କୋରୋନା ମୁକାବିଲା ପାଇଁ ରାହୁଲଙ୍କ ପରାମର୍ଶ, ପିଏମ ମୋଦିଙ୍କୁ କଲେ ଏହି ଅପିଲ

ନୂଆଦିଲ୍ଲୀ: ଦେଶରେ କୋରୋନା ଭାଇରସ ଆକ୍ରାନ୍ତଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଛି । ବର୍ତ୍ତମାନ ଦେଶରେ କୋରୋନା ସଂକ୍ରମିତଙ୍କ ସଂଖ୍ୟା ୨୬,୦୦୦ରୁ ଅଧିକ ରହିଛି ।  କୋରୋନା ସଙ୍କଟକୁ ରୋକିବା ପାଇଁ କେନ୍ଦ୍ର ଓ ରାଜ୍ୟ ସରକାର ଦ୍ରୁତ ଗତିରେ କାର୍ଯ୍ୟ କରୁଛନ୍ତି । ଅନ୍ୟପଟେ କଂଗ୍ରେସର ପୂର୍ବତନ ଅଧ୍ୟକ୍ଷ ତଥା ବର୍ତ୍ତମାନର ବାୟନାଡ ସାଂସଦ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କୋରୋନା ଭାଇରସ୍ (କୋଭିଡ୍ -19) ସହିତ ଲଢ଼ିବା ପାଇଁ ଟେଷ୍ଟିଂ ପୁଣି ଥରେ ବୃଦ୍ଧି କରିବାକୁ ପରାମର୍ଶ ଦେଇଛନ୍ତି । ଏହାସହ ଏହି କାର୍ଯ୍ୟରେ ବାଧାକୁ ଦୂର କରିବାକୁ ଅପିଲ କରିଛନ୍ତି ।

Experts agree that mass random testing is the key to beating Corona. In India, a bottle neck is stopping us from scaling testing from the current 40,000 per day to 1 lakh tests a day, for which test kits are already in stock.

PM needs to act fast & clear the bottleneck.

— Rahul Gandhi (@RahulGandhi) April 26, 2020

କଂଗ୍ରେସ ସାଂସଦ ରାହୁଲ ଗାନ୍ଧୀ ରବିବାର ନିଜ ଟ୍ୱିଟରେ ଲେଖିଛନ୍ତି ଯେ, "ବିଶେଷଜ୍ଞମାନେ ବିଶ୍ୱାସ କରନ୍ତି ଯେ କୋରୋନା ଭାଇରସ ସହିତ ଲଢ଼େଇ କରିବା ପାଇଁ ବଡ଼ ଧରଣର ପରୀକ୍ଷଣ ଗୁରୁତ୍ୱପୂର୍ଣ୍ଣ । ଭାରତରେ ଏକ ଅସୁବିଧା ରହିଛି, ଯାହା ବର୍ତ୍ତମାନ ପରୀକ୍ଷଣର ଗତି ୪୦,୦୦୦ ପ୍ରତିଦିନ ବୃଦ୍ଧି ପାଇଁ ୧ ଲକ୍ଷ ପ୍ରତି ବୃଦ୍ଧି କରିବାରେ ପ୍ରତିରୋଧ କରୁଛି । ଟେଷ୍ଟ କିଟ୍ଗୁଡିକ ପୂର୍ବରୁ ମହଜୁତ ଅଛି । ଏହି ସମସ୍ୟାକୁ ଦୂର କରିବା ପାଇଁ ପ୍ରଧାନମନ୍ତ୍ରୀ ଶୀଘ୍ର କାର୍ଯ୍ୟ କରିବା ଆବଶ୍ୟକ ।"

ଅନ୍ୟପକ୍ଷେ ରବିବାର ସକାଳେ ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଭାରତରେ କୋରୋନା ଭାଇରସ୍ କାରଣରୁ ଏପର୍ଯ୍ୟନ୍ତ ୮୨୪ ଜଣଙ୍କ ମୃତ୍ୟୁ ଘଟିଛି । ଏଥି ସହିତ ସଂକ୍ରମିତ ରୋଗୀଙ୍କ ସଂଖ୍ୟା ୨୬ ହଜାର ୪୯୬କୁ ବୃଦ୍ଧି ପାଇଛି । ଗତ ୨୪ ଘଣ୍ଟାରେ ୧୯୯୦ କୋରୋନାର ନୂତନ ମାମଲା ବାହାରିଛି । ଯାହାକି ଗୋଟିଏ ଦିନରେ ଭାରତରେ ସର୍ବାଧିକ ସଂଖ୍ୟକ ମାମଲା ଅଟେ । ଏହି ୨୪ ଘଣ୍ଟା ମଧ୍ୟରେ ୪୯ ଜଣଙ୍କର ମୃତ୍ୟୁ ହୋଇଛି । ତେବେ ଏପର୍ଯ୍ୟନ୍ତ ୫ ହଜାର ୮୦୪ ଜଣ ରୋଗୀ ଏହି ବିପଜ୍ଜନକ ରୋଗରୁ ଆରୋଗ୍ୟ ଲାଭ କରିଛନ୍ତି ।