ବଢିଚାଲିଛି ତୈଳଦର, ପେଟ୍ରୋଲ ୫୩ ଓ ଡିଜେଲ ୬୦ ପଇସା ବୃଦ୍ଧି

ନୂଆଦିଲ୍ଲୀ: ଦେଶରେ କୋରୋନା ସଂକଟ ବେଳେ ତୈଳଦର ବୃଦ୍ଧି ପାଇବାରେ ଲାଗିଛି। ଅନ୍ତର୍ଜାତୀୟ ସ୍ତରରେ ତୈଳଦରରେ ହ୍ରାସ ପାଇଥିଲେ ମଧ୍ୟ ତାହାର ପ୍ରଭାବ ଭାରତୀୟ ବଜାରରେ ସେତେ ମାତ୍ରାରେ ପଡୁନାହିଁ। ତେବେ ଭାରତୀୟ ବଜାରରେ ଲଗାତାର ୧୧ ଦିନ ପାଇଁ ତୈଳଦରରେ ବୃଦ୍ଧି ଘଟିଥିବା ଦେଖିବାକୁ ମିଳିଛି। ଆଜି ଅର୍ଥାତ ବୁଧବାର ଦିନ ପେଟ୍ରୋଲ ଓ ଡିଜେଲ ଉପରେ ଯଥାକ୍ରମେ ୫୩ ଓ ୬୦ ପଇସା ବୃଦ୍ଧି ଘଟିଛି। ତେବେ ବିଗତ ୧୧ ଦିନ ମଧ୍ୟରେ ପେଟ୍ରୋଲ ୬ ଟଙ୍କା ଓ ଡିଜେଲ ଲିଟର ପିଛା ୬.୪୦ ପଇସା ବୃଦ୍ଧି ହୋଇ ସାରିଲାଣି। 

ଇଣ୍ଡିଆନ ଅଏଲ(Indian Oil)ଓ୍ୱେବସାଇ ଅନୁଯାୟୀ ତୈଳଦର ବୃଦ୍ଧି ପରେ ଦିଲ୍ଲୀରେ ପେଟ୍ରୋଲ ଦର ୭୭.୨୮ ଟଙ୍କା ରହିଥିବା ବେଳେ ଡିଜେଲ ଲିଟର ପିଛା ୭୫.୭୯ ଟଙ୍କାରେ ବିକ୍ରି ହେଉଛି। ସେହିପରି ପେଟ୍ରୋଲ ଲିଟର ମୁମ୍ବାଇରେ ୮୪.୧୫ ଟଙ୍କା, ଚେନ୍ନାଇରେ ୮୦.୮୬ ଟଙ୍କା, କୋଲକାତାରେ ୭୯.୦୮ ଟଙ୍କାରେ ବିକ୍ରି ହେଉଛି।  ସେହିପରି ଡିଜେଲ ଦର ମୁମ୍ବାଇରେ ୭୪.୩୨ ଟଙ୍କା ରହିଥିବା ବେଳେ ଚେନ୍ନାଇରେ ୭୩.୬୯ ଟଙ୍କା, କୋଲକାତା ୭୧।୩୮ ଟଙ୍କା ରହିଛି।  

ଏଠାରେ କହି ରଖୁଛୁ ଯେ, ଲକଡାଉନ ସମୟରେ ଦେଶରେ ତୈଳଦରରେ କୌଣସି ପରିବର୍ତ୍ତନ ହୋଇନଥିଲା। ପ୍ରାୟ ୮୨ ଦିନ ଧରି ଏହି ଦର ସ୍ଥିର ରହିତିଲା। ୮୨ ଦିନ ପରେ କେନ୍ଦ୍ର ସରକାର ଦୈନିକ ତୈଳଦର ଉପରେ ଦର ନିର୍ଦ୍ଧାରଣ କରୁଛନ୍ତି। ତେବେ ରାଜ୍ୟ ସ୍ତରରେ ବିକ୍ରିକର ମୂଲ୍ୟ ଯୋଗ ହେବା ପରେ ବିଭିନ୍ନ ରାଜ୍ୟରେ ତୈଳଦର ଭିନ୍ନ ଭିନ୍ନ ରହିଛି। ଏହି ତୈଳଦର ପ୍ରତ୍ୟେକ ଦିନ ସକାଳ ୬ଟାରେ ଧାର୍ଯ୍ୟ କରାଯାଇଥାଏ।