫ ଜଣ ପ୍ରାଣ ହରାଇଛନ୍ତି । ବର୍ତ୍ତମାନ ରାଜ୍ୟରେ ୨,୧୩୧ ସକ୍ରିୟ କୋରୋନା ମାମଲା ରହିଛି । ବର୍ତ୍ତମାନ ସୁଦ୍ଧା ୩,୦୪୮ କୋରୋନା ସଂକ୍ରମିତଙ୍କୁ ଚିକିତ୍ସା ପରେ ଡିସଚାର୍ଜ କରାଯାଇଛି ।