'ପାକିସ୍ତାନ ହମଲା କଲେ ସର୍ଜିକାଲ ଷ୍ଟ୍ରାଇକ, ହେଲେ ଚୀନକୁ ଡିଜିଟାଲ ଷ୍ଟ୍ରାଇକ'

ମୁମ୍ବାଇ: ଚୀନକୁ ସବକ ଶିଖାଇବାକୁ ଯାଇ ଟିକଟକ ସମେତ ୫୯ ଚାଇନିଜ ଆପକୁ ବ୍ୟାନ କରିଛନ୍ତି କେନ୍ଦ୍ର ସରକାର । ତେବେ ଏହି ପ୍ରସଙ୍ଗରେ ସରକାରଙ୍କୁ ସମାଲୋଚନା କରିଛି ଶିବସେନା । ଦଳୀୟ ମୁଖପତ୍ର 'ସାମନା'ର ସମ୍ପାଦକୀୟରେ ଏନେଇ ପ୍ରଶ୍ନ ଉଠାଯାଇଛି । ଆପ୍ ମାଧ୍ୟମରେ ଆମ ଦେଶର ତଥ୍ୟ ବାହାରକୁ ଯାଉଥିଲା, ଏକଥା ସରକାର କ'ଣ ଏବେ ଜାଣିଲେ ? ଏହି କାରଣ ଯୋଗୁ ଦେଶର ୨୦ ଯବାନଙ୍କୁ ଶହୀଦ ହେବାକୁ ପଡ଼ିଥିବା କହିଛି ଶିବସେନା ।  

ସମ୍ପାଦକୀୟରେ କୁହାଯାଇଛି, ଯେତେବେଳେ ପାକିସ୍ତାନୀ ଆମ ଦେଶରେ ପ୍ରବେଶ କରି ସେନା କ୍ୟାମ୍ପ ଉପରେ ହମଲା କରିଥିଲେ, ସେତେବେଳେ ଭାରତୀୟ ଯବାନ ପିଓକେରେ ପଶି କଡ଼ା ଜବାବ ଦେଇଥିଲେ । ଏହା ସର୍ଜିକାଲ ଷ୍ଟ୍ରାଇକ ଭାବେ ପରିଚିତ । ହେଲେ ଯେତେବେଳେ ଚୀନ ସେନା ଗଲୱାନ ଘାଟିରେ ଆକ୍ରମଣ କଲେ, ଆମେ ଚୀନ ବିରୋଧରେ ଡିଜିଟାଲ ଷ୍ଟ୍ରାଇକ କରୁଛୁ । ଚୀନ ସହ ଏହି ସଂଘର୍ଷରେ ଆମର ୨୦ ଯବାନ ଶହୀଦ ହୋଇଛନ୍ତି ବୋଲି କହିଛି ଶିବସେନା । 

'ସାମନା' ରେ ଆହୁରି ମଧ୍ୟ କୁହାଯାଇଛି, ରକ୍ତରଞ୍ଜିତ ସଂଘର୍ଷ ବଦଳରେ ଆମେ ଡିଜିଟାଲ ଷ୍ଟ୍ରାଇକ କରୁଛୁ । ସରକାରଙ୍କ ପକ୍ଷରୁ କୁହାଯାଇଛି, ଭାରତର ଏକତା, ଅଖଣ୍ଡତା ଏବଂ ସୁରକ୍ଷା ଦୃଷ୍ଟିରୁ ଚାଇନିଜ ଆପ୍ ବିପଦପୂର୍ଣ୍ଣ ଅଟେ । ତେଣୁ ଏହି ଆପକୁ ବ୍ୟାନ କରାଯାଉଛି । ଚୀନ ଆପ୍ ରାଷ୍ଟ୍ରୀୟ ସୁରକ୍ଷା ପାଇଁ ବିପଦ, ଏକଥା ଭାରତ ସରକାର କେବେ ଜାଣିଲେ ବୋଲି ପ୍ରଶ୍ନ କରିଛି ଶିବସେନା । ଆମ ଦେଶର ତଥ୍ୟ ବାହାରକୁ ଯାଉଛି, ଏକଥା ସରକାରଙ୍କୁ କ'ଣ ଜଣାନଥିଲା କି ବୋଲି ସମ୍ପାଦକୀୟରେ ପ୍ରଶ୍ନ କରାଯାଇଛି । 

କେବଳ ଆପ୍ ବ୍ୟାନ କଲେ ହେବ ନାହିଁ 

ଶିବସେନା କହିଛି, ଚୀନର ଅର୍ଥବ୍ୟବସ୍ଥାକୁ ଝଟକା ଦେବାର ଆବଶ୍ୟକ ଥିଲା । କିନ୍ତୁ କେବଳ ଆପ୍ ବ୍ୟାନ କରିଦେଲେ ହେବନାହିଁ । ଚୀନର ହୁବେଇ କମ୍ପାନୀ ଭାରତରେ ୫ଜି ନେଟୱାର୍କ ଆରମ୍ଭ କରିବାକୁ ଯାଉଛି । ଏନେଇ ହୁବେଇକୁ କଣ୍ଟ୍ରାକ୍ଟ ମିଳିଛି । ତେଣୁ ଭାରତର ଡିଜିଟାଲ ଅର୍ଥ ବ୍ୟବସ୍ଥାର ଚାବିକାଠି ନିଜ ଦେଶରେ ରଖିବାକୁ ହେବ । ଡିଜିଟାଲ ଅର୍ଥବ୍ୟବସ୍ଥାର ଚାବିକାଠି ଅନ୍ୟଦେଶରେ ରହିଲେ, ଦେଶ ପାଇଁ ପରବର୍ତ୍ତୀ ସମୟରେ ବିପଦ ବୋଲି କହିଛି ଶିବସେନା । 

ସେହିପରି ଟିକଟକ ଆପ ବ୍ୟାନ ନେଇ ମଧ୍ୟ ସମ୍ପାଦକୀୟରେ ପ୍ରତିକ୍ରିୟା ପ୍ରକାଶ ପାଇଛି । ଏଥିରୁ ଅନେକ ଟିକଟକ ଷ୍ଟାର୍ସ ସୃଷ୍ଟି ହୋଇଛନ୍ତି । ଏମାନଙ୍କ ମଧ୍ୟରୁ ଅନେକ ବିଜେପିରେ ସାମିଲ ହୋଇଥିଲେ । ଶିବସେନା ପ୍ରଶ୍ନ କରିଛି, ରାଜନୀତିରେ ପ୍ରବେଶ କରିଥିବା ଏହି ଟିକଟକ ଷ୍ଟାର୍ସଙ୍କର ଏବେ କ'ଣ ହେବ ?