କୋରୋନା ଭାଇରସ୍ ଆଜିର ନୁହେଁ, ଏହା ୧୯ ବର୍ଷ ପୂର୍ବେ ଚୀନରେ ବ୍ୟାପିଥିଲା!

ଗବେଷଣାରେ ଦାବି କରଯାଇଛି ଯେ କୋରୋନା ଭାଇରସର ପ୍ରଥମ ମାମଲା ୨୦୦୨ ରେ ରିପୋର୍ଟ କରାଯାଇଥିଲା । ଡେଲି ମେଲର ରିପୋର୍ଟ ଅନୁଯାୟୀ, ୨୦୦୨ ମସିହାରେ ଚୀନର ବେଜିଂରେ କୋରୋନାର ପ୍ରଥମ ମାମଲା ରିପୋର୍ଟ ହୋଇଥିଲା । ଏହାପରେ କୋରୋନା ସଂକ୍ରମଣ ଚୀନର ଗୁଆଙ୍ଗଡୋଙ୍ଗରେ ଥିବା ଅନେକ ରେଷ୍ଟୁରାଣ୍ଟର ରୋଷେୟା ଓ ମାଂସ ଦୋକାନର କଂସେଇ ମାନଙ୍କଠାରେ ଏହା ବ୍ୟାପି ଯାଇଥିଲା ।

ରିପୋର୍ଟ ଅନୁଯାୟୀ, ଏହି ସମୟରେ କୋରୋନାର ଲକ୍ଷଣ ମଧ୍ୟ ଦେଖାଯାଇଥିଲା । କୋରୋନାରେ ସଂକ୍ରମିତ ହୋଇଥିବା ରୋଷେୟା ଓ କଂସେଇ ମାନଙ୍କଠାରେ ନିଶ୍ୱାସ-ପ୍ରଶ୍ୱାସ ଅସୁବିଧା ହୋଇଥିଲା । ସଂକ୍ରମିତ ବ୍ୟକ୍ତିଙ୍କ ଠାରେ ଜ୍ୱର ମଧ୍ୟ ହୋଇଥିଲା । 

ସେତେବେଳେ ଚୀନରେ ଏହି ସଂକ୍ରମଣ ଡାକ୍ତରମାନଙ୍କୁ ଚିନ୍ତାରେ ପକାଇଥିଲା । ରୋଗୀମାନଙ୍କର ଯତ୍ନ ନେଉଥିବା ଲୋକମାନେ ମଧ୍ୟ ସଂକ୍ରମିତ ହେଉଥିଲେ କିନ୍ତୁ କୌଣସି ପ୍ରକାରେ ସେହି ସମୟରେ ସଂକ୍ରମଣକୁ ନିୟନ୍ତ୍ରଣ କରାଯାଇଥିଲା ।

ରିପୋର୍ଟରେ ଦର୍ଶାଯାଇଛି, 'ସେତେବେଳେ ଏହା ଏକ ଚେତାବନୀ ଥିଲା, ଯାହାକୁ ଅଣଦେଖା କରାଯିବା ଭୁଲ ଥିଲା । ଆଜି ବିଶ୍ୱ ଏଥିପାଇଁ ତାହାର ମୂଲ୍ୟ ଦେଉଛି ।

୨୦୦୨ ରେ କୋରୋନାକୁ ନିୟନ୍ତ୍ରଣ କରିବା ପରେ, ୨୦୧୯ ରେ ପୁଣି ଥରେ କୋରୋନା ଭୂତାଣୁ ଦେଖା ଦେଇଥିଲା । ଏଥର କୋରୋନାର ଭାରିଏଣ୍ଟ ଅତ୍ୟନ୍ତ ବିପଜ୍ଜନକ ଥିଲା ଓ ଏହି କୋରୋନା ଚୀନ୍ ସହିତ ସମଗ୍ର ବିଶ୍ୱକୁ ବ୍ୟାପି ଯାଇଥିଲା ।