ବଦଳିବ ପୁରାତନ ବତୀଘରର ଚେହେରା, ବଢିବ ରୋଜଗାରର ମାଧ୍ୟମ

ନୂଆଦିଲ୍ଲୀ: ଦେଶରେ ଥିବା ବତୀଘର ପର୍ଯ୍ୟଟନ ସ୍ଥଳ ଗୁଡ଼ିକର ଉନ୍ନତି ପାଇଁ କେନ୍ଦ୍ର ସରକାର ପଦକ୍ଷେପ ଗ୍ରହଣ କରିବାକୁ ଯାଉଛନ୍ତି। ଏଥିପାଇଁ ଜାହାଜ ଚଳାଚଳ ମନ୍ତ୍ରଣାଳୟର ସଦସ୍ୟ ଏକ ବୈଠକରେ ନିଷ୍ପତ୍ତି ନେଇଥିବା ଜଣାପଡ଼ିଛି। ବିଭାଗୀୟ ମନ୍ତ୍ରୀ ମନଶୁଖ ମାଣ୍ଡଭିୟାଙ୍କ ନେତୃତ୍ୱରେ ଏହି ବୈଠକ ଅନୁଷ୍ଠିତ ହୋଇଥିବା ସୂଚନା ମିଳିଛି।  

ବୈଠକରେ ଦେଶରେ ଥିବା ୧୯୪ଟି ବତୀଘର ଉନ୍ନତି କରାଯିବା ସହିତ ପର୍ଯ୍ୟଟନ କ୍ଷେତ୍ରରେ ସେଗୁଡ଼ିକର ଉନ୍ନତି ପାଇଁ ପ୍ରୟାସ କରାଯିବ ବୋଲି ନିଷ୍ପତ୍ତି ହୋଇଛି। ପର୍ଯ୍ୟଟକଙ୍କୁ ଆକର୍ଷିତ କରାଯିବା ପାଇଁ ଉକ୍ତ ବତୀଘର ଗୁଡ଼ିକର ବ୍ୟାପକ ଉନ୍ନତି କରାଯିବ। ଏହା ସହିତ ଏହି ପର୍ଯ୍ୟଟନସ୍ଥଳୀ ଗୁଡ଼ିକରୁ ଅଧିକ ମାତ୍ରାରେ ଅର୍ଥ ରୋଜଗାର କରାଯିବାର ଲକ୍ଷ୍ୟ ମଧ୍ୟ ରଖିଛନ୍ତି। ଏହା ସହିତ ରୋଜଗାର ମଧ୍ୟ ସୃଷ୍ଟି କରିବାକୁ ଲକ୍ଷ୍ୟ ରଖିଛନ୍ତି ସରକାର।  

ପ୍ରାଥମିକ ପର୍ଯ୍ୟୟରେ 100 ବର୍ଷରୁ ଅଧିକ ପୁରୁଣା ଲାଇଟହାଉସ ଚିହ୍ନଟ କରିବାକୁ ମନ୍ତ୍ରୀ ଅଧିକାରୀମାନଙ୍କୁ ପରାମର୍ଶ ଦେଇଛନ୍ତି। ଏହି ସବୁ ପର୍ଯ୍ୟଟନ କ୍ଷେତ୍ରରେ ସଂଗ୍ରହାଳୟ, ବିଭିନ୍ନ ଶୋ କେସ କରିବାକୁ ମଧ୍ୟ ଯୋଜନା ରଖିଥିବା ନେଇ ବୈଠକରେ ନିଷ୍ପତ୍ତି ହୋଇଛି। ଲାଇଟହାଉସର ମାଷ୍ଟର ଡେଭଲପମେଣ୍ଟ ଯୋଜନା ଅନୁଯାୟୀ, କେତେକ ପ୍ରମୁଖ ଆକର୍ଷଣ ହେଉଛି ସଂଗ୍ରହାଳୟ, ଆକ୍ୱାରିୟମ୍, ଶିଶୁ ଖେଳ ଏବଂ ବଗିଚା, ଜଳଫୁଆର ସହିତ |

ଗୁଜୁରାଟର ଗୋପନାଥ, ଦ୍ୱାରକା ଏବଂ ଭେରାଭାଲ ଲାଇଟହାଉସରେ ପର୍ଯ୍ୟଟନ କାର୍ଯ୍ୟକଳାପର ବିକାଶ ପାଇଁ ମନ୍ତ୍ରୀ ମଧ୍ୟ ଅଗ୍ରଗତି କରିଥିଲେ। ତେବେ ଏହା ମଧ୍ୟରେ ଓଡ଼ିଶାରେ ଥିବା ବତୀଘରର ଉନ୍ନତି କରିବାକୁ ମଧ୍ୟ ନିଷ୍ପତ୍ତି ନେଇଥିବା ସୂଚନା ରହିଛି।