ରତନ ଟାଟାଙ୍କ ବଡ଼ ଘୋଷଣା, କୋରୋନା ମୁକାବିଲା ପାଇଁ ୫୦୦ କୋଟି ଖର୍ଚ୍ଚ କରିବ ଟାଟା ଟ୍ରଷ୍ଟ

ନୂଆଦିଲ୍ଲୀ: କୋରୋନା ମୁକାବିଲାରେ ସାହାଯ୍ୟ କରିବାକୁ ଟାଟା ଟ୍ରଷ୍ଟ ମଧ୍ୟ ହାତ ବଢ଼ାଇଛି । ଟାଟା ଟ୍ରଷ୍ଟ କୋରୋନା ଭୂତାଣୁର ମୁକାବିଲା ପାଇଁ 500 କୋଟି ଖର୍ଚ୍ଚ କରିବାକୁ ନିଷ୍ପତ୍ତି ନେଇଛି । ଆଜି ଅର୍ଥାତ ଶନିବାର ଏହି ଘୋଷଣା ଟାଟା ଟ୍ରଷ୍ଟର ଚେୟାରମ୍ୟାନ ରତନ ଟାଟା କରଛନ୍ତି ।

ଏହି ଘୋଷଣା କରି ଟାଟା ଟ୍ରଷ୍ଟର ଚେୟାରମ୍ୟାନ୍ ରତନ ଟାଟା କହିଛନ୍ତି ଯେ କରୋନା ଭାଇରସ ଯୋଗୁଁ ସୃଷ୍ଟି ହୋଇଥିବା ସଙ୍କଟକୁ ମୁକାବିଲା କରିବା ପାଇଁ ଜରୁରୀକାଳୀନ ସମ୍ବଳର ଆବଶ୍ୟକତା ରହିଛି । କୋରୋନା ଭୂତାଣୁ ସଙ୍କଟ ହେଉଛି ସବୁଠାରୁ କଠିନ ଚ୍ୟାଲେଞ୍ଜ ମଧ୍ୟରୁ ଅନ୍ୟତମ । ସେ କହିଛନ୍ତି ଯେ ଏହି ଅର୍ଥ କରୋନା ଭୂତାଣୁ ସହ ଲଢୁଥିବା ସ୍ୱାସ୍ଥ୍ୟ କର୍ମୀଙ୍କୁ ଉପକରଣ ଯୋଗାଇବାରେ ଏବଂ କୋରୋନା ରୋଗୀଙ୍କ ଚିକିତ୍ସାରେ ଖର୍ଚ୍ଚ କରାଯିବ ।

କୋରୋନା ଭାଇରସର ଯୁଦ୍ଧରେ ସାଥ୍ ଦେବା ପାଇଁ  ପ୍ରଧାନମନ୍ତ୍ରୀ ସିଟିଜନ ଆସିଷ୍ଟେଣ୍ସ ଆଡ୍ ରିଲଫ ଇନ ଇମେରଜେନ୍ସି ସିଚୁଏଶନ ଫଣ୍ଡ ଅର୍ଥାତ ପିଏମ କେୟର୍ସ ଫଣ୍ଡ ଗଠନ କରାଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ, ପିଏମ କେୟାର ଫଣ୍ଡ ଭାରତକୁ ସୁସ୍ଥ ରଖିବାରେ ସାହାଯ୍ୟ କରିବ। ସମସ୍ତେ ଏହି ପାଣ୍ଠିକୁ ଦାନ କରିପାରିବେ । ଏହା ପରେ ଆଜି ଅଭିନେତା ଅକ୍ଷୟ କୁମାର ଏହି ପାଣ୍ଠିକୁ 25 କୋଟି ଟଙ୍କା ଦେବାକୁ ଘୋଷଣା କରିଛନ୍ତି ।