ନିଜେ ନିଜକୁ ଲକଡାଉନ ଘୋଷଣା କଲେ ଏହି ସହରବାସୀ

ରାୟଗଡ଼: ଆପଣ ଜନତା କର୍ଫ୍ୟୁ ବିଷୟରେ ଜାଣିଥିବେ । ପ୍ରଧାନମନ୍ତ୍ରୀଙ୍କ ଆହ୍ୱାନ ପରେ ଗୋଟିଏ ଦିନ ପାଇଁ ନିଜ ଆଡ଼ୁ ଲୋକେ ଘରେ ରହିବାକୁ ମନସ୍ତ କରିଥିଲେ । ପୁରା ଦେଶରେ ଗୋଟିଏ ଦିନ ଜନତା କର୍ଫ୍ୟୁ ଲାଗୁ ହୋଇଥିଲା । ଆଉ ଏବେ କୋରୋନା ମୁକାବିଲା କରିବାକୁ ଯାଇ ନିଜ ଆଡ଼ୁ ଲକଡାଉନ ଘୋଷଣା କରିଛନ୍ତି ସହରବାସୀ । ଦିନେ କି ଦୁଇଦିନ ପାଇଁ ନୁହେଁ, ଦୀର୍ଘ ୮ ଦିନ ପାଇଁ ଲକଡାଉନ କରିବାକୁ ନିଷ୍ପତ୍ତି ନେଇଛନ୍ତି ।

ଆମେ କହୁଛୁ ମହାରାଷ୍ଟ୍ର ସଟେ ଜିଲ୍ଲାର ମଗାଡ଼ ସହର କଥା । ଏହି ସହରରେ ୮ ଦିନ ପାଇଁ ଲକଡାଉନ ଘୋଷଣା କରାଯାଇଛି । ସରକାର କି ପ୍ରଶାସନ ପକ୍ଷରୁ ନୁହେଁ, ସହରବାସୀ ନିଜେ ନିଜ ଆଡ଼ୁ ଏହି ଲକଡାଉନ୍ ଘୋଷଣା କରିଛନ୍ତି । 

ନିଜେ ନିଜ ଆଡ଼ୁ କିପରି କଲେ ଲକଡାଉନ୍ ?

ଏପ୍ରଶ୍ନ ଆପଣଙ୍କ ଭିତରେ ଉଠିବା ସ୍ୱାଭାବିକ କଥା । ତେବେ ଲକଡାଉନ ଲାଗୁ କରିବା ପାଇଁ ବିଭିନ୍ନ ରାଜନୈତିକ ଦଳର କାର୍ଯ୍ୟକର୍ତ୍ତା, ସାମାଜିକ କର୍ମୀ, ବ୍ୟବସାୟୀ ପ୍ରତିନିଧି, ଦୋକାନୀ ଇତ୍ୟାଦି ଏକ ବୈଠକ କରିଥିଲେ । କୋରୋନା ମୁକାବିଲା କରିବା ପାଇଁ ନିଜଆଡ଼ୁ ଲକଡାଉନ କରିବାକୁ ନିଷ୍ପତ୍ତି ନେଇଥିଲେ ଏମାନେ । ଏଥିରେ ସମସ୍ତେ ସହମତି ମଧ୍ୟ ପ୍ରକାଶ କରିଥିଲେ । ତେବେ ଲକଡାଉନ ସମୟରେ ଅତ୍ୟାବଶ୍ୟକ ସେବା ଯେପରି ପ୍ରଭାବିତ ନହୁଏ, ସେଉପରେ ମଧ୍ୟ ଧ୍ୟାନ ଦିଆଯାଇଛି । 

ବୈଠକରେ ଯେଉଁ ନିଷ୍ପତ୍ତି ହୋଇଛି, ସେହି ଅନୁସାରେ ପ୍ରତ୍ୟେକ ଦିନ ସକାଳ ୧୦ଟା ପର୍ଯ୍ୟନ୍ତ କ୍ଷୀର ଦୋକାନ ଖୋଲିବ । ପରେ ଏହା ବନ୍ଦ ରହିବ । ସନ୍ଧ୍ୟା ସମୟରେ ମଧ୍ୟ କ୍ଷୀର ଦୋକାନ ଖୋଲାଯିବନାହିଁ । ଅନ୍ୟ ସମସ୍ତ ଦୋକାନ ପୁରା ୮ ଦିନ ପାଇଁ ବନ୍ଦ ରହିବ । ତେବେ ଔଷଧ ଦୋକାନ ୨୪x୭ ଖୋଲାରହିବ । କୋରୋନା ମୁକାବିଲା ପାଇଁ ନିଆଯାଇଥିବା ଏ ନିଷ୍ପତ୍ତିକୁ ବିଭିନ୍ନ ମହଲରେ ପ୍ରଶଂସା କରାଯାଉଛି । 

କହିରଖୁଛୁ, ରାୟଗଡ଼ର ଏହି ଅଞ୍ଚଳରେ ଏପର୍ଯ୍ୟନ୍ତ ୬୮ କୋରୋନା ଆକ୍ରାନ୍ତ ଚିହ୍ନଟ ହେଲେଣି । ଖାଲି ସେତିକି ନୁହେଁ, ୭ ଜଣଙ୍କ ମୃତ୍ୟୁ ମଧ୍ୟ ହେଲାଣି ।