ଦିଲ୍ଲୀ ନୁହେଁ, ୟୁପିରେ ରହିବେ ପ୍ରିୟଙ୍କା !

ନୂଆଦିଲ୍ଲୀ: ଦିଲ୍ଲୀ ଲୋଧି ରୋଡ ସ୍ଥିତ ସରକାରୀ ବଙ୍ଗଳା ଖାଲି କରିବାକୁ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରାକୁ ନୋଟିସ ପଠାଯାଇଛି । ଆଉ ଏହା ପରେ ସେ ଭିନ୍ନ ଏକ ପ୍ରସ୍ତୁତି କରୁଥିବା ସୂତ୍ରରୁ ଜଣାପଡ଼ିଛି । ଏଥର ଆଉ ଦିଲ୍ଲୀରେ ନୁହେଁ, ୟୁପିକୁ ସିପ୍ଟ ହୋଇପାରନ୍ତି ପ୍ରିୟଙ୍କା । ସେ ଖୁବଶୀଘ୍ର ଲକ୍ଷ୍ନୌ ସ୍ଥିତ କୌଲ ହାଉସକୁ ସିପ୍ଚ କରିବେ ବୋଲି ଚର୍ଚ୍ଚା ଜୋର ଧରିଛି । ସେପଟେ ଟ୍ୱିଟରରେ #UPWelcomesPriyanka ଟ୍ରେଣ୍ଡ କରୁଛି । 

ପ୍ରିୟଙ୍କା ଗାନ୍ଧୀ ଭଦ୍ରା ଦଳର ମହାସଚିବ ହେବା ସହ ୟୁପି ଦାୟିତ୍ୱରେ ମଧ୍ୟ ଅଛନ୍ତି । ତେଣୁ ଲକ୍ଷ୍ନୌ ସିପ୍ଟ ଖବର ବେଶ୍ ଗୁରୁତ୍ୱବହନ କରୁଛି । କୋରୋନା ସଂକ୍ରମଣ ଯୋଗୁ ସବୁବେଳେ ୟୁପି ଯାଇପାରୁନାହାଁନ୍ତି ପ୍ରିୟଙ୍କା । ତେଣୁ ତାଙ୍କର ଲକ୍ଷ୍ନୌ ସିପ୍ଟ ହେବା ରାଜନୈତିକ ଦୃଷ୍ଟିକୋଣରୁ ମଧ୍ୟ ବେଶ୍ ଗୁରୁତ୍ୱବହନ କରିବ । 

କଂଗ୍ରେସ ମହାସଚିବ ହେବା ପରଠୁ ୟୁପି ରାଜନୀତିରେ ବେଶ ସକ୍ରିୟ ରହିଛନ୍ତି ପ୍ରିୟଙ୍କା । ଶ୍ରମିକ, ଦିନ ମଜୁରିଆଙ୍କ ପାଇଁ ସ୍ୱର ଉଠେଇବା ହେଉ କିମ୍ବା ସୋନଭଦ୍ରରେ କୃଷକଙ୍କ ପାଇଁ ଆନ୍ଦୋଳନ ହେଉ, ବିଭିନ୍ନ ସମୟରେ ୟୁପିରେ ଗର୍ଜିଛନ୍ତି ସେ । ଆଗକୁ ୟୁପି ନିର୍ବାଚନରେ କଂଗ୍ରେସର ଚେହେରା ଭାବେ ତାଙ୍କୁ ମନେକରାଯାଉଛି । ତେଣୁ ଏସବୁ ଭିତରେ ଦିଲ୍ଲୀରୁ ଯଦି ୟୁପି ସେ ସିପ୍ଟ ହୁଅନ୍ତି, ତେବେ ରାଜନୈତିକ ଦୃଷ୍ଟିକୋଣରୁ ଏହାର ଗୁରୁତ୍ୱ ବଢ଼ିବ । 

କାହିଁକି ବଙ୍ଗଳା ଖାଲି କରିବାକୁ ନିର୍ଦ୍ଦେଶ ହୋଇଛି ?

