'ଦିନକୁ ୫ଥର ହନୁମାନ ଚାଳିସା ପାଠ କଲେ ଦୂରେଇ ଯିବ କୋରୋନା'

ଭୋପାଲ: ଦେଶରେ କୋରୋନା ମାମଲା ତୀବ୍ର ଗତିରେ ବଢ଼ିଚାଲିଛି । ଏବେ ଆକ୍ରାନ୍ତଙ୍କ ସଂଖ୍ୟା ପାଖାପାଖି ୧୩.୫ଲକ୍ଷ ହୋଇଗଲାଣି । ଆଉ ଏହାରି ଭିତରେ ହନୁମାନ ଚାଳିସା(Hanuman Chalisa) ପାଠ କରିବା ପାଇଁ ଆଗ୍ରହ କରିଛନ୍ତି ବିଜେପି ସାଂସଦ ପ୍ରଜ୍ଞା ସିଂହ ଠାକୁର । ଅଗଷ୍ଟ ୫ ପର୍ଯ୍ୟନ୍ତ ପ୍ରତ୍ୟେକ ଦିନ ୫ଥର ଲେଖାଏଁ ହନୁମାନ ଚାଳିସା ପାଠ କରିବାକୁ ସେ ଲୋକଙ୍କୁ ଅପିଲ କରିଛନ୍ତି । ତାଙ୍କ କହିବା କଥା, ଏପରି କଲେ କୋରୋନା ଭାଇରସ ଦୁନିଆରୁ ସମାପ୍ତ ହୋଇଯିବ ।

ଏଠାରେ ଆମେ ଆପଣଙ୍କୁ କହିରଖୁଛୁ, ଅଯୋଧ୍ୟାରେ ରାମ ମନ୍ଦିର ନିର୍ମାଣ ପାଇଁ ଆସନ୍ତା ଅଗଷ୍ଟ ୫ରେ ଭୂମି ପୂଜା କରାଯିବ । ଏନେଇ ପ୍ରସ୍ତୁତି ଚାଲିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଏହି କାର୍ଯ୍ୟକ୍ରମରେ ସାମିଲ ହେବେ ବୋଲି ଜଣାପଡ଼ିଛି । 

ଭୋପାଲର ବିଜେପି ସାଂସଦ ପ୍ରଜ୍ଞା ଠାକୁର ଟ୍ୱିଟ କରି ଲେଖିଛନ୍ତି, ''କୋରୋନା ମହାମାରୀକୁ ସମାପ୍ତ କରିବା ସହ ସମସ୍ତଙ୍କର ସୁନ୍ଦର ସ୍ୱାସ୍ଥ୍ୟ ପାଇଁ ଆଧ୍ୟାତ୍ମକ ପ୍ରୟାସ କରିବା । ଆଜିଠୁ ଅଗଷ୍ଟ ୫ ପର୍ଯ୍ୟନ୍ତ ପ୍ରତ୍ୟେକ ଦିନ ସନ୍ଧ୍ୟା ୭ଟାରେ ନିଜ ନିଜ ଘରେ ୫ଥର ଲେଖାଏଁ ହନୁମାନ ଚାଳିସା ପାଠ କରିବା । ସେହିପରି ଅଗଷ୍ଟ ୫ରେ ରାମଲଲାଙ୍କ ଆରତୀ ସହ ଘରେ ଦୀପ ଜଳାଇ ଉଦ୍ୟାପନ କରିବା ।''

आइए हम सब मिलकर कोरोना महामारी को समाप्त करने के लिए लोगों के अच्छे स्वास्थ्य की कामना के लिए एक आध्यात्मिक प्रयास करें आज25 से 5 अगस्त तक प्रतिदिन शाम 7:00 बजे अपने घरों में हनुमान चालीसा का 5 बार पाठकरें5 अगस्त को अनुष्ठान का रामलला की आरती के साथ घरों में दीप जलाकर समापन करें pic.twitter.com/Ba0J2KrkA8

— Sadhvi Pragya singh thakur (@SadhviPragya_MP) July 25, 2020

ସେହିପରି ପ୍ରଜ୍ଞା ଠାକୁର ଟ୍ୱିଟରରେ ଏକ ଭିଡିଓ ସେୟାର କରି କହିଛନ୍ତି, କୋରୋନା ସଂକ୍ରମଣକୁ ରୋକିବା ପାଇଁ ମଧ୍ୟପ୍ରଦେଶ ସରକାର ଉଦ୍ୟମ କରୁଛନ୍ତି । ଭାପାଲରେ ଆସନ୍ତା ୪ ତାରିଖ ପର୍ଯ୍ୟନ୍ତ ଲକଡାଉନ କରାଯାଇଛି । 

ସେ ଆହୁରି ମଧ୍ୟ କହିଛନ୍ତି, ''ଯେତେବେଳେ ଦେଶବ୍ୟାପି ହିନ୍ଦୁ ଲୋକେ ଏକ ସ୍ୱରରେ ହନୁମାନ ଚାଳିସା ପାଠ କରିବେ, ତାହା ନିଶ୍ଚିତ ଭାବେ କାମ ଦେବ । ଆମେ ସମସ୍ତେ କୋରୋନା ଭାଇରସରୁ ମୁକ୍ତ ହୋଇପାରିବା ।''