ଆକମଲଙ୍କ ଦଣ୍ଡରେ କୋହଳ, ୩ ବର୍ଷ ପରିବର୍ତ୍ତେ ୧୮ ମାସ ବାସନ୍ଦ

କରାଚି: ପାକିସ୍ତାନୀ ବ୍ୟାଟ୍ସମ୍ୟାନ୍ ଉମର ଆକମଲଙ୍କୁ ଆଶ୍ୱସ୍ତି। ମ୍ୟାଚ ଫିକ୍ସିଂ ଓ ବୋର୍ଡ କର୍ତ୍ତୃପକ୍ଷଙ୍କୁ ଏନେଇ ସଠିକ ସୂଚନା ନ ଦେବା ଅଭିଯୋଗରେ ୩ ବର୍ଷ ପାଇଁ ଦଳରୁ ବ୍ୟାନ କରାଯାଇଥିଲା। ମାତ୍ର ଉକ୍ତ ସମୟ ଅବଧିକୁ ହ୍ରାସ କରାଯାଇ ୧୮ ମାସ କରାଯାଇଛି।  ପାକିସ୍ତାନ ସୁପର ଲିଗ୍ ସମୟରେ ସ୍ପଟ୍ ଫିକ୍ସିଂ ପାଇଁ ଓମାର ଆକମଲଙ୍କୁ ଯୋଗାଯୋଗ କରାଯାଇଥିଲା। ମାତ୍ର ଏହି ସୂଚନା ସେ ବୋର୍ଡକୁ ଜଣାଇ ନଥିବା ନେଇ ଅଭିଯ଼ୋଗ ହୋଇଛି। 

ତେବେ ପରିବର୍ତ୍ତିତ ସମୟ ଅନୁଯାୟୀ ୨୦୨୦ ଫେବୃଆରୀ ମାସରୁ ୨୦୨୧, ଅଗଷ୍ଟ ମାସ ପର୍ଯ୍ୟନ୍ତ ତାଙ୍କୁ ଦଳରୁ ବାଦ ପଡ଼ିବେ। ତେବେ ଏହି ନିଷ୍ପତ୍ତିରେ ଓମାର ଆକମଲ ସନ୍ତୁଷ୍ଟ ନଥିବା ବେଳେ ସେ ପୁନର୍ବିଚାର କରିପାରନ୍ତି ବୋଲି ସୂଚନା ରହିଛି। ଆକମଲ କହିଛନ୍ତି କି, ମୋ ପୂର୍ବରୁ ମଧ୍ୟ ଅନେକ ବଡ଼ବଡ଼ କ୍ରିକେଟର ରହିଛନ୍ତି, ଯେଉଁମାନେ ଏଭଳି ଭୁଲ କରିଥିଲେ ମଧ୍ୟ ତାଙ୍କୁ ସେଭଳି କୌଣସି କଠୋର ଦଣ୍ଡରେ ଦଣ୍ଡିତ କରାଯାଇନାହିଁ। ମୁଁ ପୁଣି ଥରେ ଦଣ୍ଡରେ କୋହଳ କରିବାକୁ ପ୍ରସ୍ତାବ ଦେବି। 

ଗତ ଏପ୍ରିଲ ମାସରେ ଆକମଲଙ୍କୁ ଏହି ଦଣ୍ଡରେ ଦଣ୍ଡିତ କରାଯାଇଥିଲା। କାରଣ ପାକିସ୍ତାନ ସୁପର ଲିଗରେ ହୋଇଥିବା ଏହି ଫିକ୍ସିଂ ସମ୍ପର୍କରେ ସେ ବୋର୍ଡକୁ ସୂଚନା ଦେବାରେ ବିଫଳ ହୋଇଥିଲେ। ସେ ନିଜର ଭୁଲକୁ ମଧ୍ୟ ସ୍ୱିକାର କରିଥିବା ଜଣାପଡ଼ିଛି।