ସ୍ପେସ ମିଶାଇଲ ପରୀକ୍ଷାକୁ ଖାରଜ କଲା ଋୁଷ, ଅଭିଯୋଗ ଆଣିଥିଲା ଆମେରିକା

ମସ୍କୋ: ମହାକାଶରେ ଉପଗ୍ରହ ବିରୋଧୀ କ୍ଷେପଣାସ୍ତ୍ର ପରୀକ୍ଷା କରିଥିବା ନେଇ ଆମେରିକା ଏବଂ ବ୍ରିଟେନ ଯେଉଁ ଦାବି କରି ଆସୁଥିଲେ, ତାହାକୁ ଖାରଜ କରିଛି ଋଷ। ଋଷ କହିଛି ଯେ ଉଭୟ ଆମେରିକା ଓ ବ୍ରିଟେନ କରିଥିବା ଅଭିଯୋଗ ପ୍ରମାଣ କରୁଛି ଯେ ଆମେରିକା ନିଜେ ମହାକାଶରେ ଅସ୍ତ୍ରଶସ୍ତ୍ର ପରୀକ୍ଷା କରିବାକୁ ଚାହୁଁଛି।

ଆମେରିକା ଏବଂ ବ୍ରିଟେନର ଅଧିକାରୀମାନେ ଗୁରୁବାର ଦାବି କରିଛନ୍ତି ଯେ ଜୁଲାଇ ୧୫ରେ ଉପଗ୍ରହ ବିରୋଧୀ ଅସ୍ତ୍ର ପରୀକ୍ଷଣ ସୂଚାଇ ଦେଇଛି ଯେ ଋଷ ଟେକ୍ନୋଲୋଜି ବିକାଶ କରିବାକୁ ଚେଷ୍ଟା କରୁଛି ଯାହା ମହାକାଶରେ ଆମେରିକା ଏବଂ ଏହାର ସହଯୋଗୀଙ୍କ ସମ୍ପତ୍ତି ପ୍ରତି ବିପଦ ସୃଷ୍ଟି କରିବ। 

ଏହି ଅଭିଯୋଗକୁ ଅସ୍ୱୀକାର କରି ଋଷର ବୈଦେଶିକ ମନ୍ତ୍ରଣାଳୟ କହିଛି ଯେ ଗତ ୧୫ ତାରିଖରେ କ୍ଷେପଣାସ୍ତ୍ର ପରୀକ୍ଷା ମହାକାଶ ପାଇଁ କୌଣସି ବିପଦ ସୃଷ୍ଟି କରି ନାହିଁ । ଏହି ବିବୃତ୍ତିରେ ଆହୁରି ମଧ୍ୟ କୁହାଯାଇଛି ଯେ ଋଷର ମହାକାଶ କାର୍ଯ୍ୟକଳାପ ଏବଂ ଶାନ୍ତିପୂର୍ଣ୍ଣ କାର୍ଯ୍ୟକଳାପକୁ ଭୁଲ ସୂଚନା ଦିଆଯାଉଛି।

ଆମେରିକା କହିଛି ଯେ ୟୁଏସ ସ୍ପେସ୍ କମାଣ୍ଡର ନିକଟରେ ପ୍ରମାଣ ଅଛି ଯେ ମସ୍କୋ ୧୫ ଜୁଲାଇରେ ଏକ ସ୍ପେସ୍ ଆଧାରିତ ଉପଗ୍ରହ ବିରୋଧୀ ଅସ୍ତ୍ର ପରୀକ୍ଷା କରିଛି। ଏହା ପରେ ଆମେରିକାର ଆଣବିକ ନିରସ୍ତ୍ରୀକରଣ ବୁଝାମଣାକାରୀ ମାର୍ଶଲ ବିଲିଂସେଲି ଟ୍ୱିଟ୍ କରି କହିଛନ୍ତି ଯେ ଏହା ଗ୍ରହଣୀୟ ନୁହେଁ। ଆସନ୍ତା ସପ୍ତାହରେ ଭିଏନାରେ ଋଷର ପରୀକ୍ଷା ଏକ ପ୍ରମୁଖ ପ୍ରସଙ୍ଗ ହେବ। ଯେଉଁଠାରେ ସେମାନେ ନୂତନ ଆରମ୍ଭ ଚୁକ୍ତି ଉପରେ ଆଲୋଚନା କରିବେ ବୋଲି ସେ ସୂଚନା ଦେଇଛନ୍ତି।