କୋରୋନା ସଙ୍କଟ: ଦ୍ୱିତୀୟ ରିହାତି ପ୍ୟାକେଜ ଘୋଷଣା କରିପାରନ୍ତି ମୋଦି ସରକାର

ନୂଆଦିଲ୍ଲୀ: କୋରୋନା ଭାଇରସ ସଂକ୍ରମଣକୁ ରୋକିବା ପାଇଁ ସାରା ଦେଶରେ ଲାଗୁ ହୋଇଛି ଲକଡାଉନ । ଫଳରେ ଏହି ସଙ୍କଟ ସମୟରେ ଶିଳ୍ପକୁ ଦ୍ୱିତୀୟ ରିଲିଫ୍ ପ୍ୟାକେଜ୍ ଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଗୃହମନ୍ତ୍ରୀ ଅମିତ ଶାହା, ଅର୍ଥମନ୍ତ୍ରୀ ନିର୍ମଳା ସୀତାରମଣ ଓ ପ୍ରମୁଖ ମନ୍ତ୍ରୀ ତଥା ଅର୍ଥ ମନ୍ତ୍ରଣାଳୟର ଅଧିକାରୀମାନେ ଏକ ବୈଠକ କରିଛନ୍ତି । ଶନିବାର ଏହାର ସୂଚନା ସୂତ୍ରରୁ ମିଳିଛି । ସୂତ୍ରରୁ ପ୍ରକାଶ ଯେ ଶାହା ଏବଂ ସୀତାରମଣଙ୍କ ସହ ପ୍ରଧାନମନ୍ତ୍ରୀଙ୍କ ସହ ଆଲୋଚନା ହୋଇଥିଲା । ମାଇକ୍ରୋ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ (ଏମଏସଏମଇ) ପରି ଅନ୍ୟାନ୍ୟ ପ୍ରମୁଖ ମନ୍ତ୍ରଣାଳୟର ମନ୍ତ୍ରୀମାନଙ୍କ ସହ ସେ ବୈଠକ ମଧ୍ୟ କରିବେ ।

ଶନିବାର ଅର୍ଥ ମନ୍ତ୍ରଣାଳୟ ପରେ ପ୍ରଧାନମନ୍ତ୍ରୀ ମୋଦୀଙ୍କୁ ଅର୍ଥନୀତିର ସ୍ଥିତି ଏବଂ ଏହାକୁ ପରିଚାଳନା କରିବା ପାଇଁ ମନ୍ତ୍ରଣାଳୟ ଦ୍ୱାରା ସମ୍ଭାବ୍ୟ ପଦକ୍ଷେପ ସମ୍ପର୍କରେ ବିସ୍ତୃତ ଉପସ୍ଥାପନା କରିବାକୁ ଯାଉଛି । ମନ୍ତ୍ରଣାଳୟ ଶୁକ୍ରବାର ଦ୍ରବ୍ୟ ଏବଂ ସେବା କର (ଜିଏସଟି) ସଂଗ୍ରହ ଉପରେ ମାସିକ ତଥ୍ୟ ପ୍ରକାଶନକୁ ସ୍ଥଗିତ ରଖିଛି । ଶୁକ୍ରବାର ପ୍ରଧାନମନ୍ତ୍ରୀ ବେସାମରିକ ବିମାନ ଚଳାଚଳ, ଶ୍ରମ ଏବଂ ଶକ୍ତି ସମେତ ବିଭିନ୍ନ ମନ୍ତ୍ରଣାଳୟ ସହିତ ବୈଠକ କରିଥିଲେ । ଘରୋଇ ତଥା ବିଦେଶୀ ପୁଞ୍ଜି ବିନିଯୋଗକୁ ଆକର୍ଷିତ କରିବା ଏବଂ ଦେଶରେ ଛୋଟ ବ୍ୟବସାୟର ପୁନର୍ଜୀବନ ଉପରେ ଧ୍ୟାନ ଦେବା ପାଇଁ ସେ ଗୁରୁବାର ବାଣିଜ୍ୟ ମନ୍ତ୍ରଣାଳୟ ଏବଂ ଏମଏସଏମଇ ସହିତ ବିସ୍ତୃତ ଆଲୋଚନା କରିଥିଲେ ।

ଏହି ବୈଠକରେ ମୋଦିଙ୍କ ସହ ଉଭୟ ଗୃହମନ୍ତ୍ରୀ ଏବଂ ଅର୍ଥମନ୍ତ୍ରୀ ଉପସ୍ଥିତ ଥିଲେ । ମାର୍ଚ୍ଚ ମାସ ଶେଷରେ ଗରିବ, ମହିଳା ଏବଂ ବୃଦ୍ଧମାନଙ୍କ ପାଇଁ ସରକାର ୧.୭ ଲକ୍ଷ କୋଟି ଟଙ୍କା ପ୍ରୋତ୍ସାହନ ପ୍ୟାକେଜ୍ ଘୋଷଣା କରିଥିଲେ । ସୂତ୍ରରୁ ମିଳିତ ଖବର ଅନୁସାରେ, ସରକାର ଅତିଶୀଘ୍ର ପ୍ରଭାବିତ ଉଦ୍ୟୋଗ ପାଇଁ ଦ୍ୱିତୀୟ ପ୍ରତ୍ସୋହନ ପ୍ୟାକେଜ ଘୋଷଣା କରିପାରନ୍ତି ।