ଦିଲ୍ଲୀରେ କୋରୋନା ସଂକ୍ରମିତଙ୍କ ସଂଖ୍ୟା ପହଞ୍ଚିଲା ପ୍ରାୟ ୨୯ ହଜାର

ନୂଆଦିଲ୍ଲୀ: ଦ୍ରୁତଗତିରେ ବଢ଼ି ଚାଲିଛି କୋରୋନା ଭାଇରସ ସଂକ୍ରମିତଙ୍କ ସଂଖ୍ୟା । ଏହାସହ ଏହି ମହାମାରୀ ସାରା ଦେଶରେ ଆତଙ୍କ ସୃଷ୍ଟି କରିଚାଲିଛି । ଭାରତରେ କୋରୋନାରେ ୨.୫ ଲକ୍ଷରୁ ଅଧିକ କୋରୋନା ସଂକ୍ରମିତ ଚିହ୍ନଟ ହୋଇଛନ୍ତି । ଏହା ସହ ଦେଶରେ ଏପର୍ଯ୍ୟନ୍ତ ପ୍ରାୟ ୭ ହଜାର କୋରୋନା ସଂକ୍ରମିତଙ୍କର ମୃତ୍ୟୁ ହୋଇଛି । ଏହି ସମୟରେ ଦେଶର ରାଜଧାନୀ ଦିଲ୍ଲୀରେ କୋରୋନା ସଂକ୍ରମିତଙ୍କ ସଂଖ୍ୟା ପ୍ରାୟ ୨୯ ହଜାରରେ ପହଞ୍ଚିଛି । ଗତ ୨୪ ଘଣ୍ଟା ମଧ୍ୟରେ ଦିଲ୍ଲୀରେ ୧୨୮୨ ନୂଆ କୋରୋନା ମାମଲା ଚିହ୍ନଟ ହୋଇଛି । ଏହା ସହିତ ସଂକ୍ରମିତ ସଂଖ୍ୟା ୨୮,୯୩୬ରେ ପହଞ୍ଚିଛି ।

ଦିଲ୍ଲୀରେ ଗତ ୨୪ ଘଣ୍ଟା ମଧ୍ୟରେ ୩୩୫ କୋରୋନା ରୋଗୀ ଆରୋଗ୍ୟ ଲାଭ କରିଛନ୍ତି ।  ଫଳରେ ଦିଲ୍ଲୀରେ ବର୍ତ୍ତମାନ ପର୍ଯ୍ୟନ୍ତ ମୋଟ ୧୦,୯୯୯ ସଂକ୍ରମିତ ଚିକିତ୍ସା ପରେ ନିଜ ଘରକୁ ଫେରିଛନ୍ତି । ଗତ ୨୪ ଘଣ୍ଟା ମଧ୍ୟରେ ରାଜଧାନୀରେ କୌଣସି ମୃତ୍ୟୁ ଘଟି ନାହିଁ । କିନ୍ତୁ ମେ ୮ରୁ ଜୁନ୍ ୫ ମଧ୍ୟରେ ୫୧ ଜଣ ସଂକ୍ରମିତଙ୍କର ମୃତ୍ୟୁ ଘଟିଥିଲା । ଯେଉଁ କାରଣରୁ ଏହି ମୃତ୍ୟୁ  ସଂଖ୍ୟା ୭୬୧ରୁ ୮୧୨ କୁ ବୃଦ୍ଧି ପାଇଛି । ଦିଲ୍ଲୀରେ ସୁସ୍ଥ ହେବା ହାର ୩୮.୦୧ ପ୍ରତିଶତ ଥିବାବେଳେ ମୃତ୍ୟୁ ହାର ୨.୮୦ ରହିଛି । ବର୍ତ୍ତମାନ ଏଠାରେ ସକ୍ରିୟ ସଂକ୍ରମିତଙ୍କ ସଂଖ୍ୟା ୧୭,୧୨୫ ରହିଛ ।

ଏହି ସମୟରେ ବଢୁଥିବା କୋରୋନା ମାମଲା ମଧ୍ୟରେ ଦିଲ୍ଲୀ କ୍ୟାବିନେଟ ନିଷ୍ପତ୍ତି ନେଇଛି ଯେ କେବଳ ଦିଲ୍ଲୀ ବାସିନ୍ଦାଙ୍କୁ ଦିଲ୍ଲୀ ସରକାରୀ ଏବଂ ବେସରକାରୀ ଡାକ୍ତରଖାନାରେ ଚିକିତ୍ସା କରାଯିବ । ଅନ୍ୟପକ୍ଷେ ସମସ୍ତ ଚିକିତ୍ସା କେନ୍ଦ୍ର ସରକାରୀ ଡାକ୍ତରଖାନାରେ ହେବ । ଏକ ସାମ୍ବାଦିକ ସମ୍ମିଳନୀ କରିବା ପରେ ଅରବିନ୍ଦ କେଜ୍ରିୱାଲ ଏହି ସୂଚନା ଦେଇଛନ୍ତି । ଏହା ସହିତ ଦିଲ୍ଲୀ ବାହାରେ ଥିବା ସମସ୍ତ ଲୋକଙ୍କ ପାଇଁ ସୀମା ଖୋଲାଯିବ ବୋଲି ସେ କହିଛନ୍ତି ।

Add Zee News as a Preferred Source