ପୂର୍ବରୁ ପ୍ରିୟଙ୍କାଙ୍କ ସମେତ ଗାନ୍ଧୀ ପରିବାରର ସମସ୍ତ ସଦସ୍ୟଙ୍କୁ ଏସପିଜି ସୁରକ୍ଷା ମିଳୁଥିଲା । ଯେଉଁମାନେ ଏସପିଜି ସୁରକ୍ଷା ପାଇଥାନ୍ତି, ସେମାନଙ୍କୁ ସରକାରୀ ବଙ୍ଗଳା ଦେବାର ପ୍ରାବଧାନ ରହିଛି । ତେବେ ଗତ ୨୦୧୯ ମସିହା ନଭେମ୍ବରରେ କାହାକୁ ଏସପିଜି ସୁରକ୍ଷା ମିଳିବ, ସେନେଇ ମୋଦି ସରକାର ନୂଆ ନିୟମ ପ୍ରଣୟନ କରିଥିଲେ । ଏହି ନିୟମ ଅନୁସାରେ, କେବଳ ବର୍ତ୍ତମାନର ପ୍ରଧାନମନ୍ତ୍ରୀ, ପୂର୍ବତନ ପ୍ରଧାନମନ୍ତ୍ରୀ ଏବଂ ତାଙ୍କ ପରିବାର ସଦସ୍ୟଙ୍କୁ ୫ ବର୍ଷ ପର୍ଯ୍ୟନ୍ତ ଏସପିଜି ସୁରକ୍ଷା ମିଳିବ । ଆଉ ଏହାରି ମାଧ୍ୟମରେ ଗାନ୍ଧୀ ପରିବାରର ସମସ୍ତ ସଦସ୍ୟଙ୍କଠାରୁ ଏସପିଜି ସୁରକ୍ଷା ପ୍ରତ୍ୟାହାର କରି ନିଆଯାଇଥିଲା । 

ଏବେ ସୋନିଆ ଗାନ୍ଧୀ, ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀଙ୍କୁ Z ପ୍ଲସ ସୁରକ୍ଷା ମିଳୁଛି । ତେବେ ଜେଡ୍ ପ୍ଲସ ସୁରକ୍ଷା ପାଉଥିବା ବ୍ୟକ୍ତି ବିଶେଷଙ୍କୁ ସରକାରୀ ବଙ୍ଗଳା ଦେବାର ସେମିତି କୌଣସି ପ୍ରାବଧାନ ନାହିଁ । ତେଣୁ ପ୍ରିୟଙ୍ଗା ଗାନ୍ଧୀଙ୍କୁ ସରକାରୀ ବଙ୍ଗଳା ଖାଲି କରିବାକୁ ନିର୍ଦ୍ଦେଶ ଦିଆଯାଇଛି ।  

ପ୍ରିୟଙ୍କା ଗାନ୍ଧୀଙ୍କୁ ଦିଲ୍ଲୀ ଲୋଧି ରୋଡ ସ୍ଥିତ ବଙ୍ଗଳାକୁ ଖାଲି କରିବାକୁ ନିର୍ଦ୍ଦେଶ ହୋଇଛି । ବିଜ୍ଞପ୍ତି ମୁତାବକ, ଲୋଧି ରୋଡରେ ଅବସ୍ଥିତ ୬ବି ଟାଇପର ୩୫ ନମ୍ବର କୋଠାକୁ ଖାଲି କରିବେ ପ୍ରିୟଙ୍କା । ଧାର୍ଯ୍ୟ ସମୟ ମଧ୍ୟରେ ବଙ୍ଗଳା ଖାଲି ନ କଲେ ଫାଇନ ଦେବାକୁ ପଡ଼ିବ ବୋଲି ନୋଟିସରେ ସ୍ପଷ୍ଟ ଭାବେ ଉଲ୍ଲେଖ ରହିଛି ।