ଲଦାଖ ଯିବେ ରାଜନାଥ

ନୂଆଦିଲ୍ଲୀ: ଲଦାଖ ଗସ୍ତରେ ଯିବେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । ଏହି ଗସ୍ତ ବେଳେ ସିଡିଏସ ବିପିନ ରାୱତ ମଧ୍ୟ ସାଥିରେ ଯିବେ । ସୀମାରେ ସେନାର ପ୍ରସ୍ତୁତି ନେଇ ସମୀକ୍ଷା କରିବାକୁ ରାଜନାଥ ଲଦାଖ ଯିବେ ବୋଲି ଜଣାପଡ଼ିଛି । ଆସନ୍ତାକାଲି ଅର୍ଥାତ ଶୁକ୍ରବାର ଏହି ଗସ୍ତ କରିବେ ପ୍ରତିରକ୍ଷା ମନ୍ତ୍ରୀ । ଭାରତ ଓ ଚୀନ ମଧ୍ୟରେ ତିକ୍ତତା ଲାଗି ରହିଥିବା ବେଳେ ରାଜନାଥଙ୍କ ଏହି ଗସ୍ତ ବେଶ୍ ଗୁରୁତ୍ୱବହନ କରୁଛି । 

ଗଲୱାନ ଭ୍ୟାଲିରେ ବିଶ୍ୱାସଘାତକତା କରିଥିବା ଚୀନ ଉପରେ ଏବେ କଡ଼ା ନଜର ରଖିଛି ଭାରତ । ବିଭିନ୍ନ କ୍ଷେତ୍ରରେ ଚୀନକୁ ସବକ ଶିଖାଇବା ପାଇଁ ସରକାର ପ୍ରସ୍ତୁତି ନେଉଛନ୍ତି । ଚୀନ ଉପରେ ହୋଇଥିବା ଡିଜିଟାଲ ଷ୍ଟ୍ରାଇକ ସମଗ୍ର ବିଶ୍ୱର ନଜରକୁ ଆସିଛି । ସେହିପରି ଜାତୀୟ ରାଜପଥ ପ୍ରକଳ୍ପ ଗୁଡ଼ିକରେ କୌଣସି ଚାଇନିଜ କମ୍ପାନୀ ଅଂଶଗ୍ରହଣ କରିପାରିବେ ନାହିଁ ବୋଲି ସରକାର ନିଷ୍ପତ୍ତି ନେଇଛନ୍ତି । କେବଳ ସେତିକି ନୁହେଁ, Weiboକୁ ବାଏବାଏ କରି ମୋଦି ଚୀନକୁ ଭିନ୍ନ ଏକ ସନ୍ଦେଶ ଦେଇଛନ୍ତି । 

LACରେ ଉତ୍ତେଜନକୁ ନେଇ ୩୦ ଜୁନରେ କୋର କମାଣ୍ଡର ସ୍ତରରେ ଆଲୋଚନା ହୋଇଥିଲା । ଏହି ସମୟରେ ଉଭୟ ଦେଶର ସୈନିକ ପଛକୁ ଘୁଞ୍ଚିବା ପାଇଁ ସହମତି ପ୍ରକାଶ କରିଥିଲେ । କିନ୍ତୁ Zee News ପାଖରେ ଯେଉଁ ଖବର ଅଛି, ଏବେ ଉଭୟ ଦେଶର ସୈନିକ ପଛକୁ ହଟିବେ ନାହିଁ ।