ମେ ୧୨ରୁ ଆରମ୍ଭ ହେବ ଟ୍ରେନ ସେବା

ନୂଆଦିଲ୍ଲୀ: କୋରୋନା ଭାଇରସ ରୋକିବା ପାଇଁ ମେ ୧୭ ପର୍ଯ୍ୟନ୍ତ ସାରା ଦେଶରେ ତାଲା ପଡିଛି । କିନ୍ତୁ ଭାରତୀୟ ରେଲୱେ ମେ ୧୨ରୁ ଟ୍ରେନ୍ ଚଳାଇବାକୁ ନିଷ୍ପତ୍ତି ନେଇଛି । ପର୍ଯ୍ୟାୟକ୍ରମେ ଏହାର ସେବା ଆରମ୍ଭ କରିବାକୁ ରେଳ ଯୋଜନା କରୁଛି । ଭାରତୀୟ ରେଲୱେ ଆସନ୍ତା ୧୨ ତାରିଖରୁ ଧୀରେ ଧୀରେ ଟ୍ରେନ୍ ଆରମ୍ଭ କରିବାକୁ ଯୋଜନା କରିଛି । ଏହି ସମୟ ମଧ୍ୟରେ ନୂଆଦିଲ୍ଲୀ ଷ୍ଟେସନକୁ ଦିବ୍ରୁଗଡ, ଅଗରତଲା, ହାୱଡ଼ା, ପାଟନା, ବିଲାସପୁର, ରାଞ୍ଚି, ଭୁବନେଶ୍ୱର, ସିକନ୍ଦରାବାଦ, ବାଙ୍ଗାଲୋର, ଚେନ୍ନାଇ, ଥିରୁବନନ୍ତପୁରମ୍, ମଡଗାଓଁ, ମୁମ୍ବାଇ ସେଣ୍ଟ୍ରାଲ୍, ଅହମ୍ମଦାବାଦ ଏବଂ ଜମ୍ମୁ ତବି ସହିତ ସଂଯୋଗ କରୁଥିବା ଟ୍ରେନକୁ ବିଶେଷ ଭାବେ ଚଳାଯିବ ।

ଏହା ପରେ ରେଲୱେ ଅନ୍ୟ କେତେକ ମାର୍ଗରେ ସ୍ୱତନ୍ତ୍ର ଟ୍ରେନ୍ ଚଳାଇବ । ଯଦିଓ ଏହା କୋଚ୍ ଉପଲବ୍ଧତା ଉପରେ ନିର୍ଭର କରିବ । କାରଣ ୨୦,୦୦୦ କୋଚ୍ କୋଭିଡ-19 କେୟାର ସେଣ୍ଟର ଭାବରେ ସଂରକ୍ଷିତ ଥିବାବେଳେ ଦୈନିକ ୩୦୦ ଶ୍ରମିକ ସ୍ୱତନ୍ତ୍ର ଟ୍ରେନ୍ ଚଳାଇବା ପାଇଁ ପର୍ଯ୍ୟାପ୍ତ ସଂଖ୍ୟକ କୋଚ୍ ରିଜର୍ଭ ରହିଛି ।

Railways plans to gradually restart passenger train operations from 12th May, 2020, initially with 15 pairs of special trains connecting New Delhi with major stations across India. Booking in these trains will start at 4 pm on 11th May.https://t.co/DW9I1sPRx6

— Piyush Goyal (@PiyushGoyal) May 10, 2020

ଏହି ଟ୍ରେନରେ ସଂରକ୍ଷଣ ପାଇଁ ବୁକିଂ ମେ ୧୧ ତାରିଖ ଅପରାହ୍ନ ୪ଟାରୁ ଆରମ୍ଭ ହେବ ।  କେବଳ IRCTC ୱେବସାଇଟରୁ ଟିକେଟ୍ କରାଯାଇପାରିବ । ରେଳ ଷ୍ଟେସନରେ ଟିକେଟ୍ ବୁକିଂ କାଉଣ୍ଟର ବନ୍ଦ ରହିବ । କୌଣସି କାଉଣ୍ଟର ଟିକେଟ୍ (ପ୍ଲାଟଫର୍ମ ଟିକେଟ୍ ସମେତ) ଜାରି କରାଯିବ ନାହିଁ । କେବଳ ବୈଧ ନିଶ୍ଚିତ ଟିକେଟ୍ ଥିବା ଯାତ୍ରୀମାନଙ୍କୁ ରେଳ ଷ୍ଟେସନରେ ପ୍ରବେଶ କରିବାକୁ ଅନୁମତି ଦିଆଯିବ । ପ୍ରବେଶ ସମୟରେ ଯାତ୍ରୀମାନଙ୍କ ପାଇଁ ମାସ୍କ ବାଧ୍ୟତାମୂଳକ ହେବ । ପ୍ରସ୍ଥାନ ସମୟରେ ସ୍କ୍ରିନିଂ କରାଯିବ । କେବଳ ଯାତ୍ରୀମାନଙ୍କୁ ଟ୍ରେନରେ ଯିବାକୁ ଅନୁମତି ଦିଆଯିବ ।